Fesili Mai le ʻAufaitau
Aiseā e lē tutusa ai numera o le tusi o Salamo i faaliliuga eseese o le Tusi Paia?
O le Tusi Paia atoa muamua lava na iai mataupu ma le vaevaeina o fuaiupu, o le faaliliuga i le gagana Falani lea na lomia e Robert Estienne i le 1553. Ae peitaʻi o le tusi o Salamo ua leva ona vaevaeina i se taimi e muamua atu, talu ai o ni tuufaatasiga o salamo taʻitasi po o pese lea na fatuina e ni tagata se toʻatele.
E foliga mai na uluaʻi tofia e Ieova ia Tavita ina ia tuufaatasia ni salamo mo le faaaogāina i tapuaʻiga lautele. (1 Nofoaiga a Tupu 15:16-24) E iai le talitonuga faapea o le faitaulaga o Esera ma o se “tusiupu poto” foʻi na tuufaatasia mulimuli ane le tusi atoa o Salamo i lona tulaga lea o loo iai nei. (Esera 7:6) O lea la o le tusi o Salamo o loo faia aʻe i salamo taʻitasi i le taimi na tuufaatasia ai.
I le lauga na tuuina atu e le aposetolo o Paulo i le sunako i Anetioka i lana uluaʻi malaga faamisionare, na ia siiina mai ai le tusi o Salamo ma faapea mai: “[E] pei ona tusia foʻi i le salamo e lua, O loʻu Atalii oe, ua fanaua oe e aʻu i le aso nei.” (Galuega 13:33) I Tusi Paia i aso nei, o loo iai pea na upu i le Salamo lua fuaiupu 7. Peitaʻi e iai le eseesega o numera o le tele o salamo i faaliliuga eseese o le Tusi Paia. O le māfuaaga o lenei mea ona o nisi faaliliuga o loo faavae aʻe i le faaliliuga faa-Eperu a le ʻau Masoreta, ae o isi o loo faavae aʻe i le Septuagint faa-Eleni, o le faaliliuga o le tusitusiga Eperu lea na māeʻa i le senituri lona lua T.L.M. Mo se faataʻitaʻiga o le Tusi Paia faa-Latina o le Vulgate, lea na faaliliuina mai ai le tele o Tusi Paia Katoliko, o loo faaaogāina ai numera o salamo lea e i le Septuagint, a e o isi faaliliuga e aofia ai ma le New World Translation o loo mulimuli i numera o loo i le faaliliuga faa–Eperu a le ʻau Masoreta.
O ā la ni mea patino e eseese ai? I le faaliliuga faa-Eperu a le ʻau Masoreta e 150 le aofaʻi o salamo o loo iai. Ae i le tusitusiga Septuagint o loo tuufaatasia ai le Salamo 9 ma le Salamo 10 faapea foʻi le Salamo 114 ma le 115. E lē gata i lea, o loo vaevaeina le Salamo e 116 i ni vaega se lua faapea foʻi ma le Salamo 147. E ui o loo tutusa le aofaʻiga atoa o salamo, peitaʻi e tasi le salamo e sili ai le faaliliuga a le ʻau Masoreta na i lo le Septuagint, i le Salamo 10 seʻia oo i le Salamo 146. O lea la, o le Salamo e 23 lea ua tatou masani ai, o loo maua i le Salamo 22 i le faaliliuga o le Douay Version, lea o loo mulimuli i numera o le Tusi Paia faa-Latina o le Vulgate, lea e faaaogāina e le Septuagint.
Ma le manatu mulimuli, atonu e eseese numera o fuaiupu o salamo mai i lea faaliliuga i lea faaliliuga. Aiseā? Ua faapea mai le tusi Cyclopedia a McClintock ma Strong, o le māfuaaga o lenei mea ona o nisi faaliliuga o loo mulimuli i “faiga faa-Iutaia o le faaaogāina lea o ulutala o tusi e fai ma uluaʻi fuaiupu,” ae o isi e lē o faia faapea. O le mea moni afai e umī se ulutala, e masani lava ona faatulaga o ni fuaiupu se lua ma faaopoopo ai numera o fuaiupu o le salamo.