Agaga Malamalama—E Fesoasoani e Faaalia ai le Agalelei ma le Agaalofa

“AFAI e mafai ona e fesoasoani e faaitiitia tigā o le isi tagata, ua aogā la le olaga,” o le tusi mai lea a Helen Keller. Na mautinoa le malamalama o Helen i tigā tau i faalogona. O le 19 masina o lona matua, na oo ai iā te ia se maʻi lea na tauaso ma tutuli atoatoa ai. Ae na aʻoaʻoina e se faiaʻoga agaalofa ia Helen i le Tusi mo Tagata Tauaso ina ia iloa ai faitau ma tusitusi, ma mulimuli ane ai aʻoaʻoina le tautala.

Sa iloa lelei e le faiaʻoga o Helen, o Ann Sullivan, ia le faigatā o le tauivi ma se faalētonu o le tino. Sa toetoe lava foʻi a tauaso o ia. Ae na fuafua ma le onosai e Ann se auala e fesootaʻi ai ma Helen e ala i le “tusiaina o mataʻitusi o upu” i le lima o Helen. O le faagaeetia i le agaga malamalama o lona faiaʻoga, na filifili ai Helen e faaaogā lona lava ola e fesoasoani ai i tagata tauaso ma tutuli. O le tele o taumafaiga e foʻia ai ona lava faalētonu i le tino, na ia lagonaina ai le agaga malamalama ma le alofa mo i latou o loo i tulaga lava ia e tasi. Sa manaʻo o ia e fesoasoani iā i latou.

Atonu na e mātauina faapea, i lenei lalolagi manatu faapito, e faigofie tele ona ‘punitia le loto alofa o se tasi’ ma lē amanaʻia ai manaʻoga o isi. (1 Ioane 3:17) Peitaʻi, ua faatonuina Kerisiano ina ia alolofa atu i o latou tuaoi ma ia alofa naunau le tasi i le isi. (Mataio 22:39; 1 Peteru 4:8) Ae peitaʻi, atonu o loo e malamalama i lenei mea moni: E ui lava e tatou te matuā mananaʻo e alofa atu le tasi i le isi, ae e masani lava ona tatou lē amanaʻiaina avanoa e fesoasoani e faaitiitia ai tigā o isi. Atonu ona o lo tatou lē malamalama i mea o loo latou manaʻomia. O le agaga malamalama o le auala lea e fesoasoani iā i tatou e faaalia ai le agalelei ma le alofa.

O le ā le Agaga Malamalama?

Ua faapea mai se tasi lomifefiloi o le agaga malamalama o le “iloaina ma le malamalama lelei o le tulaga o le isi tagata, o ona faalogona, ma uunaʻiga.” Na faamatalaina foʻi faapea o le tomai e tuuina ai e se tasi o ia i le tulaga o le isi tagata. O lea o le agaga malamalama e manaʻomia muamua lava ona malamalama i le tulaga o le isi tagata, ma lona lua o lo tatou taumafai lea e lagona le aafiaga o loo faatupuina e na tulaga iā te ia. Ioe, o le agaga malamalama e aofia ai lo tatou lagonaina i o tatou loto o tigā o le isi tagata.

E lē o mauaina le upu “agaga malamalama” i le Tusi Paia, ae o loo faasino lē tuusaʻo atu i lenei uiga. Na fautuaina e le aposetolo o Peteru Kerisiano ina ia faaalia “[“lagona faaleuso,” NW] ia alolofa i le au uso, ia mutimuti vale i le alofa.” (1 Peteru 3:8) O le upu Eleni e faaliliuina i le “lagona faaleuso” e uiga moni lava i le “tigā faatasi ma le isi” po o “le agaalofa.” Na fautuaina e le aposetolo o Paulo le iai o lagona faapena ina o ia timaʻi atu i uso Kerisiano ina ia “olioli faatasi ma e ua olioli, ia outou tagi foi faatasi ma e ua fetagisi.” Na faaopoopo mai Paulo e faapea: “Ia gatasitasi o outou manatu.” (Roma 12:15, 16) Ae pe e te lē ioe ea faapea e lē mafai ona tatou alolofa i o tatou tuaoi e pei o i tatou lava pe afai tatou te lē amanaʻiaina o latou tulaga?

