“Ua Fai Mai Pea le Agaga ma le Tamaʻitaʻi Faaipoipo: ‘Inā Sau Ia!’”
“Ua fai mai pea le agaga ma le tamaʻitaʻi faaipoipo: ‘Inā sau ia!’ . . . Ia sau foʻi so o se tasi e fia inu; ma o so o se tasi e manaʻo i ai, ia ave fua le vai o le ola.”—FAAA. 22:17.
1, 2. O le ā le tulaga e tatau ona iai mea e fesootaʻi ma le Malo i o tatou olaga, ma aiseā?
PO O faamuamua i o tatou olaga mea e fesootaʻi ma le Malo? Na uunaʻia e Iesu ona soo ia ‘faaauau pea ona saʻili muamua le malo,’ ma faamautinoa atu iā i latou, pe a latou faia faapea, o le a saunia mai e le Atua mea e latou te manaʻomia. (Mata. 6:25-33) Na ia faatusaina le Malo o le Atua i se penina tautele lea ina ua maua e se tagata faatauʻoa, na ia “faatau atu ana mea uma na iai, ma faatau mai ai.” (Mata. 13:45, 46) Pe e lē tatau ea ona tatou matuā faatāua le galuega talaʻi o le Malo ma le faia o soo?
2 E pei ona tatou iloa mai i mataupu e lua ua tuanaʻi, o lo tatou tautatala atu ma le lototetele, ma le faaaogāina ma le tomai o le Afioga a le Atua i le faiva, e faaalia ai o loo taʻitaʻia i tatou e le agaga o le Atua. E matuā tāua foʻi le vaega a le agaga o loo faia a o tatou auai e lē aunoa i le galuega talaʻi o le Malo. Seʻi o tatou vāai pe faapefea.
O se Valaaulia mo so o se Tasi!
3. O le ā le ituaiga o vai lea ua valaaulia tagata uma ina ia ‘o mai i ai’?
3 Ua faalautele atu nei se valaaulia i tagata e ala i le agaga paia. (Faitau le Faaaliga 22:17.) O le valaaulia, ia “sau” e faamalie lou fiainu i se vai e faapitoa lava. E lē o se vai masani lea e faia aʻe i vaega e lua, o le tasi vaega o le haitorosene, a o le isi vaega, o le okesene. E ui e aogā le vai e maua ai le ola i le lalolagi, ae sa mafaufau Iesu i se isi vai e ese mai ina ua ia fetalai atu i se fafine Samaria i le vaieli: “A o lē e inu i le vai ou te foaʻiina atu, e lē toe fia inu lava o ia, a o le vai lea ou te avatua mo ia, e avea o se vaipuna i totonu iā te ia e puna mai ai le ola e faavavau.” (Ioa. 4:14) O le vai uigaese lea ua valaaulia tagata e feinu ai, e maua mai ai le ola e faavavau.
4. Na faapefea ona tulaʻi mai le manaʻoga mo le vai o le ola, ma o le ā ua faaāta mai e lenā vai?
4 Na mapuna aʻe lenā manaʻoga mo le vai o le ola, ina ua aufaatasi le uluaʻi tamāloa o Atamu ma lana avā o Eva e lē usiusitaʻi i Lē na faia i laʻua, o Ieova le Atua. (Kene. 2:16, 17; 3:1-6) Na tutuliese le uluaʻi ulugalii mai i le faatoʻaga, ‘ina neʻi tago atu le lima o Atamu ma tau mai le fua mai i le laau o le ola ma ʻai ai ma ola ai e faavavau.’ (Kene. 3:22) Ona o le tupuaga o tagata, na tuufaasolo mai ai mulimuli ane e Atamu le oti i le fanau uma a tagata. (Roma 5:12) O le vai o le ola, ua faaatagia mai ai sauniuniga uma a le Atua e laveaʻi ai tagata usiusitaʻi mai i le agasala ma le oti, ma avatu ai iā i latou le ola lelei atoatoa e lē uma i le Parataiso i le lalolagi. O le taulaga togiola a Iesu Keriso, o le autū lea o na sauniuniga uma.—Mata. 20:28; Ioa. 3:16; 1 Ioa. 4:9, 10.
