Le Fanau Mai o Iesu Le Auala e Aumaia ai le Filemu

O LE folafolaga o le ‘manuia i tagata ua alofagia,’ e lē na o le pau lea o le valoaga e fesootaʻi atu i le fanau mai o Iesu. E lē gata i le folafolaga a agelu i leoleo mamoe, ae na faia foʻi e agelu ni folafolaga na faagaeeina e le Atua iā Maria ma lana tane o Iosefa, e uiga i le fanau mai o Iesu. O le iloiloina o nei feʻau o le a fesoasoani e faalautele ai lo tatou iloa i le fanau mai o Iesu, ma malamalama ai i le tāua moni o folafolaga a agelu i le manuia po o le filemu mo tagata.

A o leʻi fanau mai Iesu, ma e leʻi tō foʻi Maria, na asiasi atu iā te ia se agelu lea e taʻua i le Tusi Paia, o Kaperielu. Na ia faapea atu: “Si oʻu alofa iā te oe lē ua alofaina, ua iā te oe le Alii.” Atonu o e tau mafaufau i le atuatuvale ma le popole o Maria. O le ā le uiga o lenei faafeiloaʻiga?

Na faamatala e Kaperielu: “Faauta foʻi, o le a tō oe, ma e fanauina se tama tane, e te faaigoa iā te ia o Iesu. E sili o ia, e taʻua foʻi o le Alo o le Silisili ese; e foaʻi atu e le Alii le Atua iā te ia le nofoaiga a Tavita lona tamā, e fai o ia ma tupu i le aiga o Iakopo e faavavau; o lona malo foʻi e leai sona gataaga.” Na fesili atu Maria pe faapefea ona tupu lenei mea ona o ia o se taupou, e leʻi feusuaʻi ma se tane. Na tali Kaperielu, o le a maua le tama e ala mai i le agaga paia o le Atua, ae lē o le tulaga e masani ai.—Luka 1:28-35.

Se Tupu na Valoia Mai

E lē taumatea na fesoasoani upu a Kaperielu iā Maria e malamalama ai, o le tama lea o le a ia fanauina mai sa faatatau i ai valoaga anamua. O le faailoaina mai o le a avatu e Ieova i le tama a Maria le “nofoaiga a Tavita lona tamā,” o le a mafaufau ai Maria ma so o se tagata Iutaia e masani i le Tusi Paia, i le folafolaga a le Atua na faia i le tupu Isaraelu o Tavita.

E ala i le perofeta o Natano, na fetalai Ieova iā Tavita: “Ou te faatumauina lou aiga ma lou malo e faavavau i ou luma; e mausalī lou nofoālii e faavavau.” (2 Samuelu 7:4, 16) Na fetalai Ieova e faatatau iā Tavita: “Ou te tofia lana fanau ia faavavau, o lona nofoālii foʻi e pei o aso o le lagi. E faavavau lava lana fanau, o lona nofoālii foʻi e pei o le lā lea i oʻu luma.” (Salamo 89:20, 29, 35, 36) Ioe, e lē o se mea na tupu fua le tupuga mai o Maria ma Iosefa mai le gafa o Tavita.

E lē na o le pau na o valoaga i le Tusi Paia Eperu e faatatau i le alo tautupu o Tavita. Na masani Maria i le valoaga a Isaia: “Ua fanau mai mo i tatou le tama, ua foaʻiina mai mo i tatou le atalii, e i lona ua le malo, e igoa foʻi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu. E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausalī i le faamasinoga ma le amiotonu, e afua mai i ia ona pō e oo i le faavavau; e faia lea mea i le maelega o Ieova o ʻau.”—Isaia 9:6, 7.

O le feʻau na folafola atu e Kaperielu iā Maria, e iai sona aogā e sili atu na i lo le fanau faavavega mai o le tama. O le a avea lana tama ma suli o le tupu o Tavita—e tumau, e faavavau lona tulaga i se malo ua faavae e le Atua. E iai se uiga loloto mo i tatou uma o valoaga a Kaperielu e faatatau i le matafaioi a Iesu i le lumanaʻi.

