Le Fuafuaga a le Atua mo le Lalolagi ua Toeitiiti Ona Faataunuuina

A O IAI pea Atamu ma Eva i le Parataiso, na la mauaina le faatonuga lenei mai le Atua: “Ia fanafanau ia, ma ia uluola, ma ia tumu ai le lalolagi, ia faatoʻilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.”—Kenese 1:28.

O le faatoʻilaloina o le lalolagi, e lē na o le galueaʻiina o sina vaega. Sa manaʻomia e Atamu ma Eva ma a la fanau ona faalautele le Parataiso seʻia soo ai le lalolagi aoao. Peitaʻi na agasala le uluaʻi ulugalii ma na tuliesea ai i laʻua mai le faatoʻaga o Etena. (Kenese 3:23, 24) Ae e leʻi avea lenā tulaga ma mea o le a lē faatoʻilaloina pe galueaʻiina ai le lalolagi.

Talu ai o le a faamanuiaina e le Atua tagata usiusitai, o le a mafai lava la ona latou galueaʻiina le lalolagi. I taimi sa faamanuia ai le Atua i tagata o Isaraelu anamua, sa fua tele mai a latou faaeleeleaga aemaise foʻi fua o togālaau ʻaina. O le a faapena foʻi tulaga e oo i ai, pe a faasolosolo mālie ona avea le lalolagi ma parataiso. E pei ona folafola mai e le Atua i lana Afioga le Tusi Paia, o le a “fua mai e le laueleele ona lava fua; o le Atua, o lo matou Atua lava na te faamanuia mai i matou.” (Salamo 67:6) O le iʻuga, o le a olioli ai le vao muʻa o le lalolagi ma atumauga, laau ma fugālaau, faapea ma vaitafe ma sami. (Salamo 96:11-13; 98:7-9) O le a tumu le lalolagi i laau lauolaola, manu felelei felanulanuaʻi, manu matagofie ma tagata faaleuō ma māfana.

Ua Lata Mai se Lalolagi Fou!

Ua tatou tulata atu nei i le lalolagi fou pei ona folafolaina mai e Ieova. Na tusi le aposetolo o Peteru: “A e faatalitali i tatou i le lagi fou ma le lalolagi fou, pei o lana na folafola mai, e mau ai lē amiotonu.” (2 Peteru 3:13) Pe a faitau nisi i upu a Peteru, latou te ono manatu o le a lē taitai ona avea lenei paneta ma parataiso. Latou te manatu o le a suia le lagi faitino ma le lalolagi o loo i ai nei. Pe e moni lenā mea?

O le ā o loo faasino i ai le “lagi fou”? E lē o le lagi faitino lea na foafoaina e le Atua. (Salamo 19:1, 2) I isi fuaiupu muamua atu na faasino ai Peteru i se “lagi” faafaatusa po o taʻitaʻi o malo faaletagata ia e sili aʻe pe e maualuga na i lo o latou tagatānuu. (2 Peteru 3:10-12) O ia “lagi” po o malo, ua lē taulau ona latou pulea tagata ma o le a mou atu. (Ieremia 10:23; Tanielu 2:44) O le “lagi fou” lea o le a suitulaga ai, o le Malo o le Atua, e faia aʻe i le Tupu o Iesu Keriso ma le 144,000 lea o le a latou pule faatasi, ua faatutūina aʻe i le ola faalelagi.—Roma 8:16, 17; Faaaliga 5:9, 10; 14:1, 3.

O le “lalolagi fou” lea na taʻua e Peteru e lē o se paneta fou. Ua uma ona foafoaina e Ieova le lalolagi e talafeagai mo tagata ina ia ola ai e faavavau. (Salamo 104:5) I nisi taimi, e faasino ai le Tusi Paia i tagata, pe a taʻua “le lalolagi.” (Kenese 11:1) O le lalolagi lea o le a faaumatia, o tagata ua avea ma le loto i ai i latou ma vaega o lenei lalolagi amioleaga. I se tulaga tutusa, na faaumatia le lalolagi o tagata faalēmataʻu, i le Lolo i aso o Noa. (2 Peteru 3:5-7) O le ā la le “lalolagi fou”? O se sosaiete fou o tagata—o tagata tapuaʻi moni o le Atua, o ē “ua tonu o latou loto.” (Salamo 125:4; 1 Ioane 2:17) O tulafono uma o le “lalolagi fou” o le a aumaia mai le “lagi fou.” O le a faamautinoa e tane faamaoni i le lalolagi, le usitaia o na faatonuga po o tulafono.

O le a Iai ni Suiga Fou ma le Matagofie!

