Ia Usiusitaʻi i Leoleo Mamoe a Ieova

1, 2. Aiseā ua faatusa ai e Ieova o ia lava i se leoleo mamoe?

E FAATUSA e Ieova o ia lava i se leoleo mamoe. (Eseki. 34:11-14) E fesoasoani lenā iā i tatou e malamalama lelei ai iā Ieova. E puipuia, tausia ma fafaga e se leoleo mamoe alofa ana mamoe. E na te taʻitaʻia i latou i punāvai, ma tausia mamoe faatoʻā fananau mai. (Sala. 23:1, 2; Isa. 40:11) O ia foʻi e leoleoina mamoe i le ao ma le pō, ma puipuia mai manufeʻai. (1 Samu. 17:34, 35; Luka 2:8) E na te saʻilia foʻi mamoe ua sē mai le lafu, ma tausia pe a manunuʻa.​—Eseki. 34:16.

² I aso anamua, o le toʻatele o auauna a Ieova o leoleo mamoe ma faifaatoʻaga. O lea, sa latou malamalama lelei ai i le māfuaaga na faatusa ai e Ieova o ia lava i se leoleo mamoe. Na latou iloa, e manaʻomia e mamoe se tausiga lelei ina ia ola mālōlōina ai pea. I se tulaga talitutusa, e manaʻomia foʻi e tagata le tausiga ma le puipuiga a Ieova. (Mare. 6:34) O le a mafatia tagata pe a aunoa ma le tausiga ma le taʻitaʻiga a Ieova. E latou te lē iloa le ala saʻo ma le ala sesē. E leai se tasi e puipuia i latou, ma o le a pei ai o ni “mamoe ua leai se leoleo mamoe.” (1 Tu. 22:17) Peitaʻi, ua tausia ma le alofa e Ieova manaʻoga o ona tagata.

3. O le ā o le a iloiloina i lenei mataupu?

³ Ua tatou malamalama i le auala ua avea ai Ieova o se leoleo mamoe. Ua ia tausia lelei ona tagata. O le a tatou iloiloina le auala ua ia taʻitaʻia ma tausia ai o tatou manaʻoga. O le a iloiloina ai foʻi po o ā gaoioiga e tatau ona tatou faia, ina ia maua ai aogā mai le taʻitaʻiga ma le tausiga a Ieova.

UA TOFIA E LE LEOLEO MAMOE LELEI ISI E FESOASOANI IĀ TE IA

4. Ua faapefea ona tausia e Iesu mamoe a Ieova?

⁴ Ua tofia e Ieova Iesu e avea ma Ulu o le faapotopotoga Kerisiano. (Efe. 1:22, 23) Ua avea Iesu ma “leoleo mamoe lelei” e pei o lona Tamā, auā e alofa o ia i mamoe ma tausia lelei i latou. Na oo lava foʻi ina ʻfoaʻi lona ola mo mamoe.’ (Ioa. 10:11, 15) O le taulaga togiola a Iesu o le meaalofa sili lea mo le fanau a tagata. (Mata. 20:28) O le finagalo o Ieova, “ia lē fano tagata uma e faatuatua iā te ia [Iesu], a ia maua le ola e faavavau.”​—Ioa. 3:16.

5, 6. (a) O ai ua tofia e Iesu e leoleoina ana mamoe? (e) O le ā e tatau ona faia e mamoe ina ia maua ai aogā mai le tausiga a Iesu? (i) O le ā le māfuaaga autū e tatou te mulimuli ai i le taʻitaʻiga a toeaina?

⁵ O le ā le auala e tali atu ai mamoe iā Iesu le Leoleo Mamoe Lelei? Na fetalai Iesu i le Ioane 10:27, “e faalogo aʻu mamoe i loʻu leo, ua latou iloa aʻu, ma ua latou mulimuli mai iā te aʻu.” E faalogo mamoe i le leo o le Leoleo Mamoe Lelei, e ala i le mulimuli i taimi uma i lana taʻitaʻiga. E aofia ai le usiusitaʻi iā i latou ua tofia e Iesu, e fesoasoani iā te ia i le leoleoina o le lafu. I le uluaʻi senituri, na tofia e Iesu aposetolo ma ona soo e leoleoina le faapotopotoga. Na ia faatonuina i latou e aʻoaʻo ma fafaga ana “tamaʻi mamoe.” (Faitau le Ioane 21:15-17; Mata. 28:20.) E toʻatele na avea ma soo o Keriso a o talaʻia atu pea le tala lelei. O lea, na faamautinoa ai e Iesu e iai ni Kerisiano taʻumatuaina e leoleoina faapotopotoga.​—Epe. 4:11, 12.

