Po ua Faasalaina i Tatou e le Atua?

Ina ua aafia Iapani i se mafuiʻe e tusa ma le 9.0 le malosi, faapea ai ma se sunami iā Mati 2011, na faapea mai se tasi o faipolotiki lauiloa: “E ui lava ou te lagona le faanoanoa mo ē na aafia, ae ou te manatu [i le mala] o se ʻtembatsu’ (faasalaga mai i le Atua).”

Ina ua maliliu le silia ma le 220,000 i se mafuiʻe i Haiti iā Ianuari 2010, na taʻutino mai e se faievagelia lauiloa i le televise e faapea, ua māfua nei mea ona ua faia e na tagata “se feagaiga ma le tiapolo,” ma sa manaʻomia ona latou “liliu atu i le atua.”

I Manila, i Filipaina, ina ua maliliu ni tagata e 79 o ē na lolofi atu i se malae taalo ma feomiaaʻi ai, na faailoa mai ai e se faifeʻau Katoliko e faapea: “O loo finagalo le Atua ina ia fafagu o tatou lotofuatiaifo ua lē toe gaoioi ma faalotolotolua.” Na lipotia mai i se nusipepa i inā e faapea, “o le lua sefulu tasi pasene o tagata matutua e manatu ua faaoo mai e le Atua lona toʻasā, e ala i le faapogaia o le solo o tafā mauga, le oo mai o afā, ma isi mala mataʻutia” lea e masani ona aafia ai le atunuu.

E LĒ fou le talitonuga e faapea o loo faasalaina e le Atua tagata e ala i mala. I le 1755, ina ua maliliu le pe ā ma le 60,000 i se mafuiʻe, o se afi, ma se sunami na aafia ai Lisbon, i Potukali, na fesili ai se faifilosofia lauiloa e igoa iā Voltaire e faapea: “Po ua sili atu amioga leaga i Lisbon nai lo o Pale, lea o loo sasao faaafi ai le amioleaga?” O le mea moni, e faitau miliona tagata o loo taumānatu po o faaaogā e le Atua mala faalenatura e faasala ai tagata. I le tele o atunuu, o loo taʻua ai nei mala o ni galuega a le Atua.

Ona o nei tulaga, e manaʻomia ona tatou fesili ifo: Pe na faaaogā moni lava e le Atua mala faalenatura e faasala ai tagata? Po o se faasalaga mai i le Atua le tele o mala o loo tutupu i aso nei?

Ua latou tuuaʻia le Atua, i le taʻua o faamatalaga o loo i le Tusi Paia e faapea, na aumaia e le Atua faaumatiaga e ala mai i mea o le natura. (Kenese 7:17-22; 18:20; 19:24, 25; Numera 16:31-35) Peitaʻi, o le suʻesuʻeina o nei faamatalaga i le Tusi Paia, o le a iloa ai ni eseesega autū se tolu. Muamua, sa muaʻi iai ni lapataʻiga i nei mea taʻitasi na tutupu. Lona lua, sa patino tagata na faaumatia e le Atua, e lē pei o mala faalenatura i aso nei lea e maliliu faatasi ai tagata lelei ma ē e leaga. E na o ē e lē salamō ma lē amanaʻia lapataʻiga na faaumatia. Lona tolu, sa faasaoina e le Atua tagata na lē taʻusalaina.—Kenese 7:1, 23; 19:15-17; Numera 16:23-27.

E leai se faamaoniga e faapea o loo faapogaia e le Atua le tele o mala, lea e aumaia ai faafitauli i olaga o le faitau miliona o tagata i aso nei. Aiseā la ua faatuputeleina ai nei mala? E faapefea ona tatou fesagaʻia nei mala? Pe e iai se taimi o le a lē toe iai ni mala? O le a e maua tali i mataupu o sosoo mai.