Ua Lata Mai le “Aso ua Tuupōina”

I LE pei o le perofeta o Sapakuka, na moomoo soo o Iesu e vāai atu ua faaiʻuina mafatiaga. O le iloaina o le mea o le a faia e le Malo o le Atua ina ia faasaʻo ai mea i le lalolagi, na latou fesili atu ai iā Iesu: “Pe e oo afea ia mea, ma o le ā foʻi le faailoga o lou faatasi mai [i le mana o le Malo], ma le iʻuga o [le] faiga o mea a le lalolagi?” (Mataio 24:3) Na tali atu Iesu e faapea, e na o Ieova le Atua e na te silafia le taimi tonu o le a pulea atoatoa ai e lona Malo le lalolagi. (Mataio 24:36; Mareko 13:32) Peitaʻi, na valoia e Iesu ma isi ni mea patino o le a tutupu i le lalolagi, e iloa ai ua lata mai le taimi.—Tagaʻi i le pusa i le itu taumatau.

Pe e te lē ioe ua taatele nei mea i aso nei? Na valoia foʻi e Iesu o le a faataunuuina se galuega talaʻi i le lalolagi atoa. Na ia fetalai: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.”—Mataio 24:14.

O le tulaga tonu lenā o loo tupu i aso nei. O loo faia e Molimau a Ieova lenā galuega. I atunuu e tusa ma le 236, e silia i le fitu miliona Molimau a Ieova o loo latou taʻuina atu i tagata mea o le a faia e le Malo, ma fesoasoani atu iā i latou ina ia ola e tusa ai ma tapulaa amiotonu a le Atua, o lē e finagalo ia faaiʻuina mafatiaga ma tigā. Ia faaauau ona aʻoaʻo e faatatau i le Malo o le Atua, ma o le a e maua ai le faamoemoe e ola e faavavau i se lalolagi e aunoa ma mafatiaga.

[Pusa i le itulau 8]

O Mau o Loo Faasino Atu i Aso e Gata Ai

MATAIO 24:6, 7; FAAALIGA 6:4

• Taua e lē mafaatusalia

MATAIO 24:7; MAREKO 13:8

• Mafuiʻe tetele

• Oge

LUKA 21:11; FAAALIGA 6:8

• Faamaʻi

MATAIO 24:12

• Faatuputeleina le amioleaga

• Maalili le alofa

FAAALIGA 11:18

• Faaleagaina le laueleele

2 TIMOTEO 3:2

• Mananaʻo tele i tupe

• Faalogogatā i mātua

• Alofa le tagata iā te ia lava

2 TIMOTEO 3:3

• E leai se lotoaiga

• E mumusu tagata i maliega

• Ua leai se amio pulea i so o se tagata

• Faateleina le lē fiafia i mea lelei

2 TIMOTEO 3:4

• Ua pupū i mea faafiafia nai lo le Atua

2 TIMOTEO 3:5

• E toʻatele i latou ua faafoliga mai o ni Kerisiano

MATAIO 24:5, 11; MAREKO 13:6

• E toʻatele perofeta pepelo

MATAIO 24:9; LUKA 21:12

• Le sauāina o Kerisiano moni

MATAIO 24:39

• E lē ano tagata i lapataʻiga mai le Tusi Paia

[Ata i le itulau 8]

O loo aʻoaʻoina e Molimau a Ieova isi e faatatau i le Malo o le Atua, i le lalolagi aoao