E Aveesea le Pōuliuli e le Malamalama Mai le Atua!
“E faamalamalamaina foi e Ieova loʻu pouliuli.”—2 SAMUELU 22:29.
1. E faapefea ona fesootaʻi atu le malamalama i le ola?
“UA FETALAI atu le Atua e faapea: “Ia malamalama; ona malamalama ai lea.” (Kenese 1:3) I na upu tāua, ua faailoa mai ai e faamaumauga o le foafoaga i le Kenese e faapea, o Ieova o le puna o le malamalama, ma afai e leai se malamalama, o le a lē mafai foʻi ona iai se ola i luga o le lalolagi. O Ieova o ia foʻi o le puna o le malamalama faaleagaga, lea e tāua tele mo le taʻitaʻiina ai o o tatou olaga. (Salamo 43:3) Na faaalia e le tupu o Tavita le fesootaʻiga vavalalata i le malamalama faaleagaga ma le ola, ina ua ia tusi e faapea: “O loo ia te oe le puna o le ola; o lou malamalama matou te iloa ai le malamalama.”—Salamo 36:9.
2. O le ā o loo fesootaʻi vavalalata atu i le malamalama e pei ona faaalia e Paulo?
2 Pe tusa ma le 1,000 tausaga talu ona mavae atu taimi o Tavita, na faasino atu ai le aposetolo o Paulo i faamaumauga o le foafoaga. Sa ia faapea atu ina ua ia tusi i le faapotopotoga Kerisiano i Korinito: “O le Atua o le na fai atu ‘ia pupula mai le malamalama mai le pouliuli.’” Ona faaali atu lea e Paulo faapea o le malamalama faaleagaga o loo fesootaʻi vavalalata atu i le poto mai iā Ieova, ina ua ia faaopoopo mai: “Ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.” (2 Korinito 4:6) E faapefea ona oo mai iā i tatou lenei malamalama?
Le Tusi Paia—Le Ala o le Malamalama
3. O le ā le malamalama ua saunia e Ieova e ala mai i le Tusi Paia?
3 O le auala autū ua faaooina mai ai e Ieova le malamalama faaleagaga, e ala mai lea i lana Afioga faagaeeina, le Tusi Paia. O lea a o tatou suʻesuʻeina le Tusi Paia ma ave i fale le poto mai le Atua, ua tatou faatagaina ai lona malamalama e susulu mai iā i tatou. E ala mai i le Tusi Paia, ua faasusulu mai ai e Ieova le malamalama i ana fuafuaga, ma taʻu mai iā i tatou le auala e faia ai lona finagalo. Ua aumaia e lenei mea se fuafuaga i o tatou olaga ma fesoasoani ai e faamalieina o tatou manaʻoga faaleagaga. (Failauga 12:1; Mataio 5:3) Na faamamafa mai e Iesu faapea e tatau ona tatou tausia o tatou manaʻoga faaleagaga, ina ua ia siiina mai le Tulafono a Mose, na ia taʻua ai e faapea: “Ua tusia, E le na o mea e ʻai e ola ai le tagata, a o afioga uma e tulei mai i le fofoga o le Atua.”—Mataio 4:4; Teuteronome 8:3.
4. O le ā le auala ua avea ai Iesu o “le malamalama o le lalolagi”?
4 Ua fesootaʻi vavalalata Iesu ma le malamalama faaleagaga. Ioe, na ia fetalai mai o ia lava o “le malamalama o le lalolagi” ma faapea mai: “O lē mulimuli mai ia te au, e le savali o ia i le pouliuli, a e ia te ia le malamalama o le ola.” (Ioane 8:12) Ua fesoasoani lenei faaupuga iā i tatou e malamalama ai i le matafaioi autū o loo iā Iesu i le faaooina mai o upu moni a Ieova i tagata. Ina ia tatou ʻalofia le pouliuli ma savavali i le malamalama o le Atua, e tatau ona tatou faalogo atu i mea uma ua fetalai mai ai Iesu, ma mulimulituʻi i ana faaaʻoaʻoga ma aʻoaʻoga e pei ona tusia i le Tusi Paia.
