Ia Aʻoaʻo Fanau e Uiga i le Atua o ā Auala e Sili ona Aogā?

“Ia teu i lou loto upu ia ua ou poloaʻi atu ai iā te oe i le asō; ia e matuā aʻoaʻo soo ai i lau fanau, ia e tautala ai pe a e nofo i lou fale, pe a e savali i le ala, pe a e taoto pe a e tulaʻi foʻi.”—TEUTERONOME 6:6, 7.

E POPOLE nisi mātua i lo latou tiute tauave o le aʻoaʻoina o fanau. Pe a latou saʻilia se fesoasoani, e lagona le lē mautonu ona o le tele o fautuaga e faalogo pe faitau i ai. E vave lava ona fautua mai aiga ma uō iā i latou. E tele foʻi fautuaga eseese e maua i tusi, mekasini ma le Initaneti mo mātua, ae o nisi taimi e feteenaʻi ai na fautuaga.

Ae o loo iai i le Tusi Paia fautuaga maufaatuatuaina mo mātua e uiga i mea e aʻoaʻoina ai fanau, atoa ma faatonuga i le auala e faia ai. E pei ona taʻua i le mau i luga, e tatau i mātua ona saʻili ni avanoa i aso taʻitasi, e talanoa ai i a latou fanau e uiga i le Atua. O loo taʻua i lalo ni manatu se fā mai i le Tusi Paia, ua mafai ona fesoasoani i le faitau afe o mātua, e aʻoaʻo ai a latou fanau e uiga i le Atua.

1. O mea e aʻoaʻoina e le fanau mai i le foafoaga. Na tusi le aposetolo o Paulo: “O . . . uiga lē vaaia [o le Atua], ua vaaia lava ia talu ona foafoaina le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua.” (Roma 1:20) E tele mea e mafai ona faia e mātua e fesoasoani ai i fanau e iloa, e mafai ona latou maua se mafutaga ma le Atua. E faia faapea e ala i le mātauina o foafoaga a le Atua, ma fesoasoani i fanau e iloa uiga o le Atua o loo faaalia mai i na foafoaga.

Na faaaogā e Iesu lenei auala a o ia aʻoaʻoina ona soo. O se faataʻitaʻiga, na fetalai o ia: “Ia vaavaai lelei i manufelelei o le lagi, auā latou te lē lūlū ni fatu pe selesele, pe faaputu i se fale teuoloa, ae e fafagaina i latou e lo outou Tamā o i le lagi. Pe e lē sili ea ona tāua outou i lo o na manufelelei?” (Mataio 6:26) Na faamatilatila e Iesu uiga alofa ma agalelei o Ieova, ma e iai foʻi se isi mea na ia faia. Na fesoasoani o ia i ona soo, ina ia mafaufau i auala na faaalia ai e le Atua na uiga i lana fanau.

Na taʻua e le tupu poto o Solomona le atamai na foaʻi e Ieova i loi. Na ia aʻoaʻoina ai se lesona tāua mai nei meaola ninii. Na tusi o ia: “O oe le tagata paiē, inā alu ia i le loi; ia vaavaai i ona ala ina ia e atamai ai. E ui e leai sona taʻitaʻiʻau, o se leoleo, po o se pule, ae e na te sauniunia ana meaʻai i le tau māfanafana; e na te faaputuina foʻi ana meaʻai i le taimi o le seleselega.” (Faataoto 6:6-8) Maʻeu se auala mataʻina e tatou te aʻoaʻoina ai le tāua o le faataatia o ni fuafuaga aogā, ma faaaogā lo tatou malosi mai i le Atua ina ia faataunuu ai!

E mafai ona faaaʻoaʻo mātua i aʻoaʻoga aogā a Iesu ma Solomona pe afai e latou te faia mea nei: (1) Fesili atu i fanau po o le ā le laau ma le meaola e fiafia i ai. (2) Suʻesuʻe atili i nei laau ma meaola. (3) Ia taʻu mai ni mea ua aʻoaʻoina mai i nei foafoaga e uiga i le Atua.

