Fesili 2: O le ā e Tupu pe a Ou Oti?

A O LAʻITIITI Roman, na maliu ai si ana uō mamae i se faalavelave tau taavale. Ua faapea mai o ia: “Sa matuā ou aafia lava i le maliu o si aʻu uō, ma e tele tausaga o ou taumānatu po o le ā e tupu iā i tatou pe a tatou feoti.”

Māfuaaga o le fesili. O so o se tagata lava e lē fia oti, auā e tatou te manatu e lē tatau ona iai le oti. E fefefe le toʻatele po o le ā e tupu pe a feoti.

Manatu o isi. E talitonu le toʻatele e iai se vaega o le tagata e ola pea pe a oti, ma o le a ō tagata lelei i le lagi ae faasala e faavavau tagata leaga. Ua manatu foʻi isi, pe a maliu se tasi, o le a lē toe iai o ia ma o le a lē toe manatuaina.

O le ā ua faaalia i na manatu? O le manatu muamua, ua atagia mai ai e lē o oti moni le tagata ua maliu. A o le manatu lona lua, ua faaalia ai e leai se aogā o le olaga, ma o i latou e iai lea manatu e ono iai le uiga lē kea e faapea: “Seʻi o tatou aai la ma inu auā o a taeao e tatou te feoti ai.”—1 Korinito 15:32.

Aʻoaʻoga a le Tusi Paia. E lē o aʻoaʻoina i le Tusi Paia e iai se vaega o le tagata e ola pea pe a oti. Na faagaeeina e le Atua le tupu o Solomona e tusi: “O ē ua ola ua latou iloa e oti i latou; a o ē ua oti, latou te lē iloa se mea.” (Failauga 9:5) O i latou e “lē iloa se mea” e matuā lē malamalama i mea o loo tutupu, ma e lē mafai foʻi ona gaoioi pe e lagona se mea. O lea, e lē mafai e i latou ua maliliu ona fesoasoani pe e faaleagaina ē o ola.

E ese mai i manatu o le toʻatele, e leʻi iai se fuafuaga a le Atua e feoti tagata. Na ia faia Atamu ma le faamoemoe e ola e faavavau. E pau le taimi na taʻua ai e le Atua le oti, o le taimi lea na ia taʻu atu ai iā Atamu le faasalaga e oo i ai pe a lē usitaʻi. Sa Ia faasā Atamu e aua neʻi ʻai i le fua o se laau patino, ma pe a ʻai ai, o le a “oti lava” o ia. (Kenese 2:17) Pe ana faapea e usiusitaʻi Atamu ma Eva, semanū o loo ola pea e faavavau i laʻua ma a la fanau i le lalolagi.

O le lē usitaʻia e Atamu o le lapataʻiga a le Atua, na agasala ma oti ai. (Roma 6:23) E leai se vaega o Atamu o ola pea auā ua lē o toe iai o ia. Na fetalai le Atua iā Atamu: “E te ʻai au meaʻai ma le afu o ou mata seʻia e toe foʻi atu i le eleele, auā na faia mai ai oe. Auā o le efuefu oe, e te toe foʻi atu lava i le efuefu.” (Kenese 3:19) Ua agasala ma feoti tagata uma ona e tatou te tupuga mai iā Atamu.—Roma 5:12.

E ui i le lē usiusitaʻi o Atamu, ae o le a faataunuu pea e le Atua lana fuafuaga ina ia faatumu le lalolagi i fanau a Atamu. (Kenese 1:28; Isaia 55:11) E lē o toe umi ona faatutū mai lea e Ieova le toʻatele ua maliliu. Ua faapea mai le aposetolo o Paulo e uiga i lenā taimi: “E toetutū mai tagata amiotonu ma tagata amiolētonu.”—Galuega 24:15.

O Roman lea na taʻua i le amataga, sa ia suʻesuʻe le Tusi Paia ma iloa ai aʻoaʻoga moni e uiga iā Ieova ma le mea e tupu i tagata pe a feoti. Sa matuā suia ona manatu i mea na ia aʻoaʻoina. Faitau i lana faamatalaga i le itulau e 11 o lenei lomiga.

Mo nisi faamatalaga i le mea e tupu pe a feoti, tagaʻi i le mataupu e 6 o le tusi O ā Aʻoaʻoga Moni a le Tusi Paia? E maua foʻi i le initaneti i le www.pr418.com

[Pusa i le itulau 7]

Le Manatu o Iesu i le Oti.

E leʻi ioe Iesu i manatu o taʻitaʻi lotu i ona aso e faapea, e lē toetutū mai ē ua maliliu. (Luka 20:27) E na te leʻi aʻoaʻoina foʻi e iai se vaega o le tagata e ola pea pe a oti. Nai lo lea, na aʻoaʻo atu e Iesu manatu nei.

E pei le oti o le moe. Sa faapea mai Iesu ina ua maliu lana uō o Lasalo: “O loo mālōlō la tatou uō o Lasalo, ae ou te alu atu e fafagu iā te ia auā o loo moe.” E leʻi malamalama soo o Iesu i le uiga o lana tala auā na latou tali atu: “Le Alii e, afai o loo mālōlō o ia, e toe malosi.” Ua faamatala mai e le Tusi Paia e faapea: “Ae ua fetalai Iesu e uiga i lona oti. Peitaʻi, ua manatu i latou ua fetalai o ia, o loo moe o ia e mālōlō. I lenā taimi, ua fetalai saʻo atu Iesu iā i latou: ʻUa oti Lasalo.’”—Ioane 11:11-14.

E toetutū mai ē ua maliliu. Ina ua taunuu Iesu i le nuu o Lasalo, sa ia faamāfanafana atu iā Mareta le tuafafine o Lasalo e ala i le faapea atu: “O le a toetū lou tuagane . . . O aʻu o le toetū ma le ola. O lē e faatuatua mai iā te aʻu, e ui ina oti o ia, ae e toe ola mai lava.” Sa taunuu moni lenā folafolaga, auā sa molimauina e le toʻatele o tagata le toe faatūina e Iesu o Lasalo, e ui ua fā aso talu ona maliu o ia.—Ioane 11:23, 25, 38-45.

I le faaaliga na vaaia e le aposetolo o Ioane, sa toe folafola mai ai e Iesu o le a toetutū ē ua maliliu, ma faamatala mai se taimi i le lumanaʻi o le a toe ave aʻe ai e le oti i latou na oti o iai.—Faaaliga 20:13.

[Ata i le itulau 6]