Se Tauiviga Malosi—O Afea e Tauia ai e Ieova?

“TUU mai ia o aʻu a ou alu, auā ua ao.”

“Ou te le tuuina atu lava oe seʻia e faamanuia mai ia te au.”

“O ai ea lou igoa?”

“O aʻu o Iakopo.”

“E le toe taʻua lou igoa o Iakopo, a o Isaraelu, auā e pei o se alii ua e finau i le Atua atoa ma tagata, ma ua e manumalo.”—Kenese 32:26-28.

O lenā talanoaga fiafia, na māfua ona o se faaaliga mataʻina o le faateleina o le malosi o Iakopo, ua 97 tausaga le matua e pei o se tagata taalo. E ui e lē o faamatalaina o ia i le Tusi Paia o se tagata taalo, ae sa ia pii pe na tauivi ma se agelu i le pō atoa. Aiseā? Sa matuā manatu mamafa Iakopo e uiga i le folafolaga a Ieova i lona augātamā, e faatatau i lona tofi.

I le tele o tausaga muamua atu, na lafoaʻi atu ai e le uso o Iakopo o Esau iā te ia le tofi o le ulumatua, na fesuiaʻi ma se ipu sitiū. Ua logotala nei Iakopo e faapea, o loo sau Esau ma ʻau o tane e toʻa 400. O le mea moni, ua popole Iakopo, o lea na ia saʻili ai se faamautinoaga o le folafolaga a Ieova e faapea, o le a manuia lona aiga i le laueleele o loo i le isi itu o le Vaitafe o Ioritana. I le ōgatasi ma ana tatalo, na faia ai e Iakopo se gaoioiga maʻoti. Sa ia aauina atu meaalofa iā Esau o loo sau. Ua ia faia foʻi ni gaoioiga e puipuia ai lona aiga, i le vaevaeina o lana ʻaumalaga i vaega e lua ma aauina atu ana avā ma fanau i le isi itu o le asaga o Iapoka. I taumafaiga tigā ma le tagi tele, ua faamalosi atili ai nei o ia e tauivi i le po atoa ma se agelu “ma aioi atu ina ia alofagia o ia.”—Hosea 12:4, NW; Kenese 32:1-32.

Seʻi manatu i se faaaʻoaʻoga muamua atu e uiga iā Rasela, le avā lona lua a Iakopo, ma o lē na sili ona ia alofa i ai. Ua malamalama lelei lava Rasela i le folafolaga a Ieova e faamanuia iā Iakopo. O le uso o Rasela o Lea, le avā muamua a Iakopo, ua ia fanauina ni atalii se toʻafā, a o Rasela sa pa pea o ia. (Kenese 29:31-35) Na i lo o le lolo atu i lona faanoanoa, sa aiʻoi atu pea o ia iā Ieova i le tatalo, ma faia foʻi ni gaoioiga mautinoa e ōgatusa ma ana tatalo. E pei ona faia e lona augātinā o Sara iā Akara, ua avatu ai e Rasela lana auauna fafine o Pila iā Iakopo e fai ma ana avā, ina ia pei ona fai mai ai Rasela, “ona ou fai tama ai lea ia te ia, ia ou maua ni fanau mai ia te ia.”a Na fanaua e Pila atalii e toʻalua mai iā Iakopo, o Tanu ma Nafatali. Ina ua fanau mai Nafatali, na faalauiloa mai ai e Rasela le tele o ona faalogona fiafia e faapea: “O fagatuaga tetele ua ou fagatua ai ma loʻu uso, ua ou manumalo ai foi.” Ua faamanuiaina atili Rasela ina ua fanaua e ia lava o ana tama tane e toʻalua, o Iosefa ma Peniamina.—Kenese 30:1-8; 35:24.

Aiseā na faamanuia ai e Ieova ia taumafaiga faaletino ma tau faalogona o Iakopo ma Rasela? Talu ai sa la faamuamua pea le finagalo o Ieova ma faapelepele i lo la tofi. Sa la tatalo faatauanau mo lana faamanuiaga i o la olaga, ma faia gaoioiga talafeagai e ōgatusa ma le finagalo o le Atua faapea a laʻua lava olega.

