Fesili Mai le ʻAufaitau
Aiseā na lē fasiotia ai Tavita ma Patesepa ina ua la mulilua, ae na oti la laʻua tama?
Na taʻua i le Tulafono na tuu atu iā Mose: “A iloa se tane ua la momoe ma se fafine nofo tane, ia oti i laʻua, o le tane na la momoe ma le fafine, atoa ma le fafine; ona e tuueseina ai lea o le leaga iā Isaraelu.” (Teuteronome 22:22) Pe ana tuu atu e Ieova i tagata e faia le faamasinoga o Tavita ma Patesepa i lalo o le Tulafono, e mautinoa e fasiotia i laʻua. Talu ai e lē iloa e tagata mea o i loto, e faavae la a latou faaiʻuga e tusa ma mea moni ua latou iloa e uiga i gaoioiga a ē fai mea sesē. O le mulilua, o se gaoioiga ua talafeagai ai le faasalaina i le oti. E leʻi maua e Isaraelu le pule e faamagalo ai ia ituaiga o agasala.
Ae i le isi itu, e silafia e le Atua moni mea o i loto o tagata ma na te faamagaloina agasala pe a salamō moni le tagata. Talu ai na tupu lenei mea iā Tavita, ma ua uma ona osi feagaiga le Atua ma ia mo le Malo, o lea la na filifili ai Ieova e tauaaoina e ia lava lenei mataupu. (2 Samuelu 7:12-16) Ua iai i Lē na te “faamasinoina le lalolagi uma,” le pule e faia ai se filifiliga faapena.—Kenese 18:25.
O le ā na silafia e Ieova a o ia suʻesuʻeina le loto o Tavita? Ua taʻua faalogona o Tavita i le Salamo 51, e pei ona faaalia i le ulutala e faapea “O le salamo a Tavita ina ua alu atu le perofeta o Natano iā te ia, ina ua uma ona alu ane o ia iā Patesepa.” Ua taʻua i le Salamo 51:1-4: “Le Atua e, ia e alofa mai iā te aʻu, e tusa ma lou lava alofa; e tusa ma le tele o lou alofa mutimutivale, ia e sōloiesea oʻu solitulafono. Ia e matuā fufulu mai iā te aʻu i laʻu amio leaga, ma ia e faamamā mai iā te aʻu i laʻu agasala. Auā ua ou iloa e aʻu loʻu solitulafono; e lē aunoa foʻi ona i ai i oʻu luma o laʻu agasala. Ua ou agasala atu iā te oe, na o oe lava; ua ou faia foʻi lenei mea leaga i ou luma.” E lē taumatea na silafia e Ieova le matuā faanoanoa o le loto o Tavita, o se faamaoniga lea o le salamō moni ma manatu ai e talafeagai ona faaalia le alofa mutimutivale iā te i laʻua na agasala. E lē gata i lea, o Tavita o se tagata alofa mutimutivale, ma e alofa atu Ieova i ē alofa mutimutivale. (1 Samuelu 24:4-7; Mataio 5:7; Iakopo 2:13) O lea, ina ua taʻutino atu e Tavita lana agasala, na taʻu atu e Natano iā te ia: “Ua aveeseina lau agasala e Ieova, e te lē oti ai.”—2 Samuelu 12:13.
E lē sao mai Tavita ma Patesepa mai āuga leaga uma o le agasala na la faia. Na taʻu atu e Natano iā Tavita: “Ua e faatupu mai le ʻinoʻino o ē ita iā Ieova i lenei mea, o le mea lea e oti ai lava le tama ua fanau mai iā te oe.” E ui i anapogi ma le faavauvau o Tavita mo aso e fitu, ae na maʻi lava la laʻua tama ma oti ai.—2 Samuelu 12:14-18.
E faigatā ona malamalama isi i le māfuaaga na oti ai le tama, talu ai o loo taʻua i le Teuteronome 24:16: “Aua foʻi neʻi fasiotia le atalii, e sui aʻi le tamā.” Peitaʻi, e ao ona tatou manatua, pe ana tuu atu i tagata latou te faia le faamasinoga, semanū e fasiotia uma le tamaitiiti ma ona mātua. O le oti o le atalii o Tavita, e ono matuā manino ai iā te ia le lē fiafia o le finagalo o Ieova i la laʻua agasala ma Patesepa. Ua tatou mautinoa ai, e taulimaina ma le saʻo e Ieova le mataupu auā e “saʻo lava lona ala.”—2 Samuelu 22:31.
[Ata i le itulau 31]
Na faaalia e Tavita le salamō moni