⁶ Na faapea atu Paulo i toeaina i le faapotopotoga i Efeso: ʻUa tofia outou e le agaga paia e fai ma ovasia, ina ia leoleo le faapotopotoga a le Atua.’ (Galu. 20:28) Ua tofia foʻi e le agaga paia toeaina i aso nei, ona ua tofia i latou e tusa ai ma agavaa o loo i le Afioga faagaeeina a le Atua. O lea e faaalia lo tatou faaaloalo i Leoleo Mamoe silisili o Ieova ma Iesu, pe a tatou usiusitaʻi i toeaina. (Luka 10:16) O le māfuaaga autū lenā e tatou te lotomalilie ai e usiusitaʻi i toeaina. Peitaʻi, e iai isi māfuaaga e tatau ai ona tatou mulimuli i a latou taʻitaʻiga.

7. E faapefea ona fesoasoani toeaina e faamalosia lau faiā ma Ieova?

⁷ E faavae mai i le Tusi Paia faalaeiauga ma fautuaga e avatu e toeaina i uso ma tuafāfine. E latou te lē mananaʻo e pulea olaga o uso. (2 Kori. 1:24) Peitaʻi, e latou te naunau e faia e uso ma tuafāfine filifiliga e faavae mai le Tusi Paia. O le auala lea e saosaolaumea ai toeaina i le autasi ma le filemu o le faapotopotoga. (1 Kori. 14:33, 40) Ua faapea mai le Tusi Paia o loo “leoleoina e [toeaina] o outou ola.” O lona uiga, e naunau toeaina e mafuta vavalalata atu tagata taʻitoʻatasi o le faapotopotoga iā Ieova. O lea, e vave ai ona latou fesoasoani iā i latou ua amata, po ua māeʻa foʻi ona uia se “laasaga sesē.” (Kala. 6:1, 2; Iuta 22) O lea, e anoanoaʻi māfuaaga e tatau ai ona tatou “usiusitaʻi i ē o taʻimua.”​—Faitau le Eperu 13:17.

8. Ua faapefea ona puipuia e toeaina le faapotopotoga?

⁸ O le aposetolo o Paulo o se leoleo mamoe alofa. Na ia tusi atu i uso i Kolose e faapea: “Ia faaeteete: ina neʻi maileia outou e se tasi i filosofia ma manatu taufaasesē e lē aogā e tusa ma tū masani a tagata, e tusa ma mataupu faavae a le lalolagi, ae e lē tusa ma aʻoaʻoga a Keriso.” (Kolo. 2:8) Ua fesoasoani lenei lapataʻiga iā i tatou, e iloa ai se isi māfuaaga e tāua ai ona usiusitaʻi i toeaina. E latou te puipuia i tatou mai i ē o loo taumafai e taʻitaʻiesea i tatou mai iā Ieova. Na lapataʻi mai Paulo e faatatau i “perofeta pepelo” ma “aʻoaʻo pepelo,” o loo taumafai e uunaʻia Kerisiano ua vaivai faaleagaga ina ia lē usiusitaʻi i le Atua. (2 Pete. 2:1, 14) O le lapataʻiga foʻi lenā o loo avatu e toeaina i aso nei. O toeaina o ni Kerisiano taʻumatuaina ma ua lava le poto masani i le olaga. Ua tofia i latou o ni toeaina ona ua latou malamalama lelei i le Tusi Paia, ma ua agavaa e aʻoaʻo atu le upu moni. (1 Timo. 3:2; Tito 1:9) O lo latou tulaga taʻumatuaina, o le paleni o o latou olaga faapea lo latou atamai i le Tusi Paia, ua mafai ai ona latou avatu se taʻitaʻiga lelei i le lafu.

E FAFAGA MA PUIPUIA MAMOE E LE LEOLEO MAMOE LELEI

9. Ua faapefea ona fafaga ma taʻitaʻia e Iesu faapotopotoga i aso nei?

⁹ Ua faaaogā e Ieova lana faalapotopotoga e aʻoaʻoina ma taʻitaʻia ai uso ma tuafāfine i le lalolagi aoao. Ua tatou maua le tele o fautuaga faale-Tusi Paia mai i a tatou lomiga. E lē gata i lea, ua aumaia tuusaʻo foʻi e le faalapotopotoga taʻiala i toeaina i faapotopotoga. E maua e toeaina nei taʻiala e ala mai i tusi i le ʻautoeaina, po o taʻiala foʻi e aumaia e ovasia femalagaaʻi. O auala uma nei ua mafai ona maua ai e mamoe se taʻitaʻiga lelei.