Ina ua iloa e Iosefa ua tō lē o le a avea ma ana avā, sa ia manatu ai loa e tatala le la faamau. Na ia iloa e lē o ia e ana le pepe auā e leʻi feusuaʻi ma Maria. Seʻi taumānatu la i le faigatā ona talitonu o Iosefa i le faamatalaga a Maria i le māfuaaga o lana tō. Ua taʻua i le Tusi Paia: “Ua faaali mai iā te ia le agelu a le Alii i le miti, ua faapea mai, ‘Iosefa e, le atalii o Tavita, aua e te fefe inā au mai iā te oe o Maria lau avā; auā o lana tō mai le Agaga Paia lea. E fanau mai e ia le tama tane, e te faaigoa foʻi iā te ia o Iesu; auā e faaola e ia lona nuu ai a latou agasala.’”—Mataio 1:20, 21.

E lē o taʻua mai i le Tusi Paia po o le ā le tele o le iloa o Iosefa i le auala ‘o le a faaola ai e le tama lona nuu ai a latou agasala.’ Peitaʻi, ua lava lea feʻau e faamautinoa atu ai iā Iosefa e leai se mea sesē na fai e Maria. Sa ia faia e pei ona faatonu atu e le agelu ma ave Maria i le fale, o se gaoioiga e talitutusa ma se faaipoipoga.

E faafetaia ai isi faamatalaga o loo i le Tusi Paia, ua mafai ai ona tatou iloa le uiga o le tala a le agelu. I le amataga o le talafaasolopito o tagata, sa iai se agelu fouvale na luʻia le pule silisili ese a Ieova. Na taʻua i le Tusi Paia Eperu o se tasi o tuuaʻiga a lenei fouvalega e faapea, e lē tonu le pule a le Atua ma o le a leai se tasi e faamaoni pea iā Ieova pe a tofotofoina. (Kenese 3:2-5; Iopu 1:6-12) O Atamu o se tasi o i latou e leʻi tumau lona faamaoni. O le iʻuga o lana agasala ua tuufaasolo mai i tagata uma, ma iʻu ai i le oti. (Roma 5:12; 6:23) Peitaʻi na fanau mai Iesu e lē agasala ona e lē o sona tamā se tagata. O lona finagalo malie e avatu lona soifua lelei atoatoa e fai ma togiola lea e tutusa lelei ma le ola na leiloa iā Atamu, na mafai ai ona ia faasao tagata mai a latou agasala, ma avatu i ai le faamoemoe o le ola e faavavau.—1 Timoteo 2:3-6; Tito 3:6, 7; 1 Ioane 2:25.

I le taimi o le faiva a Iesu i le lalolagi, na ia faailoa mai ai se faataʻitaʻiga o mea o le a oo iai pe a aveesea āuga o le agasala. Na ia faasaʻoloto tagata mai so o se ituaiga o maʻi o le tino ma faatutū ē na maliliu. (Mataio 4:23; Ioane 11:1-44) O na vavega o se faaataga o mea o le a ia faia i le lumanaʻi. Na fetalai Iesu: “Auā e oo mai le aso e faalogo ai i lona leo o i latou uma ua i tuugamau, ma latou ō mai ai.”—Ioane 5:28, 29.

Ua faamatala mai e le valoaga o le toe tū i le lumanaʻi le pogai e sili ai ona tāua iā i tatou le fanau mai—aemaise ai lava le maliu—o Iesu. Ua taʻua i le Ioane 3:17, na auina mai e le Atua lona Alo ina “ia faaolaina le lalolagi iā te ia.” Ua faamanatu mai e lenei tala matagofie iā i tatou le folafolaga na faia i leoleo mamoe, na leoleo a latou lafu i le pō na fanau mai ai Iesu.

