E Mafai Faapefea Ona Faaaogā o Tatou Aso i se Auala e Finagalo Malie i ai Ieova?

“Na taʻua e se tusitala Amerika o Lydia H. Sigourney, (1791-1865) e faapea: “E matuā tāua lava itula uma o le aso, e mai lava i le oso aʻe o le lā i lona goto ifo. E ao ona faaaogā tatau itula taʻitasi uma ae aua le faamaʻimauina, auā e mafai ona mou atu, e lē toe maua mai!”

E FOLIGA mai e puupuu ma vave mavae atu aso o lo tatou olaga. Sa manatunatu le faisalamo o Tavita i le puupuu o le olaga ma uunaʻia ai o ia e tatalo e faapea: “Ieova e, ia e faailoa mai iā te aʻu loʻu iʻuga, pe se ā foʻi le fua o oʻu aso; ina ia ou iloa pe fia ni aso ua toe iā te aʻu. Faauta, ua e faia oʻu aso e pei o le lautele o le alofilima; o loʻu olaga foʻi, ua peiseaʻī ua leai i ou luma.” Sa manatu mamafa Tavita ina ia ola i se olaga e faafiafia ai le Atua, e ala i ana upu ma gaoioiga. Sa ia faaleo atu lona faalagolago i le Atua i lona faapea atu: “O loo iā te oe loʻu lava faamoemoe.” (Salamo 39:4, 5, 7) Sa faafofogaina e Ieova, ma sa ia fuatiaina gaoioiga a Tavita, ma tauia o ia e tusa ma ana gaoioiga.

E masani lava ona tatou pisi i taimi uma o le aso ma taaʻina ai i se olaga televave ma le tumu i mea e fai. E ono faapopoleina ai i tatou i lenei mea, aemaise lava le tele naʻuā o mea e fai, ae lē lava le taimi e faia ai. Pe e tatou te manatu mamafa ina ia ola i ni olaga e faafiafia ai le Atua e pei o Tavita? Ma le mautinoa lava, e silafia i tatou e Ieova ma e na te matuā suʻesuʻeina i tatou taʻitoʻatasi. Na faailoa mai e Iopu o le tagata e mataʻu i le Atua pe ā ma le 3,600 tausaga ua mavae e faapea, sa silafia e Ieova ona ala ma suʻesuʻeina ana gaoioiga uma. Sa faia e Iopu se fesili faatupu manatu e faapea: “Se ā foʻi saʻu e tali atu ai iā te ia pe a faamasino mai o ia?” (Iopu 31:4-6, 14) E mafai ona tatou ola i ni olaga e faafiafia ai le Atua e ala i le faamuamua o mea faaleagaga, usiusitai i ana poloaʻiga, ma faaaogā tatau o tatou taimi. Seʻi o tatou manatunatu loloto la i nei mataupu.

Ia Faamuamua Mea Faaleagaga i o Tatou Olaga

Ua faalaeiau saʻo mai lava i tatou e le Tusi Paia faagaeeina ina ia faatulaga mea faaleagaga e tatau ona faamuamua i le faapea mai: “Ia masino iā te outou mea uiga eseese [“e sili ona tāua,” NW].” O ā nei mea tāua? O le tali, e aofia ai “le iloa lelei, atoa ma le faautauta uma.” (Filipi 1:9, 10) O le iloa lelei o fuafuaga a Ieova, e manaʻomia ai ona faaaogā ma le faautauta o tatou taimi. Ae peitaʻi, o lo tatou faamuamua o mea faaleagaga, e mautinoa o le a maua ai se olaga manuia ma le faamalieina.

Ua faamanatu mai e le aposetolo o Paulo iā i tatou ina “ia suʻesuʻe [pea] outou pe se ā se mea e fiafia i ai le Alii.” O le suʻesuʻeina o i tatou, e tatau ona aofia ai le iloiloina o a tatou lava gaoioiga ma faanaunauga o le loto. Ua faaauau mai le aposetolo: “Ia outou iloa le finagalo o le Alii.” (Efeso 5:10, 17) O lea la, o le ā e talileleia mai e Ieova? Ua tali mai se faataoto o le Tusi Paia: “O le poto o le mea sili lea, ia maua le poto; o mea uma e te maua ia maua mai ai le atamai. Ia e vivii iā te ia, ona faaeaina lea o oe e ia.” (Faataoto 4:7, 8) E fiafia Ieova i se tagata na te maua le poto ma faatinoina le atamai faale-Atua. (Faataoto 23:15) O le lelei o lea poto, auā e lē mafai ona aveesea pe mou ese atu. O le mea moni, e mafai ona leoleomalu ma puipuia oe “ai le ala leaga; ai le tagata ua tautala i mea faapiʻopiʻo.”—Faataoto 2:10-15.