I le pei o Iakopo ma Rasela, e toʻatele i latou i aso nei ua taʻutino mai e faapea, e manaʻomia taumafaiga filigā ina ia maua ai faamanuiaga a Ieova. E masani ona ō faatasi a latou taumafaiga ma le maligi o loimata, lotovaivai ma le lē fiafia. E manatua e se tasi tinā Kerisiano e igoa iā Elisapeta taumafaiga malolosi na faia ina ia mafai ai ona ia toe auai e lē aunoa i sauniga faa-Kerisiano ina ua mavae se taimi umi na lē auai ai. Sa faigatā tele mo ia ona sa iai lana fanau tama laiti e toʻalima, se tane lē talitonu, ma e 20 maila [30 kilomita] le mamao o le mea e faimalaga ai i le taavale i le Maota o le Malo e aupito latalata ane. “O le taumafai e auai e lē aunoa i sauniga sa manaʻomia ai le matuā aʻoaʻoina lelei o aʻu lava, lea sa ou iloa e lelei mo aʻu ma laʻu fanau tama. Sa fesoasoani lea mea iā i laʻua e iloa ai e faapea, o se auala lelei lenei sa tatau ona tausisia.” Sa faamanuia e Ieova ana taumafaiga. O lana fanau tama e toʻatolu ia e maelega i le faapotopotoga Kerisiano, e toʻalua o loo auai i le faiva faataimi atoa. I le olioli i lo latou agaʻigaʻi i luma faaleagaga, fai mai a ia: “Ua matuā sili atu lo latou agaʻigaʻi i luma faaleagaga i lo o aʻu.” Maʻeu se faamanuiaga mo ana taumafaiga faamaoni!

Taumafaiga Faamaoni e Faamanuia e Ieova

O le faia o taumafaiga faamaoni ma galulue malolosi, e mautinoa lava e tauia. O le tele o taumafaiga tatou te faia i le faatinoina o se galuega po o se tofiga, o le tele foʻi lea o le lotomalie e tatou te maua mai ai. O le auala lenei na faia ai i tatou e Ieova. Na tusi le tupu poto o Solomona e faapea: “O le mea lelei . . . i le tagata e ʻai, ma inu, ma fiafia i le lelei mai ana galuega uma na te faia i lalo o le la, i aso uma o lona ola ua foaʻiina e le Atua ia te ia.” (Failauga 3:13; 5:18, 19) Ae peitaʻi, ina ia maua se faamanuiaga mai le Atua, e tatau ona tatou mautinoa, ua saʻo ona faatonutonu a tatou taumafaiga. Mo se faaaʻoaʻoga, po o se mea talafeagai le faatalitalia o le faamanuiaga a Ieova i se olaga e lē faatāuaina ai mataupu faaleagaga? Pe e mafai ona faamoemoe se Kerisiano tuuina atu e na te maua le faamaoniga a Ieova pe a ia talia se galuega po o tulaga lauiloa o le a ia misia ai e lē aunoa ia aufaatasiga e atiina aʻe ai le faatuatua ma faatonuga i sauniga faa-Kerisiano?—Eperu 10:23-25.

O se olaga galue mamafa i le saʻilia o se galuega totogi po o le tele o meafaitino, e lē tatau ona faapea o le a “iloa [ai] le lelei” e lenā tagata pe afai e lē faaaofia ai mea faaleagaga. Na faamatala e Iesu iʻuga o taumafaiga sesē i lana talafaatusa i le lūlū saito. E faatatau i le saito na “lūlū i le vao tuitui,” na faamatala e Iesu e faapea, “o ia lea ua faalogo i le upu, a o le loto popole i mea a lenei lalolagi, ma le pepelo o le oa ua fetinaiina ai le upu, ona lē fua mai lava lea.” (Mataio 13:22) Na lapataʻi mai foʻi Paulo e faatatau i lea lava mailei ma faaopoopo mai e faapea, o i latou e saʻilia se olaga manaʻo tele i mea faitino, “e maua i latou i le faaosoosoga, ma le mailei ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” O le ā le vaifofō mo sea auala e faaleagaina ai o le olaga? Ua faaauau mai Paulo: ʻIa sosola ese mai i ia mea ma ‘aua le faamoemoe i le oloa e faaletumau, a o le Atua soifua o loo foai tele mai ia te i tatou mea uma lava e faafiafia ai.’—1 Timoteo 6:9, 11, 17.