E toetoe lava o tagata uma o loo iai sina tulaga lea o le agaga malamalama. O ai e lē oo i ai lagona nutimomoia pe a vaai i ata o tamaiti matelāina po o tagata sulufaʻi ua puapuagatia? O ai se tinā alofa e mafai ona lē amanaʻiaina le tagi masūsū a sana tama? Ae peitaʻi, e lē o mafai ona iloa uma atu ia tulaga puapuagatia o loo iai. Pagā le faigatā ona malamalama i faalogona o se tasi o loo oo iai mafatiaga o le mafaufau, faalētonu i le tino e lē o iloa atu, po o le gasegase lea o se vaaiga faaletonu e faatatau i mea e ʻai (eating disorder)—pe afai e leʻi oo lava na faafitauli ia i tatou! E ui i lea, ua faaalia e le Tusi Paia e mafai ma e tatau ona tatou atiina aʻe lagona faaleuso mo i latou e lē o mafai ona tatou fesoasoani e tauaveina o latou tulaga.

Faataʻitaʻiga Faale-Tusi Paia o le Iai o Lagona Malamalama

O Ieova o lo tatou faaaʻoaʻo sili o le finagalo malamalama. E ui lava ina lelei atoatoa o ia, ae e na te lē faatalitalia i tatou ina ia lelei atoatoa, “auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:14; Roma 5:12) E lē gata i lea, talu ai e silafia e ia o tatou tapulaa, ‘e na te le tuuina atu i tatou i le tofotofoga e sili i se mea ua tatou lavatia.’ (1 Korinito 10:13) E ala i ana auauna ma lona agaga paia, ua fesoasoani ai o ia iā i tatou ina ia mauaina se vaifofō.—Ieremia 25:4, 5; Galuega 5:32.

E lagona e Ieova lava ia le tiga o loo feagai ma ona tagata. Na ia taʻu atu i tagata Iutaia na toe foʻi mai Papelonia e faapea: ‘O lē pai atu ia te outou, ua pāia e ia le tamatamai mata o loʻu mata.’ (Sakaria 2:8) O le iloa lelei o le finagalo malamalama o le Atua, na faapea atu ai le tusitala o le Tusi Paia o Tavita iā te ia: “Ia e utu oʻu loimata i lau fagu; e le o i ai ea i lāu tusi?” (Salamo 56:8) Maʻeu le faamāfanafanaina i le iloa faapea e manatua e Ieova—e pei lava na tusia i se tusi—ia loimata o ana auauna faamaoni a o latou tauivi e tausia lo latou faamaoni!

I le pei o lona Tamā faalelagi, e amanaʻia e Iesu Keriso faalogona o isi. Ina ua ia faamālōlōina se tamāloa tutuli, na ia taʻitaʻi ese o ia, atonu ina ia lē mā pe faateʻia o ia i lona faamālōlōina faavavega. (Mareko 7:32-35) I se isi mea na tupu, na mātauina ai e Iesu se fafine ua oti lana tane ua toetoe lava a oo ina tanuina si ana tama tama e toʻatasi. Na vave lava ona ia lagonaina le tigā o loo mafatia ai le fafine, ma faalatalata atu i le solo o le tanuga, ma toe faatūina le tauleʻaleʻa.—Luka 7:11-16.