5. O le ā le tiute tauave na iai i soo o Iesu ina ua mavae lona maliu?
5 I nai aso a o leʻi oo i lona maliu, sa toe faasino atu ai Iesu iā te ia lava, o le malamalama, ma taʻu atu i ona soo e faapea: “E toe itiiti nai aso e i ai ia te outou le malamalama; savavali ia manū o ia te outou le malamalama, neʻi maua outou e le pogisa; o lē savali i le pogisa e le iloa e ia le mea e alu i ai. Ia outou talia le malamalama, manū o ia te outou le malamalama, ina ia avea o outou ma fanau a le malamalama.” (Ioane 12:35, 36) O i latou na avea ma fanau a le malamalama na aʻoaʻoina “matua o upu e ola ai.” (2 Timoteo 1:13, 14) Ona latou faaaogāina lea o nei upu e ola ai e tataʻi ese mai ai isi tagata lotofaamaoni mai le pōuliuli i le malamalama o le Atua.
6. O ā upu moni tāua e faatatau i le malamalama ma le pōuliuli ua tatou iloaina mai i le 1 Ioane 1:5?
6 Na tusi le aposetolo o Ioane e faapea: “O le malamalama lava le Atua, a e leai lava se pouliuli o ia te ia.” (1 Ioane 1:5) Mātau le eseesega i inei o le malamalama ma le pōuliuli. O le malamalama faaleagaga e sau mai iā Ieova, ma e lē mafai ai ona fesootaʻi atu iā te ia le pōuliuli faaleagaga. O ai la le puna o le pōuliuli?
Le Puna o le Pōuliuli Faaleagaga
7. O ai o loo māfua ai le pōuliuli faaleagaga o le lalolagi, ma o ā taaʻiga o loo ia faia?
7 Na tautala le aposetolo o Paulo e faatatau i “le atua o le lalolagi nei.” E tusa ai o lenā faaupuga, na uiga atu o ia iā Satani le Tiapolo. Na faaauau ona ia taʻua e faapea o ia lea “ua faatauasoina manatu o i latou o e le talitonu . . . ina neʻi pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.” (2 Korinito 4:4, LT) O le toʻatele ua faapea mai e talitonu i le Atua; peitaʻi, ua faateleina le aofaʻi o i latou e lē talitonu i le Tiapolo. Aiseā? E latou te lē fia taliaina le tulaga faapea atonu o loo iai moni se mana leaga e sili aʻe i lo le tagata, o loo taaina le auala o loo latou mafaufau ai. E ui i lea, e pei ona faaalia e Paulo, o loo iai moni lava le Tiapolo, ma o loo ia taaʻina tagata ina ia latou lē iloa le malamalama o le upu moni. O le malosi o Satani e taaʻina ai mafaufauga o tagata, ua faaalia lea i le auala o loo faamatalaina ai o ia faavaloaga faapea o “lē faasese i le lalolagi uma.” (Faaaliga 12:9) O le iʻuga la o gaoioiga a Satani, ua faatatau atu ai tulaga ia na valoia e le perofeta o Isaia i tagata uma lava, seʻi vaganā ai i latou o loo auauna iā Ieova lea o loo faapea mai: “Faauta mai, e ufitia le lalolagi i le pouliuli, e ufitia foi nuu i le pogisa.”—Isaia 60:2.
8. O ā auala ua faaalia ai le fesēaʻi o i latou o loo i le pōuliuli faaleagaga
8 A oo ina pōuliuli, e faigatā lava ona iloa se mea. E faigofie lava ona lē iloa le mea e te alu i ai po o le fesēaʻi foʻi. I se tulaga tutusa, o i latou o loo i le pogisa faaleagaga ua leai se faautaga poto, ma e lē umi ae oo ina fesēaʻi i le itu faaleagaga. E mafai ona mou atu le tomai e faaeseese ai le mea moni mai mea pepelo, ma le lelei mai le leaga. Na tautala le perofeta o Isaia iā i latou o loo i lea pogisa ina ua ia tusi e faapea: “Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama; o e fai ma mea suamalie le mea oona, a e fai ma mea oona le mea suamalie.” (Isaia 5:20) O i latou o loo iai i le pōuliuli faaleagaga ua taaʻina i latou e le atua o le pōuliuli, o Satani le Tiapolo, ma ua oo ai ina vavae ese mai i le puna o le malamalama ma le ola.—Efeso 4:17-19.