Maʻeu la le atamai o le tetee atu i so o se uiga faalēano pe manatu māmā i mea faaleagaga! E manaʻomia ona tatou ati aʻe se uiga talisapaia o fetalaiga a Ieova ma ia iai se mataʻu lelei iā te ia. (Faataoto 23:17, 18) E ui e mafai ona ati aʻe nei mafaufauga i so o se taimi o le olaga, ae e sili ona lelei pe a faamautūina lenei faatulagaga saʻo ma ia matuā faatatauina mataupu silisili o le Tusi Paia a o talavou lava. Ua faapea mai le tupu poto o Solomona: “O lenei, ia e manatua lē na faia oe i ona pō o lou tauleʻaleʻa.”—Failauga 12:1.

O le auala e pito sili ona māfana e atiina aʻe ai le talisapaia mo Ieova, o au lava tatalo iā te ia i aso taʻitasi. Sa iloa e Tavita le tāua o le faalagolago atu iā Ieova, auā na ia faapea mai: “Ieova e, ia e faafofoga mai i laʻu tatalo, ma liliu mai ou fofoga i laʻu alaga; aua neʻi e lē tali mai i laʻu tagi.” (Salamo 39:12) Po ona o le māfana tele o la tatou faiā ma le Atua i nisi taimi, e ootia ai faalogona ma oo ai ina maligi o tatou loimata? O le mea moni, o le tele o lo tatou talanoa atu iā Ieova e uiga i mataupu loloto i o tatou loto, ma mafaufau loloto i lana Afioga, o le sili atu foʻi lea ona mafuta vavalalata mai o ia iā i tatou.—Iakopo 4:8.

Aʻoaʻo ia Usiusitai

O Mose, o se tagata faatuatua na ia iloa lona faalagolago atu i le Atua. I le pei o Tavita, sa iloa e Mose e tumu le olaga i faalavelave. O lea na ia ole atu ai i le Atua ina ia aʻoaʻo mai o ia ‘e faitauina ona aso, ina ia maua ai le poto i lona loto.’ (Salamo 90:10-12) E na o le aʻoaʻoina lava ma le faatatauina o tulafono ma mataupu silisili a Ieova e maua ai se loto e poto. Na iloa e Mose lenei mea ma mulimuli ane, sa ia taumafai e tāmau lenā upu moni tāua i loto o le nuu o Isaraelu, e ala i lona aʻoaʻo soo atu iā i latou o tulafono ma faamasinoga a le Atua ae latou te leʻi nofoia le Nuu o le Folafolaga. E so o se tupu faaletagata la na filifilia mulimuli ane e Ieova e pule iā Isaraelu, sa tatau ona ia tusia se kopi o le Tulafono mo ia ma faitau i ai i aso uma o lona ola. Aiseā? Ina ia mataʻu ai o ia i le Atua. Sa tofotofoina ai i lenei mea le usiusitai o se tupu. O le a taofia ai o ia mai le loto faamaualuga i ona uso ma o le a faafualoa ai aso o lana pulega. (Teuteronome 17:18-20) Na toe faamanatu atu lenei folafolaga ina ua fetalai atu Ieova iā Solomona le atalii o Tavita: “Afai foʻi e te savali i oʻu ala, ma e tausi i aʻu tulafono, ma aʻu poloaʻiga, e pei ona savali o lou tamā o Tavita, ou te faafualoaina ou aso.”—1 Tupu 3:10-14.

