O Faamanuiaga o le Tala Lelei

“Ua faauuina aʻu e Ieova e taʻu atu le tala lelei i ē ua agamalu. Ua ia auina mai aʻu e fufusi i ē loto momomo, . . . e faamāfanafana i ē uma o faavauvau.”—ISAIA 61:1, 2, NW.

1, 2. (a) Na faaalia e Iesu o ai ia, ma e faapefea? (e) O ā faamanuiaga na aumaia e le tala lelei na folafolaina e Iesu?

I SE tasi o aso Sapati i le amatamataga o lana faiva, sa iai Iesu i le sunako i Nasareta. E tusa ai ma faamaumauga, “ua tuuina mai ia te ia le Tusi a le perofeta o Isaia. Ona fofola lea e ia le Tusi, ona maua ai lea o le mea ua tusia ai lenei upu. Ua i oʻu luga le Agaga o le Alii, auā ua na faauu mai ia te au e folafola le tala lelei.” Ona faitau ai lea e Iesu o le isi vaega o le valoaga. Ona ia nofo lea i lalo ma faapea atu: “O le aso nei ua taunuu ai lenei Tusi, o outou o faalogologo ai.”—Luka 4:16-21.

² I lenei auala, na faaalia ai e Iesu o ia o le faievagelia na valoia, o lē na te taʻu atu le tala lelei ma o lē e aumaia faamāfanafanaga. (Mataio 4:23) Ma o le tala na taʻu atu e Iesu o le tala lelei moni lava! Na ia taʻu atu i lana ʻaufaalogologo e faapea: “O aʻu nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.” (Ioane 8:12) Na ia faapea atu foʻi: “Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.” (Ioane 8:31, 32) Ioe, na iā Iesu ‘upu o le ola e faavavau.’ (Ioane 6:68, 69) O le malamalama, le ola, ma le saʻolotoga—e mautinoa o faamanuiaga nei e matuā faapelepele i ai!

3. O le ā le tala lelei na talaʻia e soo o Iesu?

³ Ina ua mavae le Penetekoso o le 33 T.A., na faaauau pea ona faia e soo le galuega faaevagelia a Iesu. Na latou talaʻia le “tala lelei o le malo” e lē gata i tagata Isaraelu ae faapea foʻi ma tagata o nuu uma. (Mataio 24:14; Galuega 15:7; Roma 1:16) O i latou na tali ane na oo ina latou iloa Ieova le Atua. Na faasaʻolotoina i latou mai le nofo pologa i lotu ma avea o se vaega o le nuu fou faaleagaga, “le Isaraelu o le Atua,” o ona sui o loo iai le faamoemoe e pule e faavavau i le lagi ma lo latou Alii, o Iesu Keriso. (Kalatia 5:1; 6:16; Efeso 3:5-7; Kolose 1:4, 5; Faaaliga 22:5) E mautinoa o ni faamanuiaga tautele na!

Le Faaevagelia i Aso Nei

4. O le ā le auala ua faataunuuina ai le poloaʻiga ia talaʻia le tala lelei i aso nei?

⁴ I aso nei, ua faaauau ona faataunuuina e Kerisiano faauuina, faatasi ai ma le lagolagosua a le “motu o tagata e toatele” o “isi mamoe” ua faatupulaʻia, le poloaʻiga faavaloaga na uluaʻi tuuina atu iā Iesu. (Faaaliga 7:9; Ioane 10:16) O le iʻuga, ua talaʻiina le tala lelei i le mamao e leʻi vaaia muamua lava. I atunuu ma oganuu e 235, ua ō atu ai Molimau a Ieova “e taʻu atu le tala lelei i ē ua agamalu . . . , e fufusi i ē loto momomo, e folafola le saʻolotoga i ē ua ave faatagataotauaina ma le matuā tatalaina o ē ua fusifusia; e folafola le tausaga e talileleia mai ai e Ieova, ma le aso e taui ai ma sui e lo tatou Atua; e faamāfanafana i ē uma o faavauvau.” (Isaia 61:1, 2, NW) O lea, o le galuega faaevagelia a Kerisiano ua faaauau ona aumaia ai faamanuiaga i le toʻatele o tagata ma faamāfanafanaga moni iā i “latou ua maua i se tasi lava puapuaga.”—2 Korinito 1:3, 4.

