O Lesona Tatou te Aʻoaʻoina Mai iā Iesu

E Tusa o Tatalo e Faafofogaina e le Atua

Sa saʻili pea e Iesu nofoaga e fai ai ana tatalo na o ia, ma o lana timaʻiga foʻi lea i ona soo. Ua faapea mai le Tusi Paia: “Ua iai o ia i se tasi nofoaga o loo tatalo ai, ua uma lana tatalo, ona faapea mai lea o se tasi o ona soo iā te ia: ‘Le Alii e, ia e aʻoaʻo mai iā i matou i le tatalo,’ . . . Ona ia fetalai atu lea iā i latou: ‘Ia faapea ona outou tatalo, “Lo matou Tamā e, ia faapaiaina lou suafa.”’” (Luka 5:16; 11:1, 2) E tusa ai ma le fetalaiga a Iesu, e na o Ieova le Tamā e ao ona tatou tatalo i ai. Auā o Ia na faia i tatou, ma o ia foʻi o “Le faafofoga tatalo.”—Salamo 65:2.

Pe talia e le Atua tatalo uma?

E lē fia faafofoga le Atua i tatalo e faifai pea faatauloto. Na taʻu mai e Iesu e faapea: “Pe a e tatalo, aua le faia soo au upu masani.” (Mataio 6:7) E ao lava ona tatou faailoa atu i lo tatou Tamā mea o loo i o tatou loto. Na faamanino e Iesu i ona soo e faapea, e sili ona fiafia le Atua i tatalo a lē e agasala ae naunau moni lava e sui, na i lo le tagata e toʻaga e fai mea faalelotu ae faamaualuga. (Luka 18:10-14) O lea la, e ao ona lotomaulalo ma taumafai ia faia le finagalo o le Atua ina ia faafofogaina ai a tatou talosaga. Na fetalai foʻi Iesu e faapea: “E pei ona aʻoaʻo mai e le Tamā iā te aʻu, o mea ia ou te tautala atu ai . . . Ou te faia pea mea e fiafia i ai lona finagalo.” (Ioane 8:28, 29) Ma na ia taʻua i lana tatalo: “E lē o loʻu loto, ae ia faia lou finagalo.”—Luka 22:42.

O ā mea e tatou te tatalo atu ai?

Talu ai ona ua taʻuleagaina le suafa o le Atua, o lea na fetalai ai Iesu: “Ia faapea ona outou tatalo: ‘Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.’” (Mataio 6:9, 10) E ao ona tatou tatalo ia oo mai le Malo o le Atua, auā o le malo lea e faataunuu ai e le Atua lona finagalo i le lagi atoa ma le lalolagi. Na fetalai foʻi Iesu ia tatou tatalo mo “meaʻai e tatau mo le aso.” Ma ia talosaga atu foʻi e tusa o galuega, mea e nonofo ai, o lavalava, o mea e faatatau i lo tatou soifua mālōlōina, ma isi lava atugaluga o iai. E lē gata i lea, na fetalai mai Iesu, ia tatalo ina ia faamagaloina i tatou.—Luka 11:3, 4.

Pe e tatau ona tatou tatalo mo isi?

Na tatalo foʻi Iesu mo isi, auā ua fai mai le Tusi Paia: “Ona aumaia ai lea o tamaiti iā te ia, ina ia paʻi atu iā i latou ma tatalo.” (Mataio 19:13) Na fetalai atu foʻi Iesu i le aposetolo o Peteru: “Ua ou faatoga atu mo oe, ina ia aua neʻi mou atu lou faatuatua.” (Luka 22:32) Ma na faalaeiauina foʻi e Iesu ona soo ina ia tatalo mo isi, e oo lava i ē o loo sauā ma faifai atu iā i latou.—Mataio 5:44; Luka 6:28.

E lē tatau ona tatou faavaivai e tatalo, aiseā?

Na faaavanoa e Iesu lona taimi e tatalo ai ma na uunaʻia foʻi ona soo ina “ia tatalo e lē aunoa, ma ia aua le faavaivai.” (Luka 18:1) Ua valaaulia i tatou e Ieova ia tatou faatuatua atu iā te ia e ala i le tatalo atu pea e tusa o o tatou popolega. Na fetalai mai Iesu: “Ia talosaga atu pea, ona foaʻiina mai lea iā te outou.” O lona uiga, e lē faapea e lē fia tali mai Ieova le Tamā i ē alolofa ma āva iā te ia. Auā na fetalai o Ia: “O outou o ē leaga, afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē ōle atu iā te ia!”—Luka 11:5-13.

[Ata i le itulau 16]

E maua isi faamatalaga i le mataupu e 17 o le tusi O ā Aʻoaʻoga Moni a le Tusi Paia?a

[Faaopoopoga i lalo]