Ina ua mavae le toe faatūina mai o Iesu, ina ua faailoa atu o ia iā Saulo i le ala i Tamaseko, na ia taʻu atu iā Saulo le auala ua aafia ai o ia ona o le sauāina leaga o ona soo. Na ia taʻu atu iā te ia: “O aʻu o Iesu ua e saua mai i ai.” (Galuega 9:3-5) Na lagonaina e Iesu tigā na mafatia ai ona soo, e pei ona lagonaina e se tinā ia tigā e oo i sana tama maʻi. I se tulaga faapena, e pei lava ona lagonaina e lo tatou Ositaulaga Sili, o Iesu le “tiga alofa faatasi ma i tatou i o tatou vaivai,” po o le pei ona faaupu ai e le faaliliuga a Rotherham, na iā te ia “lagona faaleuso i o tatou vaivaiga.”—Eperu 4:15.

Sa mafai e le aposetolo o Paulo ona lagonaina mafatiaga ma faalogona o isi. “Po o ai le ua vaivai, ou te le vaivai ai? Po o ai le ua tausuai, ou te le tiga ai?” o lana fesili lea. (2 Korinito 11:29) Ina ua faasaʻoloto faavavega e se agelu ia Paulo ma Sila i o la noanoataga i se falepuipui i Filipi, o le manatu muamua lava na oo iā Paulo o le fautuaina lea o le alii e vaaia le falepuipui faapea e leai se tasi na sola ese. Na ia lagonaina le agaga malamalama faapea e ono pule le alii e vaaia le falepuipui i lona lava ola. Na iloa lelei e Paulo faapea o le aganuu a Roma, e matuā mamafa le faasalaga o se tagata e vaaia le falepuipui pe a sola i fafo se pagota—aemaise lava pe afai na faatonuina o ia e matuā leoleo maluina se pagota. (Galuega 16:24-28) O lenei gaoioiga agalelei a Paulo e faasaoina ai le ola na faagaeetia ai le alii e vaaia le falepuipui, ma na ia faia ai ma lona aiga ni laasaga e avea ai ma Kerisiano.—Galuega 16:30-34.

Le Auala e Atiina Aʻe ai le Agaga Malamalama

O loo faalaeiauina pea lava pea i tatou e le Tusi Paia e faataʻitaʻi i lo tatou Tamā faalelagi ma lona Alo, o Iesu Keriso, o lea la o le agaga malamalama o se uiga e manaʻomia ona tatou atiina aʻe. E mafai faapefea ona tatou faia lenei mea? E tolu ni auala autū e mafai ona faaleleia ai lo tatou mataala i mea o loo manaʻomia atoa ai ma faalogona o isi: e ala i le faalogologo, le mātauina, ma le faaataina i le mafaufau.

Faalogo. O le faalogologo lelei, e tatou te iloa ai faafitauli o loo fesagaʻi ma isi. Ae o le lelei o la tatou faalogo, o le ono tatalaina mai ai foʻi lea o o latou loto ma faailoa mai o latou faalogona. “E mafai ona ou talanoa i se toeaina pe a ou lagona le mautinoa faapea o le a ia faalogo mai iā te aʻu,” o le faamatalaga lea a Miriama. “Ou te manaʻo ia ou iloa o loo ia malamalama lelei i loʻu faafitauli. E tupu aʻe loʻu mautinoa iā te ia pe a ia fesiligia aʻu i fesili ina ia malamalama tonu ai i loʻu tulaga, lea e faaalia ai sa ia faalogologo lelei i mea o loo oʻu taʻuina atu iā te ia.”

Mātau. E lē o tagata uma latou te faamatala mai iā i tatou o latou faalogona po o mea o loo oo iā i latou. Peitaʻi, o se tagata e naunau e mātauina mea, o le a ia iloa le taimi e foliga mafatia ai se Kerisiano, le taimi e lē fia talanoa ai se talavou, po le taimi e mou atu ai le naunau o se tagata talaʻi maelega. E tāua tele ona iai i mātua le tomai e lagonaina ai le amatamataga o se faafitauli. “Ou te lē iloa pe faapefea, ae e iloa e loʻu tinā oʻu lagona a o oʻu leʻi talanoa atu iā te ia,” o le faamatalaga lea a Marie, “o lea e faigofie tele ai ona ou saoloto e taʻu saʻo atu iā te ia oʻu faafitauli.”