5. E tusa ai ma le talaʻia o le tala lelei, ua faapefea ona ese Molimau a Ieova mai lotu a Kerisinetoma?

⁵ O le mea moni ua lagolagoina e lotu a Kerisinetoma auala eseese o le faaevagelia. O le tele lava o lotu ua latou auina atu misionare e faia le faaliulotu i isi atunuu. Mo se faaaʻoaʻoga, na lipotia mai e le Orthodox Christian Mission Center Magazine ia le galuega a misionare a le lotu Orthodox i Madagascar, i Aferika i saute, Tanzania, ma Zimbabwe. Peitaʻi i le Lotu Orthodox, e pei foʻi o isi lotu a Kerisinetoma, o le toʻatele lava o tagata lotu e lē o auai i lea galuega. I se faaeseesega, o Molimau a Ieova uma ua tuuina atu, e taumafai malosi e auai i le faaevagelia. E latou te iloa e faapea, o le folafolaina atu o le tala lelei o se faamaoniga lea o le moni aʻiaʻi o lo latou faatuatua. Na faapea mai Paulo: “Auā o le loto e faatuatua ai, e oo mai ai le amiotonu; a o le gutu e taʻutino ai, e oo mai ai le ola.” O le faatuatua e lē o uunaʻia se tasi e faia ni gaoioiga, o le mea moni, o se faatuatua e mate.—Roma 10:10, LF; Iakopo 2:17.

Tala Lelei e Aumaia ai Faamanuiaga e Faavavau

6. O ā tala lelei o loo talaʻia i aso nei?

⁶ Ua talaʻia e Molimau a Ieova tala e silisili ona lelei. E latou te tatalaina a latou Tusi Paia ma faaali iā i latou e faaalia le fiafia faapea na faataulagaina e Iesu lona soifua e avatu ai i tagata le avanoa e faalatalata ai i le Atua, le faamagaloina o agasala, ma le faamoemoe o le ola e faavavau. (Ioane 3:16; 2 Korinito 5:18, 19) Ua latou faasilasila atu e faapea o le Malo o le Atua ua faavaeina nei i le lagi i lalo o le pulega a le Tupu ua faauuina, o Iesu Keriso, ma e lē o toe umi ae tafiesea e lea malo, amioga leaga mai le lalolagi ma faatonutonu le toe faafoʻisiaina mai o le Parataiso. (Faaaliga 11:15; 21:3, 4) I le faataunuuga o le valoaga a Isaia, ua latou logoina ai o latou tuaoi e faapea o nei “le tausaga e talileleia mai ai e Ieova” a o mafai pea e tagata ona tali atu i le tala lelei. Ua latou lapataʻi atu foʻi e faapea ua lē o toe umi ae oo mai “le aso e taui ai ma sui e lo tatou Atua” pe a aumaia e Ieova le iʻuga o tagata e faia mea leaga e lē salamō.—Salamo 37:9-11.