Le Luʻi o le Alu Ese Mai le Pōuliuli i le Malamalama
9. Faamatala le auala ua tosina atu ai le tagata faimea sesē i le pōuliuli i se uiga faaletino ma le faaleagaga.
9 Na faasino mai e le tagata faamaoni o Iopu le tosina atu o tagata fai mea sesē i le pōuliuli faaletino ina ua ia faapea mai: “Ua faatalitali foi le tagata mulilua i le segisegi, o loo faapea ifo, E le iloa aʻu e se tasi; ua ia ufiufi foi ona mata.” (Iopu 24:15) O tagata fai mea sesē ua iai foʻi i le pogisa faaleagaga, ma o lenā pogisa e mafai ona matuā malosi tele. Na taʻua e le aposetolo o Paulo e faapea, o amioga lē mamā faaleituaiga, o le gaoi, matapeʻapeʻa, onā, agatele, ma le faomea, sa masani ai i latou na maileia i lenā pogisa. Peitaʻi o se tasi ua sau i le malamalama o le Afioga a le Atua e mafai ona suia. Ua faamanino mai e Paulo i lana tusi i Korinito e mafai ona faia lenā suiga. O le toʻatele o Kerisiano i Korinito sa masani ona faia amioga a le pōuliuli, peitaʻi na taʻu atu e Paulo iā i latou e faapea: “A ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu Keriso, i le Agaga foi o lo tatou Atua.”—1 Korinito 6:9-11.
10, 11. Na faapefea ona faaalia e Iesu le magafagafa mo le tamāloa lea na ia faamālōlōina lana vaai? (e) Aiseā ua lē filifilia ai e le toʻatele le malamalama?
10 Pe a alu ese se tagata mai le pōuliuli tele i le malamalama, e ono manaʻomia sina taimi e faamasani atu ai ona mata i le malamalama. I Petesaita, na faamālōlō ai e Iesu se tamāloa tauaso ae na faia ma le agalelei i se auala faasolosolo. “Ona tago atu lea o ia i le lima o le tauaso, ua taʻitaʻi ane ia te ia i tua o le aai. Ua feanu foi ia i ona mata, ona faaee lea e ia o ona aao i luga ia te ia, ua fesili atu i ai, po ua na iloa se mea. Ua tepa ae o ia, ona fai mai lea o ia, ‘Ua ou iloa atu tagata ua faapei o laau, o loo savavali.’ Ona toe faaee atu lea e ia o ona aao i ona mata; ua pupula o ia, ona toe lelei lea o ia, ua na iloa lelei foi o mea uma.” (Mareko 8:23-25, LF) E manino mai, na faasolosolo ona faamālōlō e Iesu le vaai a le tamāloa ina ia mafai ai ona ia faamasani atu i le malosi o le susulu o le lā. E mafai ona tatou faaata i o tatou mafaufau le olioli tele na iai i lenā tamāloa ina ua ia mafai ona vaai.
11 Peitaʻi, o le olioli lea na lagonaina e lenā tamāloa na sili atu ai le olioli o i latou na faia i ai ni fesoasoani e ō ese faasolosolo ai mai le pogisa faaleagaga, i le malamalama o le upu moni. Pe a tatou vaai i lo latou olioli, atonu tatou te tau mānatu ai i le māfuaaga ua lē tosina mai ai nisi tagata e toʻatele i le malamalama. Ua taʻu mai e Iesu le māfuaaga: “O le faamasinoga foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio. Auā o i latou uma o e fai mea leaga e ʻinoʻino i latou i le malamalama, e le o mai foi i le malamalama, neʻi faailoa a latou amio.” (Ioane 3:19, 20, LF) Ioe, o le toʻatele e fiafia e fai “mea leaga”—e pei o amioga lē mamā, sauā, pepelo, faaʻoleʻole, ma le gaoi—ma o le pogisa faaleagaga a Satani o se siʻomaga lea ua fetaui lelei mo i latou e faia ai mea e latou te mananaʻo e fai.