Ia faaata i lou mafaufau. O le auala e aupito sili ona malosi e faatupu aʻe ai le agaga malamalama o le fesili lea iā te oe lava: ‘Afai sa ou iai i lenei tulaga, o le a faapeʻī oʻu lagona? O le a faapefea ona ou tali atu? O le ā o le a ou manaʻomia?’ Sa faamaonia le lē agavaa o le ʻaufaamāfanafana a Iopu e tuu i latou i le tulaga o Iopu. Peitaʻi, na latou tuuaʻia Iopu i agasala na latou manatu faapea atonu na ia faia.

E faigofie tele i tagata lē lelei atoatoa ona faitio i mea sesē na i lo le taumafai e malamalama i faalogona. E ui i lea, pe afai e tatou te taumafai malosi e faaata i le mafaufau le mafatia o se tasi ua puapuagatia, o le a fesoasoani ai iā i tatou e alolofa na i lo le taʻusalaina o ia. Na faamatalaina e Juan, o se toeaina tomai e faapea: “E sili atu fautuaga ou te tuuina atu pe a ou faalogologo lelei ma taumafai e malamalama i le tulaga atoa a o leʻi amata ona tuuina atu ni fautuaga.”

O lomiga o loo tufaina atu e Molimau a Ieova na fesoasoani i le toʻatele o tagata i lenei tulaga. O le mekasini o le Olomatamata ma le Ala Mai! o loo talanoaina ai faafitauli lavelave e pei o le lotomafatia ma le faileagaina o tamaiti. O nei faamatalaga fetaui lelei e fesoasoani i le ʻaufaitau e mataala atili ai i faalogona o i latou o loo pagatia i na tulaga. E faapena foʻi i le tusi Fesili ua Fesili Mai ai Talavou—Tali e Aogā ua fesoasoani i le toʻatele o mātua e malamalama ai i faafitauli o a latou fanau.

E Fesoasoani le Agaga Malamalama i Gaoioiga Faa-Kerisiano

E toʻaitiiti i tatou e mafai ona lē amanaʻiaina tulaga faigatā o se tamaitiiti o loo matelaina pe afai o loo iā i tatou ni meaʻai e avatu iā te ia. Afai o loo iā i tatou le agaga malamalama, o le a tatou iloaina foʻi le tulaga faaleagaga o loo iai le tagata. O loo faamatalaina e le Tusi Paia e faatatau iā Iesu e faapea: “Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” (Mataio 9:36) E faitau miliona tagata i aso nei o loo i se tulaga faapena faaleagaga, ma e latou te manaʻomia se fesoasoani.

I le pei o aso o Iesu, e tatou te ono foʻia muamua le faailogatagata po o ni tū ma aga ua mauaʻa iā i tatou ina ia pāʻia ai loto o nisi o tagata. O le tagata talaʻi e iai le agaga malamalama, e taumafai e saili se mea e taufai ioe faatasi i ai po o le talanoa e faatatau i mataupu o loo i manatu o tagata, ina ia sili atu ona logoleleia lana feʻau o loo avatu. (Galuega 17:22, 23; 1 Korinito 9:20-23) O gaoioiga agalelei e uunaʻia e le agaga malamalama e sili atu ona taliaina ai e a tatou tagata faalogologo le feʻau o le Malo, e pei ona faaalia i le tulaga o le tagata e vaaia le falepuipui i Filipi.