7. O ā mea na tutupu ua faaalia ai le autasi o Molimau a Ieova, ma aiseā ua latou olioli ai i lea autasi?

⁷ I se lalolagi ua faatumulia e mala ma puapuaga, ua na o le pau lenei o le tala lelei o loo iai aogā e faavavau. O i latou e taliaina lea tala lelei ua avea ma vaega o se ʻauuso Kerisiano autasi i le lalolagi atoa, o ē e lē faatagaina tulaga faaleatunuu, o ituaiga, po o tulaga tau i le tamāoaiga e faaeseesea ai i latou. Ua ‘fusia i latou i le alofa, lea e atoatoa ona lelei ai.’ (Kolose 3:14; Ioane 15:12) Na vaaia lenei tulaga i le tausaga ua mavae i se atunuu o Aferika. I se tasi o taeao na faateʻia ai le laumua i le pāpā o fana. O loo faia taumafaiga a se vaega o tagata e aveesea faamalosi le faigāmalo na iai. Ina ua taulaʻi atu mea na tutupu e faatatau i feteenaʻiga o ituaiga, na faitioina ai se aiga Molimau mo le faalalafiina o uso Molimau e ese lo latou ituaiga. Na tali mai le aiga e faapea: “E na o Molimau a Ieova o loo nonofo i lo matou fale.” Iā i latou, e lē tāua le eseese o ituaiga; ae o le alofa faa-Kerisiano—le tuuina atu o faamāfanafanaga iā i latou o loo manaʻomia—e tāua tele. Na faapea mai se faamatalaga a se tauaiga e lē o se Molimau: “O tagata o lotu uma, ua latou toe faalataina o latou lava tagata tapuaʻi. Ae na o Molimau a Ieova lava latou te leʻi faia faapea.” E tele ni mea talitutusa na lipotia mai i atunuu o loo vevesi ai feteenaʻiga a tagata o le atunuu, ua faaalia ai e faapea o Molimau a Ieova e moni lava e “alolofa atu i le au uso.”—1 Peteru 2:17.

Le Tala Lelei ua Suia ai Tagata

8, 9. (a) O ā suiga ua faia e i latou na taliaina le tala lelei? (e) O ā mea na tutupu e faataʻitaʻia ai le malosi o le tala lelei?

⁸ O le tala lelei e iai sona fesootaiga ma le mea na taʻua e Paulo e faapea “i la le olaga nei atoa ma lē atali.” (1 Timoteo 4:8) E lē gata ina ofoina mai ai o se faamoemoe mautinoa ma le matagofie i le lumanaʻi, ae e aumaia ai foʻi faaleleiga o “le olaga i le taimi nei.” (NW) I le avea ai o ni tagata taʻitoʻatasi, ua taʻitaʻia ai Molimau a Ieova e le Afioga a le Atua, le Tusi Paia, ina ia aumaia o latou olaga ia ōgatusa ma le finagalo o le Atua. (Salamo 119:101) Ua faafouina o latou lava uiga faaletagata a o latou atiina aʻe na uiga e pei o le amiotonu ma le faamaoni.—Efeso 4:24.

⁹ Seʻi manatu i le faaaʻoaʻoga a Franco. Na iai sona faafitauli o le ita. Po o le ā lava se mea sesē e tupu, e matuā ita leaga ai lava ma taʻei ai mea. Na suʻesuʻeina e lana avā le Tusi Paia ma Molimau a Ieova, ma o a latou faaaʻoaʻoga faa-Kerisiano na oo ina fesoasoani iā Franco, e iloa ai faapea e tatau ona suia o ia. Na suʻesuʻeina e Franco le Tusi Paia ma i latou ma oo ai ina mafai ona ia faaalia fua o le agaga paia, o le filemu ma le pulea totino. (Kalatia 5:22, 23) O ia o se tasi o le toʻa 492 na papatisoina i Peleseuma a o faagasolo le tausaga faaleauaunaga e 2001. Seʻi manatu foʻi iā Alejandro. Na oo ina matuā puleaina lenā tama talavou e fualaau faasāina, lea na oo ai i se olaga matuā matagā o le taumafai e ola i mea na tiaʻi i le lapisi, ma taumafai foʻi e faatau atu mea na ia aoaoina mai ina ia lagolagoina ai lana masaniga o fualaau faasāina. Ina ua 22 ona tausaga, na valaaulia ai e Molimau a Ieova Alejandro e suʻesuʻeina le Tusi Paia, ma sa ia ioe i ai. Na ia faitauina le Tusi Paia i aso uma ma auai i sauniga faa-Kerisiano. Na vave lava ona ia faamamāina lona olaga, ma a o leʻi atoa le ono masina, ae ua mafai ona ia auai i le galuega faaevagelia—o se tasi o le toʻa 10,115 na faia faapea i le tausaga ua teʻa i Panamā.