10. O le ā e tatau ona faia e se leoleo mamoe alofa, pe a tafetafea ese se uso po o se tuafafine mai le faapotopotoga?

¹⁰ Ua iai i toeaina le tiute tauave o le tausia ma le leoleoina o mamoe. E latou te manatu mamafa i Kerisiano ua amata ona vaivai faaleagaga, po ua faia foʻi se agasala matuiā. (Faitau le Iakopo 5:14, 15.) E iai nisi ua tafetafea ese mai le faapotopotoga, ma ua lē o toe auauna iā Ieova. O le ā e tatau ona faia e se leoleo mamoe alofa iā i latou? E tatau ona ia faia taumafaiga uma e saʻilia ma faalaeiau ai i latou e toe foʻi mai i le faapotopotoga. Na faapea mai Iesu, e lē finagalo lona Tama e “faaumatia se tasi o i latou nei e faatauvaa.”​—Mata. 18:12-14.

O LE Ā LA TATOU VAAIGA E TATAU ONA IAI I TULAGA LĒ LELEI ATOATOA O TOEAINA?

11. Aiseā e faigatā ai i nisi ona usiusitaʻi i toeaina?

¹¹ O Ieova ma Iesu o ni Leoleo Mamoe e lelei atoatoa. Peitaʻi, e lē lelei atoatoa leoleo mamoe faaletagata o loo leoleoina faapotopotoga. Atonu e mafaufau nisi: ʻAiseā e faalogo ai fua i fautuaga a toeaina, auā o tagata lē lelei atoatoa foʻi e pei o i tatou?’ E moni e lē lelei atoatoa toeaina, peitaʻi, e lē tatau ona tatou uaʻi atu i o latou masei ma vaivaiga.

12, 13. (a) O ā mea sesē na faia e nisi o auauna maufaatuatuaina a Ieova i le taimi ua teʻa? (e) Aiseā na faamauina ai e Ieova i le Tusi Paia mea sesē a ana auauna?

¹² Ua faailoa mai ma le manino e le Tusi Paia, mea sesē na faia e tane na faaaogā e taʻitaʻia ona tagata i le taimi ua teʻa. O se faaaʻoaʻoga, na faauuina Tavita e avea ma tupu o Isaraelu, ae na ia agasala mulimuli ane i le Atua. Sa ia lolo atu i le faia o le mulilua faapea le fasioti tagata. (2 Samu. 12:7-9) E faapena foʻi le aposetolo o Peteru. E ui sa tuuina atu iā te ia se matafaioi tāua i le faapotopotoga Kerisiano, peitaʻi na ia faia foʻi mea sesē matuiā. (Mata. 16:18, 19; Ioa. 13:38; 18:27; Galu. 2:11-14) E ese mai iā Iesu, e na o Atamu ma Eva tagata sa lelei atoatoa.

¹³ Aiseā na faamauina ai e Ieova i le Tusi Paia mea sesē a nisi o ana auauna maufaatuatuaina? O se tasi o māfuaaga, e faailoa mai ai e mafai ona ia faaaogā tagata lē lelei atoatoa e taʻitaʻia ona tagata. O lea, e lē tatau ona tatou faaaogā tulaga lē lelei atoatoa o toeaina, e avea ma ʻalofaga e tetee ma lē amanaʻia ai la latou pule. E faatalitalia e Ieova i tatou e faaaloalo ma usiusitaʻi i toeaina.​—Faitau le Esoto 16:2, 8.

14, 15. O le ā e tatou te aʻoaʻoina mai le auala na avatu ai e Ieova faatonuga i ona tagata i aso ua mavae?