E matuā tāua lagona malamalama e fesoasoani ai iā i tatou ina ia lē amanaʻia ai sesē o isi i totonu o le faapotopotoga. Afai e tatou te taumafai e malamalama i faalogona o se uso na faatigā iā i tatou, o le a mautinoa la le sili atu ona faigofie ona faamagalo atu iā te ia. Atonu o le a tatou tali atu i le auala lava lenā e tasi pe ana faapea sa tatou iai foʻi i lenā tulaga ma le talaaga o le olaga e pei foʻi ona iai o ia. O le agaga malamalama o Ieova ua uunaia ai o ia e ‘manatua o le efuefu lava i tatou,’ o lea, pe lē tatau ai ea e lo tatou lagona malamalama ona uunaʻia i tatou e mafaufau i tulaga lē lelei atoatoa o isi ma ‘fefaamagaloai’ ai?—Salamo 103:14; Kolose 3:13.

Pe afai e tatou te tuuina atu se fautuaga, atonu o le a tatou faia i se auala e sili atu ona agalelei pe afai e tatou te malamalama i faalogona ma tulaga maʻaleʻale o le tagata o loo sesē. E toe faamanatu e se toeaina Kerisiano iā te ia faapea: ‘Ou te ono faia foʻi lenei mea sesē. Ou te ono iai foʻi i lenei tulaga.’ Na fautuaina e Paulo faapea: “Ia outou faafoi mai le ua faapeaina ma le loto o le agamalu. Ia faaeteete foi oe ina neʻi faaosoosoina oe.”—Kalatia 6:1.

E mafai foʻi e le iai o le agaga malamalama ona uunaʻia i tatou e ofoina atu fesoasoani aogā pe afai o loo mafai ona tatou faia faapea, e ui lava e ono faatalatū se uso Kerisiano e fai mai mo se fesoasoani. Ua tusi mai le aposetolo o Ioane e faapea: “O sē ua i ai le oa a le lalolagi nei, pe a iloa atu e ia lona uso ua mativa, a e punitia lona loto alofa ia te ia, pe faapefea ona tumau o le alofa i le Atua i lea tagata? . . . Aua neʻi tatou alolofa tau o le upu ma le gutu, a o le amio ma le faamaoni.”—1 Ioane 3:17, 18.

Ina ia alofa i “le amio ma le faamaoni,” e manaʻomia ona tatou vaai muamua i mea o loo manaʻomia patino e lo tatou uso. Pe e tatou te mātauina lelei ea manaʻoga o isi ina ia fesoasoani atu ai iā i latou? O le uiga moni lenā o le iai o lagona malamalama.

Ati Aʻe Lagona Faaleuso

Atonu e lē masani ona iā i tatou le uiga lea o le agaga malamalama, ae e mafai ona tatou atiina aʻe lenei lagona faaleuso. Afai e tatou te faalogologo lelei atu, ma mātau ma le naunau, ma faaata e lē aunoa i tatou i le tulaga o le isi tagata, o le a tupu aʻe lo tatou agaga malamalama. O le a oo ina tatou lagona le uunaʻiga e faaalia ai le alofa, agalelei ma le alofa mutimutivale i a tatou fanau, i isi Kerisiano, faapea ai ma o tatou tuaoi.

Aua lava nei faatagaina le manatu faapito e punitia ai lou agaga malamalama. Na tusi le aposetolo o Paulo e faapea: “Aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:4) O lo tatou lumanaʻi e faavavau e faalagolago i le finagalo malamalama o Ieova ma lana Ositaulaga Sili, o Iesu Keriso. O lea ua tatau ai iā i tatou ona atiina aʻe lenei uiga. O lo tatou agaga malamalama e avea ai i tatou o ni faifeʻau ma ni mātua e sili ona lelei. Ae silisili lava, o le a fesoasoani le agaga malamalama iā i tatou e iloa ai faapea “e sili le manuia o le na te foai atu, i lo le na te talia mai.”—Galuega 20:35.

[Ata i le itulau 25]

O le agaga malamalama e aofia ai le mātauina lelei o manaʻoga o isi ina ia fesoasoani atu ai iā i latou

[Ata i le itulau 26]

Pe o le a tatou aʻoaʻoina e faaalia le agaga malamalama lea e masani ona lagonaina e se tinā alofa i sana tama?