2. Faaaʻoaʻo i le auala na aʻoaʻo ai e Iesu tagata. E sili atu ona tāua tala e mafai ona taʻu atu e Iesu i lo o se isi tagata. Peitaʻi e tele taimi na ia faia ai fesili, ona na matuā naunau Iesu i manatu ma faalogona o i latou na ia aʻoaʻoina. (Mataio 17:24, 25; Mareko 8:27-29) E faapena foʻi mātua, e tele ni lesona tāua e fia aʻoaʻo atu i a latou fanau. Ae e ao ona faaaʻoaʻo iā Iesu ma faalaeiau fanau, e faaali mai o latou manatu ma faalogona.

Ae faapefea pe afai e faaali mai e fanau ni uiga leaga pe faigatā foʻi ona aʻoaʻoina se lesona tāua? Mātau le auala na feagai ai Iesu ma le ʻauaposetolo. E tele taimi na fefinauaʻi ai le ʻauaposetolo, ma na tuai ona latou aʻoaʻoina le tāua o le lotomaulalo. Peitaʻi na onosaʻi pea Iesu ma fetalai atu pea iā i latou e manaʻomia ona latou lotomaulalo. (Mareko 9:33, 34; Luka 9:46-48; 22:24, 25) O mātua e faaaʻoaʻo iā Iesu, e latou te onosaʻi e faasaʻo fanau, ma e fai atu pea lava pea le lesona e tasi, seʻia oo ina iloa e fanau le tāua o le lesona.a

3. Ia aʻoaʻo e ala i faaaʻoaʻoga. E lelei ona mātau e mātua le fautuaga a le aposetolo o Paulo i Kerisiano i Roma. Na tusi o ia e faapea: “O lenei foʻi, o oe lē e aʻoaʻo atu i le tasi tagata, e te lē aʻoaʻo ea oe iā te oe? O oe o lē e talaʻi atu ʻAua le gaoi,’ pe e te gaoi ea?”—Roma 2:21.

E aogā lenā fautuaga, auā e taaʻina gofie fanau i gaoioiga a mātua i lo o mea e latou te fai mai ai. O le mea moni, e faigofie i fanau ona faalogo i mea o loo aʻoaʻoina e o latou mātua, pe a latou mātauina o loo amioaʻi mātua e tusa ma a latou tala e fai.

4. Ia amata a o lāiti le fanau. O Timoteo, o lē na galulue ma le aposetolo o Paulo i le galuega faamisionare, sa lelei lona talaaga i lona nuu. (Galuega 16:1, 2) O se tasi o māfuaaga, ona sa aʻoaʻoina o ia i ʻtusitusiga paia talu ona laʻitiiti.’ E lē gata na faitauina e le tinā o Timoteo ma le tinā o lona tinā Tusitusiga Paia iā te ia, ae na fesoasoani foʻi iā Timoteo ia mafaufau loloto i mea o loo tusia ai.—2 Timoteo 1:5; 3:14, 15.

O Loo Iai le Fesoasoani

E tele lomiga ua saunia e Molimau a Ieova e fesoasoani faapitoa i mātua, e aʻoaʻoina a latou fanau i le mea moni e uiga i le Atua. O nisi o tusi ua tusia faapitoa mo fanau iti. A o isi tusi, e aogā auā le faaleleia o fesootaʻiga a mātua ma fanau talavou.b

Peitaʻi, a o leʻi aʻoaʻoina e mātua a latou fanau e uiga i le Atua, e ao ona latou iloa tali o fesili faigatā e ono fesili ai a latou fanau. O se faaaʻoaʻoga, e faapefea ona e taliina fesili nei: Aiseā ua lē taofia ai e le Atua mafatiaga? O le ā le finagalo o le Atua mo le lalolagi? O fea o iai ē ua maliliu? E fiafia Molimau a Ieova e fesoasoani iā te oe e iloa tali o na fesili ma isi foʻi fesili, ina ia māfana ai le mafutaga a lou aiga ma le Atua.—Iakopo 4:8.

[Faaopoopoga i lalo]