Ua Fesili Mai le ʻAufaitau . . .

O le ā Lea Mea e Taʻu o le Maota mo Sauniga?

▪ O le Maota mo Sauniga, o se fale tapuaʻi e faaaogā e Molimau a Ieova mo a latou sauniga faalelotu. E faitau sefulu afe Maota mo Sauniga o loo faaaogā i le lalolagi aoao. I vaiaso taʻitasi, e silia ma le 105,000 faapotopotoga o Molimau a Ieova e feiloaʻi i na maota.

O Maota mo Sauniga e faia ai polokalame o suʻesuʻega faale-Tusi Paia ma lauga. I le tele o nei maota, ua faatulaga ai se pulelaa mo i latou e faia sauniga. E masani foʻi ona ofi ai tagata e 100 i le 300. E ono iai foʻi i le Maota mo Sauniga se potu e tasi pe sili atu, se ofisa, ma se tamaʻi potu tusi e tuu ai lomiga faale-Tusi Paia, ma isi tusi e faaaogā e sui o le faapotopotoga mo a latou suʻesuʻega.

E lē gata i lea, e te lē maua i se Maota mo Sauniga so o se ata faalelotu, po o ni tupua lea e i totonu o falesā o lotu. E leai ni alekale, ata, po o ni koluse. Aiseā? E talitonu Molimau a Ieova o le faaaogāina o na mea, e feteenaʻi ma le faatonuga a le Tusi Paia “ia sosola ese mai i le ifo i tupua.” (1 Korinito 10:14; Ioane 4:24) O le tele o falesā ma malumalu ua soona teuteuina. I sona faaeseesega, ua fausia Maota mo Sauniga ina ia aogā ona vaega uma ma e faigofie lona fausaga. E faatāuaina aʻoaʻoga a le Tusi Paia o loo faia ai, nai lo o le fausaga o le maota.

O sauniga mo le lautele e faia i Maota mo Sauniga e taulaʻi patino atu i aʻoaʻoga a le Tusi Paia ma le feʻau autū e faatatau i “le Malo o le Atua,” o le matua lea o le faiva a Iesu. (Luka 4:43) O le fuafuaga autū o Maota mo Sauniga—e faaauiluma ai le tapuaʻiga moni ma avea ma nofoaga autū mo le talaʻia o le “tala lelei o le malo.” (Mataio 24:14) O lea la, e lē faaaogāina Maota mo Sauniga e faia ai ni faatasitasiga faasamasamanoa ma mea faapisinisi. O le fauina ma le faaaogāina o nei maota, e faatupeina e foaʻi tauofo. E lē aoina ni peleti. Ae e iai se pusa i se nofoaga patino i le maota, mo i latou e fia faia se foaʻi.

E tasi le fuafuaga mo Maota mo Sauniga i le lalolagi atoa, ae e eseese lo latou tetelē ma fausaga. E eseese fausaga e fua i meafaufale o loo maua i le atunuu, le tau a le atunuu, ma le tulaga tautupe o Molimau a Ieova o loo i lenā vaipanoa. O nisi o fale e fau i piliki, laupapa ma maa. O nisi maota e faataalaelae, e puipui i ofe ae ato i lau.

E taliaina ma le fiafia so o se isi e auai i sauniga i so o se Maota mo Sauniga. (Eperu 10:25) E faia i vaiaso taʻitasi sauniga i le lautele, ma e taulaʻi atu i se matua e faavae mai i le Tusi Paia e naunau i ai tagata o le faapotopotoga ma ē asiasi mai. Aiseā e te lē asiasi atu ai i se Maota mo Sauniga o i lou vaipanoa?

[Ata i le itulau 31]

Malawi, Aferika

[Ata i le itulau 31]

Egelani, Peretania