Na aumaia e Ieova se nofoaga matagofie iā i tatou, ina ua Ia saunia le lalolagi mo tagata e ola ai. O ia lava na faapea mai e uiga i ana galuega o i le lalolagi, ua “lelei lava.” (Kenese 1:31) Sa faaosoosoina e Satani le Tiapolo ia Atamu ma Eva ina ia fouvale. (Kenese 3:1-5; Faaaliga 12:9) Peitaʻi, ua lē o toe umi se taimi ona gaoioi loa lea o Ieova ia maua e ē amiotonu le “ola moni lava.” O le ‘ola e faavavau’ i lalo o tulaga lelei atoatoa i le Parataiso. (1 Timoteo 6:12, 19) Seʻi o tatou iloiloina nisi o faamanuiaga o le a olioli ai tagata i lenā taimi.

I le Afe Tausaga o le Pulega a Keriso, o le a saisaitia ai Satani ma o le a lē mafai ona ia toe aumaia puapuaga i tagata. Na faapea mai le aposetolo o Ioane: “Na aʻu iloa foʻi le agelu [le agelu sili o Mikaele, po o Iesu Keriso] ua alu ifo i le lagi, ua iā te ia le ki o le tō e lē gata, ua i lona lima foʻi le maea uʻamea tele. Ua puʻe foʻi e ia le tarako, o le gata tuai, o le tiapolo lea ma Satani, ua ia fusifusi foʻi iā te ia i tausaga e afe. Ua ia lafo foʻi iā te ia i le tō e lē gata, ua pupuni foʻi iā te ia, ma tuuina atu le faamaufaailoga i ona luga, ina ia lē toe faasesēina e ia o nuu, seʻia atoa ia tausaga e afe.” (Faaaliga 20:1-3; 12:12) E lē gata ina saʻoloto tagata mai taʻaiga a Satani a o saisaitia i le tō e lē gata, ae o le a olioli tagata i le tele o isi faamanuiaga i le pulega a le Malo.

O le a lē toe i ai le amioleaga, faiga sauā ma faigātaua. O loo folafola mai i le Tusi Paia: “E toe itiiti, ona leai lea o le tagata amio leaga; e te mafaufau foʻi i le mea sa i ai o ia, a e leai lava. A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele. E fai lava le nuu mo tagata amiotonu, e nonofo ai pea i latou.” (Salamo 37:10, 11, 29) O le a “faaiʻua e ia [Ieova le Atua] o taua e oo lava i tuluʻiga o le lalolagi.” (Salamo 46:9) Maʻeu se faamautinoaga matagofie o le filemu ma le saogalemu o le a iai!

O le a anoanoaʻi taumafa lelei mo le soifua mālōlōina. Na pese le faisalamo: “E taumafa o saito i le nuu i tumutumu lava o mauga.” (Salamo 72:16) O le a leai se tasi i lenā taimi e toe fia ʻai.

O le a leai se isi e toe puapuaga ona o le maʻi ma faamaʻi. Ioe, o le a lē toe “fai mai foʻi se tasi ua mau ai, Ou te maʻi.” (Isaia 33:24; 35:5, 6) I taimi a o iai Iesu i le lalolagi, na ia faamālōlōina ai tagata lepela, pipili ma tauaso. (Mataio 9:35; Mareko 1:40-42; Ioane 5:5-9) O lea, seʻi manatu i le mea o le a ia faia i le lalolagi fou! Seʻi manatu i le fiafia o le a i ai pe a faamālōlōina ē tauaso, logonoa, pipili ma ē gūgū.

A o faasolosolo ina lelei atoatoa tagata usiusitai, o le a aveesea ma āuga o le soifuaga matua. O le a lē toe manaʻomia ni matatioata, tootoo, nofoa faataavalevale, falemaʻi ma vailaau faafomaʻi. Maʻeu ni suiga o le a iai a o toe faafoʻisia mai le malosi lea sa iai a o talavou! (Iopu 33:25) O le a tatou alafaʻi mai i taeao taʻitasi mai i se mālōlōga lelei i le pō, ma le malosi ua faafouina e sauni atu mo galuega o le aso e faafiafia ai.

O le a toe faatutūina aʻe ē pele ma isi tagata nai le oti, o le a aumaia ai le olioli i o tatou loto. (Ioane 5:28, 29; Galuega 24:15) Maʻeu le faagaee loto i le faafeiloaʻi atu iā Apelu, Noa, Aperaamo, Sara, Iopu, Mose, Ruta, Tavita, Elia, Eseta, ma le toʻatele o isi! E faitau miliona foʻi isi o le a toe faatutūina. O le toʻatele o i latou e leʻi aʻoaʻoina e faatatau iā Ieova, ae o le a faafeiloaʻia i latou e tagata o ē naunau e aʻoaʻo i latou e faatatau i le Atua, ana fuafuaga ma lona alo o Iesu Keriso. A o faasolo ina iloa e i latou na faatutūina aʻe Lē na foafoaina i latou, o le a moni ma atoatoa ai loa ona faatumuina le lalolagi i le poto e uiga iā Ieova.