5. O ai e sau ai le valaaulia inā sau ia ma “ave fua le vai o le ola”? Faamatala.
5 O ai e sau ai lenā valaaulia e sau ma “ave fua le vai o le ola”? O le a maua atoatoa e tagata sauniuniga uma mo le ola e ala iā Iesu, i le taimi o le Pulega a Keriso i le Meleniuma, ia ua faamatalaina e pei o “se vaitafe o le vai o le ola, e manino e pei o se tioata.” Ua vaaia lenā vai “o loo tafe mai i le nofoālii o le Atua ma le Tamaʻi Mamoe.” (Faaa. 22:1) O Ieova o le Foaʻi Ola, o lea la, o Ia o le Puna o le vai e maua ai le ola. (Sala. 36:9) O ia na saunia mai lenā vai e ala i “le Tamaʻi Mamoe,” o Iesu Keriso. (Ioa. 1:29) O lenei vai faafaatusa, o le sauniuniga lea a Ieova ina ia aveesea ai mea uma ua afāina ai tagata ona o le lē usiusitaʻi o Atamu. Ioe, o Ieova le Atua, e sau ai le valaaulia, “inā sau ia.”
6. O le ā le taimi e amata ai ona tafe le “vaitafe o le vai o le ola”?
6 E ui lava o le a tafe mai le “vaitafe o le vai o le ola” i se tulaga atoatoa, i le taimi o le Pulega a Keriso i le Afe Tausaga, ae e amata ona tafe mai i “le aso o le Alii,” lea na vavala mai ina ua nofotupu “le Tamaʻi Mamoe” i le lagi i le 1914. (Faaa. 1:10) O lea la, na amata ona iai nisi o sauniuniga mo le mauaina o le ola, ina ua mavae lenā taimi. E aofia ai le feʻau o loo i le Afioga a le Atua, le Tusi Paia, auā ua taʻua lea feʻau o le “vai.” (Efe. 5:26) Ua tatala atu le valaaulia i tagata uma e ave le “vai o le ola,” e ala i le faalogo ma tali mai i le tala lelei o le Malo. Ae o ai o loo faia le valaaulia i le aso o le Alii?
Ua Fai Mai “le Tamaʻitaʻi Faaipoipo,” ‘Inā Sau Ia!’
7. O ai i latou i “le aso o le Alii” na muamua faaooina atu le valaaulia “inā sau ia,” ma iā te ai?
7 O sui o le vasega o le tamaʻitaʻi faaipoipo—o Kerisiano faauuina e le agaga, o i latou ia na muamua faaooina atu le valaaulia “inā sau ia.” Iā te ai? E lē o faapea atu le tamaʻitaʻi faaipoipo, “Inā sau ia!” iā te ia lava. O loo taulaʻi atu ana upu iā i latou o ē faamoemoe e maua le ola e faavavau i le lalolagi, pe a uma ona tauina “le taua o le aso tele o le Atua o Lē e ona le malosi uma lava.”—Faitau le Faaaliga 16:14, 16.
8. O le ā e faaalia ai na faaoo atu e Kerisiano faauuina le valaaulia a Ieova, talu mai le 1918?
8 Na faaoo atu e soo faauuina o Keriso le valaaulia talu mai le 1918. I lenā tausaga, o le lauga lautele na faamatuaina “E Faitau Miliona o Loo Ola Nei e Lē oo i ai le Oti,” na avatu ai le faamoemoe e faapea o le a maua e le toʻatele o tagata le ola i le parataiso i le lalolagi, pe a mavae le taua o Amaketo. O se lauga na faia i le tauaofiaga a Tagata Aʻoga o le Tusi Paia i Cedar Point, Ohio, i Amerika i le 1922, na uunaʻia ai le ʻaufaalogologo e ‘faalauiloa le Tupu ma lona malo.’ O lenei manaʻoga na fesoasoani i le vaega totoe o le vasega o le tamaʻitaʻi faaipoipo, e faaoo atu ai i le toʻatele o tagata le valaaulia. I le 1929, i le Watchtower o Mati 15, na iai se mataupu o lona matua e faapea “Le Valaaulia Alofa,” sa faavae mai i le Faaaliga 22:17. Ua taʻua i se vaega o le mataupu e faapea: “Ua aufaatasi atu le vasega o le vaega totoe faamaoni i [Lē Silisili Ese] i le valaaulia alofa ma faapea atu, ‘Inā sau ia.’ O lenei feʻau e tatau ona folafolaina atu iā i latou o ē e naunau i le amiotonu ma le upu moni. Ua tatau ona faia nei.” E oo mai i le asō, o loo faaauau ona faaoo atu e le vasega o le tamaʻitaʻi faaipoipo lenā valaaulia.