O le usiusitai, o se mataupu e tāua i le Atua. Afai e tatou te manatu māmā i nisi o vala o tulafono ma poloaʻiga a Ieova pei e lē tāua, e mautinoa lava e na te silafia lelei lenā uiga. (Faataoto 15:3) O le iloaina o lenei mea, e ao ona uunaʻia ai i tatou e manatu maualuga pea i taʻiala a Ieova e tusa lava pe e lē faigofie ona faia i taimi uma. Ua faia e Satani mea uma na te mafaia e ‘faalavelave mai ai iā te i tatou’ a o tatou taumafai e utagia tulafono ma poloaʻiga a le Atua.—1 Tesalonia 2:18.

E ese le tāua o le taumafai e usitaia fautuaga a le Tusi Paia ina ia faapotopoto faatasi mo le tapuaʻiga ma le mafuta faatasi o le ʻauuso. (Teuteronome 31:12, 13; Eperu 10:24, 25) O lea, e lelei ai ona tatou fesili ifo iā i tatou lava: ‘Po ua ou filifili maumauaʻi ma finafinau e faia mea e aogā moni?’ Afai e tatou te lafoaʻiina aufaatasiga ma faatonuga i sauniga faa-Kerisiano ona o le taumafai e saʻilia se tulaga mautū tau tamaoaiga, o le a faavaivaia ai la tatou faiā ma Ieova. Na tusi mai le aposetolo o Paulo: “Ia aunoa a outou amio ma le matapeʻapeʻa; ia gata ia o outou manaʻo i mea ua iā te outou; auā ua fetalai mai [Ieova], Ou te lē tuua lava oe, ou te lē tuulafoaʻi lava iā te oe.” (Eperu 13:5) O le usiusitai ma le loto i ai i poloaʻiga a Ieova, ua faaalia ai lo tatou faatuatua atoatoa atu iā te ia e na te tausia i tatou.

Na aʻoaʻoina e Iesu le usiusitai ma maua ai aogā. Ma e faapena foʻi i tatou. (Eperu 5:8) O le tele o lo tatou atiina aʻe o le usiusitai, o le faigofie foʻi lea ona faatinoina, e oo lava i nai mea laiti. O le mea moni, ona o lo tatou faamaoni, atonu e tatou te onosaia ai mea lē manuia ma faiga leaga mai isi. Aemaise lava i nofoaga e faigaluega ai, i aʻoga, po o se aiga e eseese lotu. Ae, ua faamāfanafanaina i tatou i le faalauiloaga na fai atu i tagata Isaraelu e faapea, afai e latou te ‘alolofa iā Ieova ma faalogo i lona siʻufofoga ma pipii atu iā te ia, o le a avea o ia ma o latou ola ma faafualoaina o latou aso.’ (Teuteronome 30:20) O le folafolaga lava lea o loo fai mai iā i tatou.

Faaaogā Tatau le Taimi

O le faaaogā tatau o lo tatou taimi, o le a fesoasoani foʻi iā i tatou e ola ai i ni olaga e finagalo malie i ai Ieova. E lē pei o tupe e mafai ona faaputu, a o le taimi, e tatau ona faaaogā, auā e mafai ona maʻimau pe lē toe maua mai. O itula uma lava e mavae atu, e lē mafai ona toe maua mai. Talu ai e tele atu mea e fai na i lo o mea e mafai ona tatou taulimaina, po o faaaogā la lo tatou taimi i se auala e ōgatusa ma o tatou sini i le olaga? O le sini autū lava o Kerisiano uma, o le faia e lē aunoa o se sao i le galuega talaʻi o le Malo ma le faia o soo.—Mataio 24:14; 28:19, 20.

E na o le pau lava le auala e mafai ona tatou faaaogā tatau ai o tatou taimi, o le iloa lelei lea o lona tāua. Ua talafeagai ai ona uunaʻia i tatou e le Efeso 5:16 ina “ia faaaogāina e outou aso o lenei olaga,” ma e faaalia ai i lenei manatu, e tatau ona tatou “faatau mai” le taimi, ae lafoaʻi mea e lē tāua. O lona uiga, ia faalaʻitiiti le taimi e faaalu i le saʻilia o mea lē aogā. O le tele o le taimi e matamata ai i le televise po o le autiloina o le Initineti, le faitauina o mea lē aogā i nusipepa ma tusi, po o le soona naunau i le faia o faamalositino ma faafiafiaga ia e mafai ona tatou vaivai ai. E lē gata i lea, o le soona faaputuina o mea faitino e mafai ona faamaʻimau ai le taimi lea e manaʻomia ina ia maua ai se loto e poto.