¹⁴ E tāua tele ona tatou usiusitaʻi i toeaina i aso nei. Aiseā? Seʻi mafaufau i le auala na avatu ai e Ieova ana faatonuga, ina ia faasaoina ai ona tagata i taimi faigatā i aso ua mavae. O se faaaʻoaʻoga, ina ua tuua e Isaraelu le nuu o Aikupito, na faaaogā e Ieova Mose ma Arona e avatu faatonuga tāua i tagata. Sa tatau foʻi ona latou usiusitaʻi i faatonuga ina ia faasaoina ai mai le mala lona sefulu. Na faatonuina i latou e faia se ʻaiga faapitoa, ma faaaogā le toto o se tamaʻi mamoe e sausau ai faitotoʻa ma ona faalava i le pito i luga. Pe na fetalai tuusaʻo mai Ieova i tagata? E leai, sa tatau ona latou faalogo i toeaina na avatu i ai e Mose faatonuga. (Eso. 12:1-7, 21-23, 29) Na faaaogā e Ieova Mose ma isi toeaina e taʻitaʻia ona tagata. Ua faapena foʻi ona faaaogā e Ieova toeaina i aso nei e taʻitaʻia i tatou.

¹⁵ E tele foʻi isi faaaʻoaʻoga i le Tusi Paia, na faaaogā ai e Ieova tagata po o agelu e avatua faatonuga e faasaoina ai ola o tagata. I na mea uma na tutupu, na avatu ai e Ieova i ana avefeʻau le pule e tautatala ai i lona suafa, ina ia faailoa atu i tagata gaoioiga e fai, e faasaoina ai i taimi faigatā. O lea, ua iai māfuaaga uma e tatou te faatalitalia ai, o le auala foʻi lenā o le a aumaia ai e Ieova faatonuga i ona tagata iā Amaketo. Peitaʻi, e lē tatau i toeaina ua fai ma sui o Ieova ma lana faalapotopotoga, ona faaaogā sesē le pule ua tuuina atu iā i latou.

“LAFU E TASI MA LE LEOLEO MAMOE E TOʻATASI”

16. O le ā le “upu” e manaʻomia ona tatou faalogo i ai?

¹⁶ Ua avea tagata o Ieova ma “lafu e tasi,” i lalo o le taʻitaʻiga a le “leoleo mamoe e toʻatasi” o Iesu. (Ioa. 10:16) Na fetalai Iesu, o le a ia faatasi ma ona soo “i aso uma lava seʻia oo i le taufaaiʻuiʻuga o le faiga o mea a le lalolagi.” (Mata. 28:20) I le avea ai o ia ma Tupu i le lagi, ua ia pulea atoatoa ai mea o le a tutupu, a o leʻi oo i le taimi e faaumatia ai le lalolagi a Satani. E faapefea ona tatou maua pea le autasi ma le saogalemu i le faalapotopotoga a le Atua? Ua faapea mai le Tusi Paia: “O le a faalogo o outou taliga i le upu mai i o outou tua o loo faapea mai: ʻO le ala lenei. Ia outou savavali ai.’” O le “upu” e aofia ai aʻoaʻoga ma fetalaiga a Ieova o loo i le Tusi Paia, faapea faatonuga a Ieova ma Iesu o le a auala mai i leoleo mamoe ua la tofiaina.​—Faitau le Isaia 30:21; Faaaliga 3:22.

17, 18. (a) O le ā le lamatiaga mo tagata o le Atua i aso nei, ae o le ā le faamautinoaga ua tatou maua? (e) O le ā o le a iloiloina i le mataupu o sosoo mai?

¹⁷ Ua faaata e le Tusi Paia Satani “e pei o se leona o loo tagi leotele, e saʻili se tasi e na te ʻaina.” (1 Pete. 5:8) E tai pei o ia o se manufeʻai, o loo lama se taimi e osofaʻia ai se mamoe ua amata ona vaivai, po ua sē ese mai le lafu. O le māfuaaga lea e tatau ai ona tatou mafuta vavalalata pea i le faapotopotoga, faapea Ieova ʻle leoleo mamoe ma le ovasia o o tatou ola.’ (1 Pete. 2:25) Ua taʻua i le Faaaliga 7:17 i latou o le a sao mai le puapuaga tele. Ua faapea mai le mau: ʻE leoleoina i latou e [Iesu] le Tamaʻi Mamoe, ma e na te taʻitaʻia i latou i vaipuna o le vai o le ola. E soloiesea foʻi e le Atua o loimata uma mai i o latou mata.’ Maʻeu se folafolaga matagofie mo i tatou!

¹⁸ E tāua tele le tiute tauave a toeaina i le leoleoina o le faapotopotoga. E faapefea ona faamautinoa e nei tane tofia, o loo latou tausia lelei mamoe a Iesu? O le a maua le tali o lenā fesili i le mataupu o sosoo mai.