‘E so o se Tasi Foʻi e Faalogo, ia Fai Atu: ‘Inā Sau Ia!’ ’
9, 10. Ua faapefea ona valaaulia i latou ua faalogo i le valaaulia, ina ia faapea atu foʻi, “Inā sau ia!”?
9 Ae faapefea i latou e faalogo atu i le valaaulia “inā sau ia”? Ua valaaulia i latou ia faapea atu, “Inā sau ia!” O se faaaʻoaʻoga, i le Watchtower o Aokuso 1, 1932, na taʻua ai i le itulau e 232 e faapea: “Ia faalaeiau e le vasega faauuina i latou uma, o ē mananaʻo e faia se vaega i le taʻuina atu o le tala o le malo. E lē tau faauuina i latou e le Alii ina ia mafai ai ona faalauiloa atu le feʻau a le Alii. O se faamāfanafanaga sili mo molimau a Ieova ona iloa i le taimi nei e faapea, ua faatagaina i latou e tauave vai o le ola i se vasega o tagata o ē o le a mafai ona faasaoina atu iā Amaketo, ma tuuina atu i ai le ola e faavavau i le lalolagi.”
10 I le faamatilatilaina o le tiute tauave a lē e faalogo i le valaaulia, e faapea atu “Inā sau ia!” na taʻua i le Watchtower o Aokuso 15, 1934, i le itulau e 249 e faapea: “O i latou o le vasega faa-Ionatapa e tatau ona ō faatasi ma ē o aumea faafaatusa a Ieu, o lona uiga, o ē faauuina, ma folafola atu le feʻau o le Malo, e ui lava e lē o i latou o ni molimau faauuina a Ieova.” I le 1935, na faamanino mai ai le faailoaga o le “motu o tagata e toʻatele” lea na taʻua i le Faaaliga 7:9-17. Sa fesoasoani tele lenā i le galuega o le faaooina atu o le valaaulia a le Atua. Talu mai lenā taimi, ua tali atu ai i lenā valaaulia le motu o tagata e toʻatele o ē e tapuaʻi moni, ua faatupulaʻia le aofaʻi, ma ua silia nei ma le fitu miliona. Ina ua uma ona faalogo ma talisapaia le feʻau, na tuuina atu ai i latou i le Atua, papatisoina i le vai, ma aufaatasi atu i le vasega o le tamaʻitaʻi faaipoipo, i le valaauliaina ma le tiotio o isi ina ia ‘ō mai ma inu fua le vai o le ola.’
Ua Fai Mai “le Agaga,” ‘Inā Sau Ia!’
11. I le uluaʻi senituri T.A., o le ā le vaega na faia e le agaga paia i le galuega talaʻi?
11 Ina ua talaʻi atu i se sunako i Nasareta, na tatala ai e Iesu le tusi tāʻai a le perofeta o Isaia ma faitau atu e faapea: “Ua i oʻu luga le agaga o Ieova, auā ua ia faauuina aʻu e folafola le tala lelei i ē e matitiva, ua ia auina atu aʻu e talaʻi le saʻolotoga i ē ua ave faapagota, ma ia pupula mata o ē e tauaso, ma ia faasaʻolotoina ē ua nutimomoia, ia talaʻi le tausaga e talileleia mai ai e Ieova.” Ona faatatau lea e Iesu nei upu iā te ia, i le faapea atu: “O le aso nei ua taunuu ai lenei mau ua outou faalogo i ai.” (Luka 4:17-21) A o leʻi afio aʻe o ia i le lagi, na taʻu atu e Iesu i ona soo: “E maua e outou le mana, pe a oo ifo iā te outou le agaga paia, ona fai lea o outou ma molimau iā te aʻu i . . . tuluʻiga uma o le lalolagi.” (Galu. 1:8) I le uluaʻi senituri, e mataʻina se gaoioiga na faia e le agaga paia e tusa ai ma le galuega talaʻi.