Faia o se Agaʻigaʻi i Luma i le Malamalama
12. O ā auala ua tatou maua ai aogā i le ō mai i le malamalama?
12 Talu ai o lea ua tatou mauaina le poto e faatatau i le malamalama, o ā ni suiga ua mafai ona tatou faia? E lelei i nisi taimi ona toe tepa i tua ma iloilo le agaʻigaʻi i luma faaleagaga ua tatou faia. O ā masaniga leaga ua tatou lafoaʻia? O ā faafitauli i o tatou olaga ua mafai ona tatou faaleleia? Ua faapefea ona suia a tatou fuafuaga mo le lumanaʻi? E ala i le malosi o Ieova faatasi ai ma le fesoasoani a lona agaga paia, ua mafai ai ona faaauau pea ona tatou faia suiga i o tatou uiga faaletagata ma le auala o loo tatou mafaufau ai, lea o le a faaalia ai o loo tatou tali atu i le malamalama. (Efeso 4:23, 24) Ua faaupu faapea e Paulo: “Sa outou pouliuli anamua, a o lenei ua outou malamalama i le Alii; ina savavali ia pei o e ua malamalama; (auā o le fua o le malamalama, o le agalelei uma lava lea, ma le amiotonu, ma le faamaoni).” (Efeso 5:8, 9, LF) O le faatagaina o i tatou e taʻitaʻia e le malamalama o Ieova, e aumaia ai iā i tatou le faamoemoe ma se fuafuaga, faatasi ai ma le fiafiaga i olaga o i latou o loo tatou faatasi. Maʻeu le olioli o le a aumaia ai i le finagalo o Ieova i lo tatou faia o na suiga!—Faataoto 27:11.
13. E faapefea ona tatou faaalia lo tatou lotofaafetai mo le malamalama o Ieova, ma o le ā e manaʻomia ina ia faia ai faapea?
13 Ua faaalia lo tatou lotofaafetai i le olaga e sili atu le fiafia o loo tatou maua e ala i le faaali atu o le malamalama o Ieova—le tufa atu o mea ua tatou aʻoaʻoina mai le Tusi Paia i tagata o o tatou aiga, uō, ma tuaoi. (Mataio 5:12-16; 24:14) O i latou e mumusu e faalogo mai, ua avea la tatou talaʻiga faatasi ai ma faaaʻoaʻoga lelei o o tatou olaga faa-Kerisiano ma aʻoaʻiga iā i latou. Ua faamatala e Paulo e faapea: “Ia suesue outou pe se a se mea e fiafia i ai le Alii. Aua foi tou te amio faatasi ma galuega le aoga a le pouliuli, a e lelei ona outou aoai atu.” (Efeso 5:10, 11, LT) O le fesoasoani atu i isi e lafoaʻi le pōuliuli ae filifili le malamalama e manaʻomia ai lo tatou lototetele. Ae e sili atu ona tāua, e manaʻomia le alofa ma le manatu mamafa mo isi ma se manaʻoga moni e tufa atu le malamalama o le upu moni iā i latou mo lo latou mauaina o aogā e faavavau.—Mataio 28:19, 20.
Ia Faaeteete i Malamalama Taufaasesē!
