Ia Mafuta Atu i le Atua
“O Aʻu o Ieova lo Outou Atua e Paia Lava Aʻu”
“E PAIA, e paia, e paia o Ieova le Atua.” (Faaaliga 4:8) O upu na ua faamatalaina ai e le Tusi Paia Ieova e paia, e aofia ai le matuā mamā ma le amio saʻo. E matuā vavaeese lava Ieova mai i agasala; e lē faaleagaina pe pisipisia o ia i agasala. Po o lona uiga ua matuā vavaeese tagata lē lelei atoatoa mai i le Atua e aunoa ma se faamoemoe? E matuā leai lava! Seʻi o tatou iloiloina upu e aumaia ai le faamoemoe o loo faamauina i le Levitiko mataupu e 19.
Na fetalai atu Ieova iā Mose e faapea: “Fai atu ia i le faapotopotoga uma o le fanauga a Isaraelu.” O loo faatatau atu upu o loo mulimuli mai i tagata uma o le nuu. O le ā na taʻu atu e Mose iā i latou? Sa toe faapea mai le Atua: “Ia faapea atu iā i latou, Ia paia outou; auā o aʻu o Ieova lo outou Atua e paia lava aʻu.” (Fuaiupu e 2) Sa tatau i tagata Isaraelu uma ona mamā. O le upu “ia,” e faailoa mai ai o lenei mea o se faatonuga, ae lē o se fautuaga. Pe na faatalitalia e le Atua se mea e lē mafai ona faia e tagata?
Ia mātau, e leʻi taʻua e Ieova lona paia e na o se tapulaa ina ia tutusa ai, ae o se pogai mo le poloaʻiga. I se isi faaupuga, e leʻi taʻu atu e Ieova i ona tagata tapuaʻi lē lelei atoatoa i Isaraelu ina ia paia e pei o ia. Auā e lē mafai lenā mea. O Ieova o Lē e silisili ona “paia,” e silisili atu i lo o isi uma lava. (Faataoto 30:3) Ae peitaʻi, ona o Ieova e paia, e faatalitalia la e ia ona tagata tapuaʻi ina ia paia. O lona uiga, i se tulaga e talafeagai mo tagata lē lelei atoatoa. I ā auala e mafai ona paia ai i latou?
Ina ua uma ona tuuina atu le faatonuga ia paia, sa taʻu atu e Ieova e ala iā Mose o mea e manaʻomia ona fai i vala uma o le olaga. Sa faatalitalia tagata Isaraelu taʻitoʻatasi ina ia usiusitai i tapulaa tau amio e pei o lenei: ia faaalia le āva i mātua ma tagata matutua (fuaiupu e 3, 32); ia magafagafa i ē tutuli ma ē tauaso, ma isi tagata matitiva (fuaiupu e 9, 10, 14); ia faamaoni ma ia faia le mea tonu i feutagaʻiga ma isi (fuaiupu e 11-13, 15, 35, 36); ma ia alofa i lona tuaoi e pei ona alofa iā te ia lava. (Fuaiupu e 18) O le usitaia o nei tapulaa ma isi tapulaa na taʻua, o le a mafai ai e se tagata Isaraelu ona ʻpaia foʻi o ia mo lona Atua.’—Numera 15:40.
O le poloaʻiga e faatatau i le paia, ua tatou maua ai se malamalamaaga tāua i manatu ma ala o Ieova le Atua. O se tasi o mea ua tatou aʻoaʻoina ina ia iai se faiā māfana ma ia, e manaʻomia foʻi ona tatou faia le mea e sili ina ia ola ai e ōgatusa ma ana tapulaa o amioga paia. (1 Peteru 1:15, 16) O le pipiimau i na tapulaa, e mafai ona tatou olioli ai i le ala e aupito sili ona lelei o le olaga.—Isaia 48:17.
O loo faaatagia mai foʻi i le faatonuga ia paia, le mautinoa o Ieova i ona tagata tapuaʻi. E lē taitai faatalitalia e Ieova i tatou ia faia mea e tatou te lē gafatia. (Salamo 103:13, 14) E na te silafia o i tatou o tagata na faia i lona faatusa, ma ua iā i tatou le tomai e atiaʻe ai le tulaga paia e ui lava ina lē atoatoa. (Kenese 1:26) Pe e lē uunaʻia ai ea oe e fia iloa atili le auala e mafuta vavalalata atu ai iā Ieova le Atua paia?
[Ata i le itulau 9]
Ua iā i tatou le tomai e atiaʻe ai le tulaga paia