12. O le ā le vaega ua faia e le agaga o le Atua i le faaooina atu o le valaaulia i o tatou aso?
12 O le ā le vaega a le agaga paia o le Atua i le faaooina atu o le valaaulia i tagata i o tatou aso? O Ieova o le Puna o le agaga paia. E na te faaaogā le agaga e tatalaina ai loto ma mafaufau o le vasega a le tamaʻitaʻi faaipoipo, ina ia malamalama i lana Afioga, le Tusi Paia. E uunaʻia e le agaga i latou ina ia faaoo atu le valaaulia, ma faamatala atu upu moni o le Tusi Paia iā i latou e iai le faamoemoe, e ola e faavavau i le Parataiso i le lalolagi. Ae faapefea i latou ua talia le valaaulia, avea ma soo o Iesu Keriso, ma faaoo atu foʻi le valaaulia i isi? O loo faia foʻi se vaega a le agaga paia iā i latou. O le papatisoina ‘i le suafa o le agaga paia,’ ua latou felagolagomaʻi ai ma le agaga ma faalagolago i ai e fesoasoani iā i latou. (Mata. 28:19) Ia manatu foʻi i le feʻau o loo talaʻia e le ʻaufaauuina ma le motu o tagata e toʻatele ua faatuputeleina. E mai i le Tusi Paia—o le tusi na tusia i le taʻitaʻiga a le agaga o le Atua. O lea la, ua mafai ona faaoo atu le valaaulia e ala i le fesoasoani a le agaga paia. O le mea moni, o loo taʻitaʻia i tatou e lenā agaga. E faapefea i lenā mea ona iai se aafiaga i le tele e tatou te auai ai i le galuega, o le faaooina atu o le valaaulia?
Ua Latou “Fai mai Pea: ‘Inā Sau Ia!’”
13. O le ā le uiga o le faaupuga “ua fai mai pea le agaga ma le tamaʻitaʻi faaipoipo: ‘Inā sau ia!’”?
13 E lē o na ona faapea mai “le agaga ma le tamaʻitaʻi faaipoipo: ‘Inā sau ia!’” O le veape i le uluaʻi gagana o loo faaaogā i inei, e faaalia ai se gaoioiga faifai pea. I le talanoaina o lenā mea moni, ua faapea mai le Faaliliuga a le Lalolagi Fou: “Ua fai mai pea le agaga ma le tamaʻitaʻi faaipoipo: ‘Inā sau ia!’” Ua faaalia ai i lenei mea le faaooina atu e lē aunoa o le valaaulia a le Atua. Ae faapefea i latou e faalogo ma talia le valaaulia? Ua faapea atu foʻi i latou, “Inā sau ia!” Ua faamatalaina le motu o tagata e toʻatele o tagata tapuaʻi moni e faapea ‘o loo tuuina atu le auaunaga paia i le malumalu o Ieova i le ao ma le pō.’ (Faaa. 7:9, 15) O le ā le uiga o le ‘auaunaga i le ao ma le pō’? (Faitau le Luka 2:36, 37; Galuega 20:31; 2 Tesalonia 3:8.) O faaaʻoaʻoga a le perofeta fafine ua matua o Ana ma le aposetolo o Paulo, ua faaalia ai ‘o le auaunaga i le ao ma le pō,’ e manaʻomia ai ni taumafaiga faifai pea ma filigā i le faiva.
14, 15. Na faapefea ona faataʻitaʻi mai e Tanielu le tāua o le auai e lē aunoa i le tapuaʻiga?
14 Na faataʻitaʻi mai foʻi e le perofeta o Tanielu le tāua o le auai e lē aunoa i le tapuaʻiga. (Faitau le Tanielu 6:4-10, 16.) E leʻi suia lana masaniga faaleagaga—o lana masani o le tatalo i le Atua e “faatolu i le aso, . . . e pei ona ia masani ai”—e oo lava i se masina se tasi, e ui o lenā tulaga na lafoina ai o ia i le lua o leona. O ana gaoioiga na matuā faaalia manino ai i ē na matamata ane, e leai se mea e sili atu ona tāua nai lo o le tapuaʻi e lē aunoa iā Ieova!—Mata. 5:16.
15 Ina ua mavae se pō na iai Tanielu i le lua o leona, na alu atu i inā le tupu ma valaau atu: “Tanielu e, le auauna a le Atua soifua, po ua mafai ea ona laveaʻiina oe mai i leona e lou Atua o lē o loo e auauna pea i ai?” Na tali vave mai Tanielu: “Le tupu e, ia soifua pea oe. Na auina mai e loʻu Atua lana agelu e punitia gutu o leona, ma e leʻi afāina ai aʻu, auā ua ia silafia ua mamā lava aʻu i ona luma; ma e leai foʻi se mea leaga ua ou faia i ou luma le tupu e.” Na faamanuia e Ieova Tanielu ona o le “auauna [atu] pea” iā te Ia.—Tani. 6:19-22.