E tusa lava po o le ā lo tatou matutua po o le ā foʻi le umi talu ona tatou auauna iā Ieova, e mafai e i tatou uma lava ona maua aogā pe a faataʻitaʻi i taumafaiga faamaoni na faatinoina e Iakopo ma Rasela. I lo la galala mo le faamaoniga a le Atua, e leʻi iai lava se taimi na la faatalalē ai i lo la tofi, e ui lava atonu sa iai i ni tulaga na faamataʻuina ai pe na lē fiafia ai. I aso nei, o omiga ma faigatā ia tatou te fesagaʻi e ono matuā faamataʻuina, lē fiafia, po o le oo foʻi ina mafatia ai. Ua faaosoosoina i tatou ina ia lafoaʻia le tauiviga ma oo ai ina avea o se tasi ua lavea i osofaʻiga a Satani. Atonu e na te faaaogāina so o se auala ua ia mafaia, a lē o faafiafiaga po o tafaoga, o taaloga po o mea ua fai ma ou mausa, galuega po o le tele o meafaitino e faataulau ai ana fuafuaga. E masani lava ona folafola mai ni iʻuga lelei, ae seāseā lava ona faataunuu. O i latou ua faasesēina po ua maileia ina ia matuā saʻilia na mea, e masani lava ona iʻu ane i lo latou matuā lē fiafia. Seʻi o tatou atiina aʻe se agaga tauivi malosi e pei o Iakopo ma Rasela o aso anamua, ma manumalo ai i togafiti a Satani.

E leai lava se isi mea e sili atu ona fiafia i ai le Tiapolo pe a vaai mai ua tatou faavaivai, ma lolo atu, ma iai le lagona e faapea, ‘ua leai se faamoemoe. Ua leai se mea e mafai ona fai. Ua lē aogā.’ Maʻeu la le tāua mo i tatou uma ina ia leoleomalu i tatou mai le atiina aʻe o se uiga o le faavaivai, i le manatu e faapea, ‘e leai se tasi e alofa iā te aʻu’ ma faapea ‘ua faagaloina aʻu e Ieova.’ O le talia o na manatu, o se mea e faaleagaina ai oe lava. Pe e faaalia ai i lea mea e faapea, ua tatou siilima ma ua lē o toe faia se tauiviga seʻiloga lava ua tatou maua se faamanuiaga mai iā Ieova? Ia manatua, e faamanuia e Ieova a tatou taumafaiga faamaoni.

Ia Tauivi Pea mo le Faamanuiaga a Ieova

O lo tatou lelei faaleagaga, e faalagolago i le matuā tele o lo tatou malamalama e faatatau i upu moni autū e lua e uiga i o tatou olaga i le avea o ni auauna a Ieova. (1) E leai se tasi e na te maua uma ni vaifofō i faafitauli, o maʻi, po o tulaga faigatā o le olaga, ma lona (2) e faafofoga Ieova i le alaga atu a i latou o loo talosaga atu ma le faamaoni iā te ia mo se fesoasoani ma se faamanuiaga. —Esoto 3:7-10; Iakopo 4:8, 10; 1 Peteru 5:8, 9.

E tusa lava po o ā ou tulaga faigatā, pe e te lagona foʻi ua lē tele ni mea e mafai ona e faia, aua e te lolo atu i “le agasala e faalavelavegofie ai i tatou,” ona ua leai se faatuatua. (Eperu 12:1) Ia faaauau ona e tauivi seʻia e maua se faamanuiaga. Ia faaalia le onosai, ia manatua le toeaina matua o Iakopo o lē na tauivi ma le agelu i le pō atoa mo se faamanuiaga. Ia pei o le fai faatoʻaga o lē lūlū saito i le tau e totogo ai mea ma faatalitali mo le seleselega, ia vaavaai atu ma le onosai mo le faamanuiaga a Ieova i lau galuega faaleagaga, e tusa lava pe e te lagona e lē o tele ni mea e mafai ona e faia. (Iakopo 5:7, 8) Ma ia manatua pea upu a le faisalamo e faapea: “O i latou e lulu saito ma loimata, latou te selesele mai ma le alaga fiafia.” (Salamo 126:5; Kalatia 6:9) Ia tumau ma faaauau ai pea faatasi ma i latou o loo faia tauiviga malolosi.

[Faamatalaga pito i lalo]