Le Tala Lelei—Se Faamanuiaga i Ē Agamalu

10. O ai o loo tali atu i le tala lelei, ma ua faapefea ona suia la latou vaaiga i mea?

¹⁰ Na valoia e Isaia faapea o le a talaʻia le tala lelei i ē agamalu. O ai i latou nei e agamalu? O i latou ia ua faamatalaina i le tusi o Galuega o ‘e ua saunia mo le ola e faavavau.’ (Galuega 13:48) O i latou o tagata lotomaulalo mai so o se tulaga o le soifuaga faaletagata o ē ua tali atu i le feʻau o le upu moni. O i latou na ua aʻoaʻoina faapea o le faia o le finagalo o le Atua, o le a aumaia ai faamanuiaga e matuā sili atu na i lo so o se mea e ofoina mai e le lalolagi. (1 Ioane 2:15-17) E faapefea la ona pāʻia e Molimau a Ieova loto o tagata i la latou galuega faaevagelia?

11. E tusa ai ma Paulo, e faapefea ona talaʻia le tala lelei?

¹¹ Ia, seʻi manatu i le faaaʻoaʻoga a le aposetolo o Paulo, o lē na tusi atu i tagata Korinito e faapea: “Ou te leʻi alu atu ma le sili o le upu ma le poto, ina ua ou alu atu ia te outou i loʻu talaʻi atu ia te outou le mau a le Atua. Auā na tonu loʻu manatu, ia ou le iloa se tasi mea a o ou i ai ia te outou, a e tau lava o Iesu Keriso, o ia lava na faasatauroina.” (1 Korinito 2:1, 2, LF ) Sa leʻi taumafai Paulo e faaofo lana ʻaufaalogologo i lona poto. Sa leʻi aʻoaʻoina e Paulo se isi mea e ese, ae o mea moni ua faamautinoaina tauatua, o mea moni ua tusia i aso nei i le Tusi Paia. Seʻi mātau foʻi ia faalaeiauga a Paulo i lona uso faievagelia o Timoteo e faapea: “Ia e talaʻi atu le upu, ia e faamalosi.” (2 Timoteo 4:2) Sa tatau ona talaʻi e Timoteo “le upu,” o le feʻau a le Atua. Na tusi atu foʻi Paulo iā Timoteo e faapea: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te talaʻitonuina le upu moni.”—2 Timoteo 2:15, LF.

12. Ua faapefea ona utagia e Molimau a Ieova i aso nei upu ma faaaʻoaʻoga a Paulo?

¹² E utagia e Molimau a Ieova le faaaʻoaʻoga a Paulo, faapea ai ma ana upu iā Timoteo. E latou te iloaina le malosi o loo i le Afioga a le Atua ma taumafai e faaaogā tatau, a o latou taumafai e faaalia i o latou tuaoi upu e talafeagai lelei o le faamoemoe ma faamāfanafanaga. (Salamo 119:52; 2 Timoteo 3:16, 17; Eperu 4:12) E moni, latou te faaaogāina tatau lomiga faale-Tusi Paia ina ia mafai ai ona mauaina atili e i latou o loo faaalia le fiafia, le poto faale-Tusi Paia i taimi latou te avanoa lelei ai. Ae latou te taumafai pea e faaali i tagata ia upu o le Tusi Paia. E latou te iloa faapea o le a uunaʻia e le Afioga faagaeeina a le Atua loto o i latou e lotomaulalo. Ma o le faaaogāina o lenei auala e faamalosia ai foʻi lo latou lava faatuatua.

“Faamāfanafana i Ē Uma o Faavauvau”

13. I le tausaga e 2001, o ā mea na tutupu na faateleina ai le manaʻoga mo le tuuina atu o faamāfanafanaga iā i latou o loo faavauvau?