14. E tusa ai ma le malamalama, o ā lapataʻiga e tatau ona tatou utagiaina?
14 O i latou o loo folau i le vasa i itula pogisa, o se vaaiga e olioli tele ai le vaaia o se malamalama. I aso ua mavae, sa faaola ai afi i luga o papa maualuluga o Egelani, e faailoa ai le mea e maua ai se lafitaga mai i matagi. Sa lagona e le ʻauvaa le lotofaafetai ona ua taʻitaʻia ma le saogalemu e le malamalama mai i nei afi agaʻi i taulaga e malupuipuia ai. E ui i lea, o nisi afi e taufaasesē. Na i lo le taunuu lelei i se taulaga, na faasesēina le tele o vaa ma tuʻia ai i papa o le matafaga, ma na gaoia ai a latou uta. I lenei lalolagi taufaasesē, e tatau ona tatou faaeteete ia aua neʻi tosina atu i malamalama taufaasesē lea e mafai ona maileia ai i tatou ma faavaatuʻia ai faaleagaga. Ua taʻu mai iā i tatou e faapea: “O Satani lava, ua liua o ia e ia ma agelu o le malamalama.” E faapena foʻi i ana auauna, e aofia ai aposetate, o se “au faigaluega ʻoleʻole” o ē ‘liua e peiseai o auauna a le amiotonu i latou.ʼ Afai e tatou te mafaufau i manatu sesē a i latou na, e mafai ona faavaivaia ai lo tatou mautinoa i upu moni o i le Afioga a Ieova, le Tusi Paia, ma mafai ai ona mate lo tatou faatuatua.—2 Korinito 11:13-15; 1 Timoteo 1:19.
15. O le ā o le a fesoasoani iā i tatou e tumau ai i le ala e tau atu i le ola?
15 Na tusi le faisalamo e faapea: “O lau afioga o le sulu lea i oʻu vae, ma le malamalama i loʻu ala.” (Salamo 119:105) Ioe, o le ‘ala lauitiiti e tau atu i le ola’ o loo manino le faamalamalamaina e lo tatou Atua alofa o Ieova, “o lē finagalo ina ia faaolaina o tagata uma lava, ma ia oo ina iloa lelei le upu moni.” (Mataio 7:14; 1 Timoteo 2:4) O le faatatauina o mataupu silisili faale-Tusi Paia o le a puipuia ai i tatou i le sē ese mai i lenā ala lauitiiti ae ō atu i ala o le pōuliuli. Na tusi Paulo e faapea: “O tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu.” (2 Timoteo 3:16) A o tatou tutupu aʻe faaleagaga, ua aʻoaʻoina i tatou i le Afioga a le Atua. E mafai e le malamalama o le Afioga a le Atua ona tatou aʻoaʻia ai i tatou lava, ae afai e manaʻomia, e mafai ona aʻoaʻia ai i tatou e leoleo mamoe alolofa i le faapotopotoga. I se tulaga tutusa, e mafai foʻi ona tatou faasaʻoina ai mea ma taliaina ma le lotomaulalo aʻoaʻiga i le amiotonu, ina ia tatou savavali ai pea i le ala o le ola.
Savali i le Malamalama ma le Lotofaafetai
16. E mafai faapefea ona tatou faaalia le lotofaafetai mo le sauniuniga matagofie a Ieova o le malamalama?
16 E mafai faapefea ona tatou faaalia le lotofaafetai mo le sauniuniga matagofie a Ieova o le malamalama? Ua taʻu mai iā i tatou i le mataupu e 9 o le Ioane e faapea ina ua faamālōlōina e Iesu se tamāloa na fanau mai o tauaso, na uunaʻia le tamāloa e faaalia lona lotofaafetai. E faapefea? Na ia faatuatua iā Iesu o le Alo o le Atua, ma faailoaina Iesu i le lautele, o ia o “le perofeta.” E lē gata i lea, na ia tautala atu ma le lototele iā i latou na latou taʻu faatauvaaina vavega a Iesu. (Ioane 9:17, 30-34) Na taʻua e Peteru le vaega faauuina o le faapotopotoga Kerisiano, o “le nuu na faatauina mai.” Aiseā? Ona sa iā i latou le uiga lava lea e tasi o le lotofaafetai e pei o le tamāloa lea na fanau mai o tauaso ma na faamālōlōina. Na latou faaalia le lotofaafetai mo Ieova, o Lē e Agalelei iā i latou, e ala i le ‘taʻutaʻu atu o ona lelei na ia valaau ia te i latou nai le pouliuli e oo i lona lava malamalama e matuā ofo ai.’ (1 Peteru 2:9 (LT); Kolose 1:13) O i latou o loo iai le faamoemoe faalelalolagi ua iai foʻi le agaga faafetai e tasi, ma ua latou lagolagoina o latou uso faauuina i le folafolaina atu i le lautele o “lelei” o Ieova. Maʻeu se avanoa e lē mafaatusalia ua tuuina atu e le Atua i tagata lē lelei atoatoa!