E sili atu i mea uma lava, o le a tatou tapuaʻi i le Atua moni e toʻatasi e oo i le faavavau. O le a tatou maua le faaeaga e “auauna atu iā Ieova ma le fiafia,” ma galulue ai ma le autasi i le fausia o fale matagofie, faatoʻaina o le laueleele ma oo ina faatoʻilaloina ai le lalolagi atoa. (Salamo 100:1-3; Isaia 65:21-24) Maʻeu le fiafia o le a i ai, i le ola e faavavau i se parataiso e fua tele mai, filemu, ma matagofie ma o le a faamamaluina ai le suafa o Ieova!—Salamo 145:21; Ioane 17:3.

Se Tofotofoga Mulimuli mo Tagata

A o faagasolo lana Pulega i le Afe Tausaga, o le a faatatauina mai e Iesu i tagata taʻitoʻatasi e usiusitai, aogā o lana taulaga togiola. Mulimuli ane, o le a aveesea le tulaga agasala, ae siitia le fanau a tagata i le lelei atoatoa. (1 Ioane 2:2; Faaaliga 21:1-4) Pe a aveesea uma āuga o le agasala a Atamu, o le a ausia ai loa e tagata lelei atoatoa tapulaa a le Atua i le tulaga faaletino, faalemafaufau, tau amio ma le faaleagaga. Ma o le taimi lenā o le a “toe ola” ai i se tulaga atoatoa ona lelei, auā ua lelei atoatoa uma ma lē toe i ai se agasala. (Faaaliga 20:5) O le a avea lenei tulaga atoa ai ma le lalolagi parataiso o se mea e viia ai Ieova!

I se taimi puupuu lava, pe a uma le Pulega o le Afe Tausaga a Keriso, o le a toe tatalaina mai ai Satani ma ana temoni, po o ana agelu amioleaga mai le tō e lē gata lea na lafoina i ai i latou i le sefulu senituri talu ai. (Faaaliga 20:1-3) O le a faatagaina i latou ina ia faia sa latou taumafaiga mulimuli e faaliliueseina tagata mai le Atua. E ui o le a lolo atu nisi i o latou tuʻinanauga sesē, ae o le a lē taulau lenei tulaga fouvale. O le a faaumatia e Ieova i latou uma lava o ē fouvale manatu faapito faatasi ai ma Satani ma ana temoni. O le a lē toe i ai le amioleaga. O tagata fai mea leaga uma lava o le a lē toe i ai seʻia oo i le faavavau, a o ē amiotonu o le a mauaina le ola e faavavau.—Faaaliga 20:7-10.

Po o le a E Iai i Inā?

O loo taatia mai luma mo tagata e alolofa iā Ieova le fiafiaga e faavavau. O le a lē iai se mea e fiu ai, i le ola e faavavau i le Parataiso. O le mea moni, o le a tele mea matagofie o le olaga e faafiafiaina ai a o faasolo ina mavae atu taimi, auā e leai se mea e gata mai ai le atamai o Ieova le Atua. (Roma 11:33) O le a e aʻoaʻoina se mea fou i taimi uma ma o le a tele se taimi e te aʻoaʻoina ai. Aiseā? Auā o le a soifua, e lē mo le 70 po o le 80 tausaga, ae e faavavau.—Salamo 22:26; 90:10; Failauga 3:11.

Pe afai e te alofa i le Atua, o le a e fiafia foʻi e faia e lē aunoa lona finagalo. Na tusi le aposetolo o Ioane: “Auā o lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga.” (1 Ioane 5:3) O lea la, aua neʻi faatagaina se mea e faalavelavea pe taofia ai lou faafiafiaina o Ieova le Atua e ala i le faia o le mea saʻo. Ia manatua le faamoemoe matagofie o loo folasia mai i le Tusi Paia mo oe. Ia e maumauaʻi e faia le finagalo o Ieova, ma aua neʻi toe see ese ai mai le ala lenā. Ona mautinoa ai lea, o le a e iai i inā pe a faataunuuina le fuafuaga a le Atua mo le lalolagi, ma avea o se parataiso e faavavau.

[Ata i le itulau 4]

O faamanuiaga a le Atua iā Isaraelu, na fua tele ma ai faatoʻaga

[Ata i le itulau 7]

O ā ni faamanuiaga e te faamoemoe e fiafia ai i le Parataiso?