Ua faapea mai tagata e fiafia e faaaogā tatau o latou taimi: “E lē mafai ona faaaogā tatau o tatou taimi pe afai e lē faataatitiaina ni sini maʻoti.” Ua latou fautuaina mai ni vala se lima e faataatitia ai ni sini: ia maʻoti, ia fuafua lelei, ia mafai ona ausia, ia fetaui, ma ia faatulaga lelei.

O se isi sini aogā, o le faaleleia lea o la tatou faitau Tusi Paia. O le laasaga muamua, ia maʻoti lo tatou sini, ina ia faitauina le Tusi Paia atoa. O le isi laasaga, ia fuafua lelei o tatou sini ina ia mafai ona ausia. O le faia faapea, e mafai ona tatou iloa ai lo tatou agaʻigaʻi i luma. E ao i sini ona faamalosia i tatou ma tutupu aʻe ai faaleagaga. O sini foʻi e tatau ona fetaui ma ia mafai ona ausia. E tatau ona iloiloina ou lava agavaa, tomai, ma taimi avanoa. Atonu e manaʻomia e nisi se taimi e sili atu e faataunuuina ai sea sini. Ma o le vala mulimuli,e manaʻomia lava ona faatulaga lelei o tatou sini. O le faataatia o se aso e faataunuuina ai se mea, e mafai ona faateleina ai lo tatou naunau ina ia faatinoina.

O tagata uma lava i aiga Peteli, o loo auauna i le ofisa ulu o Molimau a Ieova po o se tasi o ona lālā i le lalolagi aoao, e iai se sini patino ina ia faitau le Tusi Paia atoa i lo latou tausaga muamua i Peteli. Ua latou iloa, ua avea le faitauina ma le uigā o le Tusi Paia ma auala ua tutupu aʻe ai faaleagaga, ma atiina aʻe ai se faiā māfana ma Ieova, o lē o loo aʻoaʻoina i latou i mea e aogā mo i latou lava. (Isaia 48:17) Pe e mafai ona avea foʻi ma o tatou sini le faitauina e lē aunoa o le Tusi Paia?

O Aogā o le Faaaogāina o Tatou Aso i se Auala e Finagalo Malie i ai Ieova

O le uaʻi muamua atu i mea faaleagaga, o le a iʻu ai i le anoanoaʻi o faamanuiaga. O se tasi o mea, e matuā faamalieina ai i tatou i mea ua faataunuuina ma maua ai se fuafuaga i le olaga. O le talanoa atu e lē aunoa iā Ieova e ala i le tatalo faatauanau, o le a tatou māfana atu ai iā te ia. O a tatou tatalo, e faailoa atu ai lo tatou faalagolago atu iā te ia. O le faitauina i aso taʻitasi o le Tusi Paia ma lomiga faale-Tusi Paia ia ua saunia e le “auauna faamaoni ma le mafaufau” e faaalia ai lo tatou lotomalilie e faalogo atu i le Atua a o fetalai mai o ia iā i tatou. (Mataio 24:45-47) Ua fesoasoani lenei mea iā i tatou e maua ai se loto e poto ina ia mafai ai ona faia ni faaiʻuga ma ni filifiliga saʻo i le olaga.—Salamo 1:1-3.

E tatou te matuā fiafia e usiusitai i poloaʻiga a Ieova, auā e lē mamafa. (1 Ioane 5:3) O lo tatou faaaogāina o aso taʻitasi i se auala e finagalo malie i ai Ieova, ua faamalosia ai la tatou faiā ma ia. E avea ai foʻi i tatou ma lagolago moni i o tatou uso Kerisiano. O gaoioiga faapena, e faafiafia ai le finagalo o Ieova le Atua. (Faataoto 27:11) E leai se taui e sili atu ona fiafia ai na i lo o le olioli i le finagalo malie o Ieova i le taimi nei ma oo ai i le faavavau!

[Ata i le itulau 21]

E manatu mamafa Kerisiano i mataupu faaleagaga

[Ata i le itulau 22]

Po o faaaogā tatau lou taimi?

[Ata i le itulau 23]

E faamalosia la tatou faiā ma Ieova pe a tatou faaaogāina aso taʻitasi i se auala e finagalo malie ai o ia