17, 18. (a) O le ā le matafaioi a tagata taʻitoʻatasi? (e) I le faataʻitaʻi atu iā Timoteo, o le ā o loo faalaeiauina Kerisiano taʻitoʻatasi e ʻalofia?
17 O le iai o se lotofaafetai mo le malamalama o le upu moni e tāua tele. Manatua, e leai se tasi o i tatou na fanau mai ua iloa le upu moni. O nisi na aʻoaʻoina ua matutua, ma na vave lava ona latou iloa le sili aʻe o le malamalama i le pōuliuli. O isi ua iā i latou se faaeaga tele o le tausia aʻe e mātua e matataʻu i le Atua. Mo i latou na, e faigofie lava ona latou lē manatu mamafa i le malamalama. Sa iai se tasi o Molimau na auauna ona mātua iā Ieova a o leʻi fanau mai na ia taʻutino mai faapea, na tele sona taimi ma ni taumafaiga na fai, ina ia malamalama atoatoa ai i le tāua o upu moni na aʻoaʻoina ai o ia a o laʻitiiti. (2 Timoteo 3:15) Pe talavou pe matutua, e manaʻomia e i tatou taʻitoʻatasi ona atiina aʻe se lotofaafetai tele mo upu moni ua faailoa mai e Ieova.
18 Na aʻoaʻoina le alii talavou o Timoteo i le “tusi paia” mai lava i lona tamaitiiti, ae o le faamalosi i lana faiva na mafai ai ona ia mauaina le taʻumatuaina i le avea o se Kerisiano. (2 Timoteo 3:15) O lea na agavaa ai o ia e fesoasoani i le aposetolo o Paulo, o lē na timaʻia o ia: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te talaʻitonuina le upu moni.” Seʻi o tatou pei uma o Timoteo, i le ʻalofiaina o le faia o se mea e ono faamāina ai i tatou—po o le faalumaina ai foʻi o Ieova ona o i tatou!—2 Timoteo 2:15, LF.
19. (a) I le pei o Tavita, o le ā le faamatalaga ua talafeagai ona tatou faia? (e) O le ā o le a talanoaina i le mataupu o loo sosoo mai?
19 Ua iā i tatou māfuaaga lelei uma e vivii atu ai iā Ieova, o lē na foaʻi mai iā i tatou le malamalama o lana upu moni. I le pei o le tupu o Tavita, ua tatou faapea atu ai: “O oe lava Ieova e, o loʻu lamepa; e faamalamalamaina foi e Ieova loʻu pouliuli.” (2 Samuelu 22:29) Peitaʻi, ua uunaʻia i tatou ia aua neʻi nofoaʻi, ona e mafai e lenei tulaga ona taʻitaʻia atu ai i lo tatou toe foʻi atu i tua i le pōuliuli lea na faasaoina mai ai i tatou. O lea, o le mataupu o loo sosoo mai ai o le a fesoasoani iā i tatou e fuafua ai le faatāuaina o loo tatou tuuina atu i upu moni mai le Atua i o tatou olaga.
O le ā ua E Aʻoaʻoina?
• Ua faapefea ona saunia e Ieova le malamalamaga faaleagaga?
• O ā luʻi ua aumaia e le pōuliuli faaleagaga o loo siʻomia ai i tatou?
• O ā lamatiaga e tatau ona tatou ʻalofia?
• E faapefea ona tatou faaalia lo tatou lotofaafetai mo le malamalama o le upu moni?
[Ata i le itulau 8]
O Ieova o le puna o le malamalama faaletino ma le faaleagaga
[Ata i le itulau 10]
E pei ona faamālōlōina faasolosolo e Iesu se tamāloa tauaso, o loo ia fesoasoani foʻi iā i tatou e ō ese mai le pōuliuli faaleagaga
[Ata i le itulau 11]
O le faasesēina i malamalama taufaasesē a Satani e iʻu atu ai i le faavaatuʻia faaleagaga