16. O ā fesili ua uunaʻia i tatou e le faaaʻoaʻoga a Tanielu, ina ia fesili ifo ai e uiga i lo tatou auai i le faiva?
16 Na lotomalie Tanielu e oti nai lo o le lafoaʻi o lana masaniga faaleagaga. Ae faapefea i tatou? O ā faataulaga o loo tatou faia po ua lotomalilie e faia, ina ia folafola atu ai e lē aunoa le tala lelei o le Malo o le Atua? Ioe, e lē tatau ona tatou misia se masina e aunoa ma le talanoa atu i isi e uiga iā Ieova! Pe afai e mafai, pe e lē tatau ea ona tatou taumafai e auai i le faiva i vaiaso taʻitasi? E tusa lava pe e lē atoatoa lo tatou malosi i le tino ma pe na o se 15 minute i le masina e molimau atu ai, e tatau lava ona tatou lipoti lenei gaoioiga. Aiseā? Auā o loo tatou naunau faatasi ma le agaga ma le tamaʻitaʻi faaipoipo e fai atu pea, “Inā sau ia!” Ioe, e tatou te mananaʻo e faia mea uma e mafai, ina ia avea ai pea ma tagata talaʻi e lē aunoa o le Malo.
17. O ā avanoa e lē tatau ona tatou misia, e faaoo atu ai le valaaulia a Ieova?
17 E tatau ona tatou faaoo atu le valaaulia a Ieova i avanoa uma, ae lē na o taimi ua tatou faatulaga mo le talaʻiga. Maʻeu se faaeaga o le valaaulia o i latou o loo fia feinu ina ia ‘ō mai ma ave fua le vai o le ola’ i nisi taimi, e pei o taimi e fai ai faatauga, faimalaga, faigāmālōlōga, faigaluega, pe a o ō atu i le aʻoga! E tusa lava pe faasā le galuega talaʻi e i latou ua iai le tulaga pule, ae e faaauau pea ona tatou talaʻi ma le faamaoni, e ala i le asiasi atu i ni nai fale, po o le faateleina o la tatou molimau lē fuafuaina.
Ia Fai Atu Pea, “Inā Sau Ia!”
18, 19. E faapefea ona e faailoa atu e tāua iā te oe le faaeaga o le avea ma ʻaufaigaluega faatasi ma le Atua?
18 Ua sili atu nei i le 90 tausaga o fai atu pea le agaga ma le tamaʻitaʻi faaipoipo, i so o se tasi o loo fiainu i le vai o le ola, “Inā sau ia!” Po ua e faalogo i la latou valaaulia fiafia? Ua uunaʻia la oe ina ia faaoo atu foʻi lenei valaaulia i isi.
19 E tatou te lē iloa po o le ā le umi o le a faaoo atu ai le valaaulia alofa a Ieova, ae o lo tatou tali atu i ai e ala i le faapea atu, “Inā sau ia!” ua faia ai i tatou ma ʻaufaigaluega faatasi ma le Atua. (1 Kori. 3:6, 9) O se faaeaga lenā mea! Tau ina ia tatou faailoa atu e tāua iā i tatou lenā faaeaga, ma “ofo soo atu ai i le Atua taulaga o viiga” e ala i le talaʻi e lē aunoa. (Epe. 13:15) O i tatou o loo iai le faamoemoe i le lalolagi, seʻi o tatou fai atu pea faatasi ma le vasega a le tamaʻitaʻi faaipoipo e faapea, “Inā sau ia!” Ma tau ina ia toʻatele nisi e latou te “ave fua le vai o le ola”!
O le ā na E Aʻoaʻoina?
• O ai ua faaoo atu i ai le valaaulia “inā sau ia”?
• Aiseā e faapea atu ai e puna mai iā Ieova le valaaulia “inā sau ia”?
• O le ā le vaega o loo faia e le agaga paia i le faaooina atu o le valaaulia “inā sau ia”?
• Aiseā e tatau ai ona tatou tauivi ina ia auai e lē aunoa i le faiva?
[Siata/Ata i le itulau 16]
(Tagaʻi i le lomiga mo le ata atoa)
Ia Fai Atu Pea, “Inā Sau Ia!”
1914
5,100 le ʻautalaʻi
1918
E toʻatele o le a maua le ola i le Parataiso i le lalolagi
1922
“Ia faalauiloa, faalauiloa, faalauiloa, le Tupu ma lona Malo”
1929
Ua faapea mai le vaega totoe faamaoni, “Inā sau ia!”
1932
E lē na o ē faauuina ua faaooina atu le valaaulia “Inā sau ia!”
1934
Ua valaaulia le vasega faa-Ionatapa e talaʻi
1935
Ua faailoa mai le “motu o tagata e toʻatele”
2009
7,313,173 le ʻautalaʻi