¹³ Na matuā anoanoaʻi mala na tutupu i le tausaga e 2001, ma o le iʻuga, o le toʻatele o tagata taʻitoʻatasi na manaʻomia ona faamāfanafanaina. Na vaaia iā Setema i le tausaga na teʻa nei se faataʻitaʻiga matilatila i le Iunaite Setete, i le osofaʻiga a le ʻaufaatupu faalavelave i le Nofoaga o Fefaatauaʻiga a le Lalolagi (World Trade Centre) i Niu Ioka ma le Pentagon e latalata i Washington, D.C. Pagā se faateʻia ai o le atunuu atoa i na osofaʻiga! I na mea na tutupu, ua taumafai ai Molimau a Ieova e faataunuuina lo latou tofiga o le ofoina atu o ‘faamāfanafanaga i ē uma o faavauvau.’ O nai mea na tutupu o le a faataʻitaʻia ai le auala na latou faia ai lenei mea.

14, 15. I mea eseese e lua na tutupu, na faapefea ona faaaogāina ma le uigā e Molimau le Tusi Paia e faamāfanafana ai i ē ua faavauvau?

¹⁴ Na faalatalata atu se Molimau, o se faievagelia faataimi atoa i se tamaʻitaʻi i le auala e savavali ai, ma fesili atu po o le ā sona manatu e faatatau i le osofaʻiga a tagata faatupu faalavelave lea na tupu talu ai nei. Na amata ona tagi le tamaʻitaʻi. Na ia faapea mai na ia lagonaina le faanoanoa ma sa ia moomoo e fia fesoasoani atu po o le ā lava le auala e mafai ai. Na taʻu atu e le Molimau iā te ia faapea o loo manatu mai tele le Atua iā i tatou uma, ona ia faitau lea o le Isaia 61:1, 2. Sa foliga e talafeagai nei upu faagaeeina i le tamaʻitaʻi, o lē na taʻua faapea o loo faavauvau tagata uma. Na ia talia le sāvali ma fai atu i le Molimau e asiasi atu iā te ia i lona fale.

¹⁵ E toʻalua ni Molimau na auai i le galuega faaevagelia sa feiloaʻi atu i se tamāloa o loo galue i lona fale e teu ai ana mea faigaluega. Na la ofo atu e faaali iā te ia upu o faamāfanafanaga mai le Tusi Paia, e tusa ai ma le mala na tupu talu ai nei i le Nofoaga o Fefaatauaʻiga a le Lalolagi. Ina ua malie i ai le tamāloa ona la faitauina lea o le 2 Korinito 1:3-7, lea e aofia ai upu nei: ‘Ua . . . tele le faamafanafanaina o i matou e Keriso.’ Sa lotofaafetai le tamāloa ona o loo tufaina atu e ona tuaoi Molimau se mea e faamāfanafanaina ai isi ma na ia faapea mai: “Ia faamanuia le Atua i le galuega matagofie o loo oulua faia.”

16, 17. O ā mea e lua na tutupu e faaalia ai le malosi o le Tusi Paia e fesoasoani ai i tagata taʻitoʻatasi o ē ua faanoanoa po ua faaatuatuvaleina ona o mala?

¹⁶ Na toe asiasi atu se Molimau i tagata na faaalia le fiafia ma feiloaʻi ai i le tama tama a se fafine na faaalia muamua le fiafia ma na faamatalaina e le Molimau e faapea sa ia popole e faatatau i le tulaga o tuaoi o loo iai ina ua mavae le mala talu ai nei. Na maofa le alii i le faaaluina e le Molimau o lona taimi e asiasi atu ai i tagata ma fia iloaina lo latou tulaga o loo iai. Na ia taʻua e faapea sa ia faigaluega e latalata lava i le Nofoaga o Fefaatauaʻiga a le Lalolagi ina ua tupu le osofaʻiga, ma sa ia vaai i le mea atoa lava na tupu. Ina ua ia fesili pe aiseā ua faatagaina ai e le Atua puapuaga, ona faitauina lea e le Molimau fuaiupu mai le Tusi Paia, e aofia ai le Salamo 37:39, lea e faapea mai: “O loo mai ia Ieova le faaolataga o e amiotonu; o ia lava lo latou malosi i ona po o le puapuaga.” Na fesili atu ma le agalelei le alii po o faapefea mai le Molimau ma lona aiga, ma sa ia valaaulia o ia e toe asiasi atu, ma faaalia le lotofaafetai mo le asiasiga.