“Tala Lelei o le Olioli Tele”

O se “tala lelei o le olioli tele” i tagata ina ua folafola atu e agelu o le a fanau mai “le Faaola, o ia o Keriso le Alii.” (Luka 2:10, 11) O le a avea le tama ma Mesia, le Perofeta sili ma le Faipule, lea ua leva ona faatalitalia e tagata o le Atua. (Teuteronome 18:18; Mika 5:2) O lona soifuaga ma lona maliu i le lalolagi, e faaautū atu i le faamaonia o le pule silisili a Ieova, ina ia mafai ai ona faapea mai agelu: “O le viiga i le Atua i mea aupitoaluga.”—Luka 2:14.

Na faaalia e Iesu lea e taʻua i le Tusi Paia o le “Atamu mulimuli,” e mafai e se tasi ona faamaoni iā Ieova e ui i tofotofoga sili ona matuiā. (1 Korinito 15:45) Na ia faamaonia ai Satani o sē e pepelo amioleaga. O le māfuaaga lea o le olioli o agelu faamaoni i le lagi.

Seʻi tatou toe foʻi la i le fesili, “Pe e iai se faamoemoe moni e faataunuuina le folafolaga a agelu i le pō na fanau mai ai Iesu?” O le tali iai, ioe! O le filemu o se tulaga e tatau ona iai i le faataunuuina o le finagalo o le Atua mo le lalolagi, lea e aofia ai le toe faafoʻisia o tulaga o mea i le parataiso. Pe a taunuu lea tulaga i le lalolagi, o le a uunaʻia tagata uma e le alofa ma le faamaoni. O le faataunuuina la o le finagalo o Ieova, e uiga atu foʻi i le aveesea o i latou uma e tetee i lana pule silisili ese. E lē o se tala fiafia lenei mo so o se tasi e lagolagoina le itu a Satani i le faapea mai e leaga tapulaa a Ieova. O le a faaumatia uma i latou.—Salamo 37:11; Faataoto 2:21, 22.

Faamolemole ia mātau, e leʻi fai atu agelu i leoleo mamoe o le a maua le manuia po o le filemu ma le alofagia e tagata uma. Na i lo lea, na latou folafola atu le ‘manuia i tagata ua alofagia.’ O ē ua finagalo malie i ai le Atua ma ua alofagia e ia. O i latou ua faaalia le faatuatua moni iā Ieova, ua avea ma soo faamaoni ma faataʻitaʻi iā Iesu. Ua lotomalilie ia alii ma tamaʻitaʻi e agalelei ma faauō atu i isi, e lē na o ni nai aso ae o aso uma o le tausaga.

Pe Iai Pea le Agaga Faa-Kerisiano i Aso Uma o le Tausaga?

O le malosi o le tala lelei na talaʻia e Iesu, na aafia ai olaga o tagata e toʻatele. E toʻatele na faataʻitaʻia taʻiala faa-Kerisiano i vala uma o o latou olaga. Na amata fesili ifo tagata sa mafaufau na o i latou lava, po o le ā atonu e faia e Iesu pe ana o ia lea o loo i lo latou tulaga. Na iloa e nisi na faamuamua mea faitino ma fiafiaga i o latou olaga, le tāua o mea faaleagaga ma le faasoaina atu o ia mea i o latou tuaoi. E taumafai tagata o loo faia faapea, e foaʻi ma agalelei i aso uma o le tausaga. Pe e lē o le mea ea lea e faatalitalia mai Kerisiano moni?

Pe a mafaufau mo sina taimi tagata faamaoni uma i le tāua o le feʻau a agelu i le filemu, ma gaoioi e ōgatusa ma ia mafaufauga, e mautinoa o le a avea le lalolagi o se nofoaga lelei.

O valoaga e faatatau i le fanau mai o Iesu e faamautinoa ai i ē ua alofagia e le Atua, e mafai ona latou maua le filemu moni e faavavau. Pe e lē o lou faanaunauga ea lenā? E tatou te mautinoa o le a taunuu le filemu lea na folafola mai faavaloaga e agelu i le aso na fanau mai ai Iesu. E uigā moni lava na upu, ma e mautinoa o le filemu o se mea moni e faavavau.

[Ata i le itulau 7]

E mafai ma e ao ona faaalia le agaga faa-Kerisiano i aso uma o le tausaga