¹⁷ O le isi o le faitau afe o tagata faavauvau na faamāfanafanaina e Molimau a Ieova i aso na sosoo ai ma le osofaʻiga a tagata faatupu faalavelave, o se tamaʻitaʻi sa feiloaʻi atu i ai ni Molimau a o asiasi atu i o la tuaoi. Na matuā mafatia lava o ia i le mea na tupu ma faalogologo ai a o la faitauina le Salamo 72:12-14: “E laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva. E laveai o ia ia i latou ai le saua ma le faamalo; e silisili foi o latou toto i lona manatu.” Maʻeu le uigā o na upu! Na faapea atu le tamaʻitaʻi i Molimau e toe faitau atu fuaiupu ma valaaulia i laʻua i totonu o lona fale e faaauau ai le talanoaga. E oo ane i le iʻuga o le talanoaga, ua amata se suʻesuʻega faale-Tusi Paia.

18. Na faapefea ona fesoasoani se Molimau i ona tuaoi ina ua valaaulia o ia e faia sa latou tatalo?

¹⁸ O se tasi o Molimau e faigaluega i se faleʻaiga i se vaipanoa o tagata mauʻoa, lea sa leʻi tele ai se naunau na latou faaalia muamua mai i le tala lelei o le Malo. Ina ua mavae le osofaʻiga a tagata faatupu faalavelave, na foliga mai ua lē mautonu tagata i lea vaipanoa. I le Aso Faraile i le afiafi ina ua mavae atu le osofaʻiga, na valaaulia ai e le pule o le faleʻaiga tagata uma e ō i fafo ma uuina molīgaʻo, ma manatunatu lē leoa ai mo sina taimi mo i latou ua maliliu. O le amanaʻiaina o o latou faalogona, na alu ai i fafo le Molimau ma tū filemu ai i le auala e savavali ai. Na iloa e le pule o ia o se faifeʻau Molimau a Ieova, o lea ina ua uma le taimi o manatunatuga lē leoa, ona faapea atu lea o le pule iā te ia e fai e ia sa latou tatalo. Na malie i ai le Molimau. I lana tatalo, na ia taʻua ai le tele o le faavauvau ua iai ae na ia taʻua e faapea o i latou o loo faavauvau e lē manaʻomia ona faanoanoa pei e leai se faamoemoe. Na ia taʻua le taimi o le a lē toe tutupu ai na mea mataʻutia, ma e mafai ona faalatalata uma atu tagata i le Atua o faamāfanafanaga e ala i le poto saʻo mai le Tusi Paia. Ina ua “Amene” le tatalo, ona alu ane lea o le pule—sosoo ane ai ma le silia i le 60 tagata na i fafo o le faleʻaiga—ma ia faafetai atu i le Molimau, ma opo o ia, ma faapea atu o se tatalo aupito sili lea ua ia faalogo i ai.

Se Faamanuiaga i Tagata o le Oganuu

19. O le ā le mea na tupu e faataʻitaʻia ai faapea e amanaʻiaina e nisi tapulaa maualuluga a Molimau a Ieova?

¹⁹ Aemaise lava i aso nei, ua maua e oganuu ia o loo galulue tiotio ai Molimau a Ieova aogā i lo latou iai i na oganuu—e pei ona taʻua ai e le toʻatele. Ioe, o tagata e faatupuina le filemu, e faamaoni ma mamā tau amio, e mautinoa o se uunaʻiga lelei. I se tasi o atunuu i Asia Tutotonu, na feiloaʻi ai Molimau ma se tagata ua litaea sa faigaluega muamua i le faalapotopotoga tau i le saogalemu a le malo. Na ia faapea mai sa iai se taimi na tofia ai o ia e suʻesuʻeina faalapotopotoga o lotu eseese. Ina ua ia iloiloina Molimau a Ieova, sa faafiafiaina o ia i lo latou faamaoni ma amioga lelei. Na fiafia foʻi o ia i le maumauaʻi i lo latou faatuatua ma le mea moni faapea o a latou aʻoaʻoga e faavae i le Tusi Paia. Na taliaina e lenei tamāloa se suʻesuʻega faale-Tusi Paia.

20. (a) O le ā ua faaalia e galuega na lipotia mai e Molimau a Ieova i le tausaga ua teʻa? (e) O le ā ua faaalia ai faapea o loo tele pea galuega e ao ona faia, ma e faapefea ona tatou vaai i lo tatou faaeaga o le faievagelia?

²⁰ O nai mea na tutupu o loo taʻua i lenei mataupu, e mai le faitau afe o mea e mafai ona taʻuina atu, e manino mai ai faapea na matuā pisi Molimau a Ieova a o faagasolo le tausaga faaleauaunaga o le 2001.a Na latou talanoa ma le faitau miliona o tagata, na latou faamāfanafana i le toʻatele na faavauvau, ma na aumaia ai iʻuga lelei i la latou galuega faaevagelia. E 263,431 i latou na faaalia lo latou tuuina atu i le Atua e ala i le papatisoga. I le lalolagi atoa, na faateleina le aofaʻi o le ʻaufaievagelia i le 1.7 pasene. Ma o le mea moni e faapea o le 15,374,986 na auai i le Faamanatuga faaletausaga o le maliu o Iesu, ua faailoa ai faapea o loo tele pea galuega e ao ona faia. (1 Korinito 11:23-26) Seʻi o tatou faaauau pea ona sailia ē agamalu o loo tali mai i le tala lelei. Ma po o le ā lava le umi e faaauau ai le tausaga e talileleia mai ai e Ieova, seʻi o tatou faaauau pea ona faamāfanafana iā i latou ʻe loto momomo.’ Maʻeu se galuega faamalieloto ua iā i tatou! E mautinoa e tatou te ioe faatasi uma i upu a Isaia: “Ou te matuā fiafia ia Ieova, e olioli loʻu loto i loʻu Atua.” (Isaia 61:10) Tau ina ia faaauau pea ona faaaogā i tatou e le Atua a o ia faataunuuina nei upu faavaloaga: ‘E faatupuina e le Alii o Ieova o le amiotonu ma le viiga i luma o nuu uma.’—Isaia 61:11.

[Faamatalaga pito i lalo]

Pe E te Manatua?

• Na faapefea ona maua e i latou e agamalu faamanuiaga o le tala lelei na talaʻia e Iesu?

• O ā faamanuiaga na mauaina e i latou na tali atu i le galuega faaevagelia a soo o Iesu i le uluaʻi senituri?

• Ua faapefea ona faamanuiaina i latou ua taliaina le tala lelei i aso nei?

• E faapefea ona tatou vaai i lo tatou faaeaga o le avea ma faievagelia?

[Siata i le itulau 19-22]

LIPOTI O LE TAUSAGA FAALEAUAUNAGA O LE 2001 A MOLIMAU A IEOVA I LE LALOLAGI AOAO

(Tagaʻi i le lomiga)

[Ata i le itulau 15]

E manatua pea e Molimau a Ieova lo latou tiute tauave o le faievagelia

[Ata i le itulau 17]

O i latou e tali atu i le tala lelei ua avea ma vaega o se ʻauuso autasi, i le lalolagi atoa