Ua Sauni a Outou Fanau mo Tofotofoga o le Faatuatua i Aʻoga?
1 E ui ina ua fai si leva o faagasolo le tausaga faaleaʻoga i Samoa i Sisifo, o le a toe taliu atu talavou Kerisiano i ni nai vaiaso i aʻoga, i Amerika Samoa. Atonu ua i lenei se lagona faafiafiaina po o le faalemautinoa foi. O nei lagona i totonu e mapuna aʻe ona o avanoa ua faatalitalia po o luitau foi. O nisi o talavou o le a fetaiai ma ni uo i vasega fou ma faiaʻoga. Ua iloa foi e Kerisiano talavou faapea o tausaga fou taitasi faaleaʻoga e vaavaalua mai ma tofotofoga o lo latou faatuatua, faamaoni, ma le alofa mo Ieova. Pe ua sauni outou iti i faapotopotoga i Amerika Samoa e foi atu i aʻoga? Ma po o lava tatali e outou iti i Samoa i Sisifo luitau ma omiga i aʻoga? E mafai faapefea e outou mātua ona faamalosi ia outou fanau mo tofotofoga o i luma?
FAAAOGA LE POLOSIUA AʻOGA
2 I le 1983 na saunia ai faapitoa le polosiua aʻoga mo mātua Kerisiano ma a latou fanau ua i tausaga aʻoga. Ua fuafuaina e fesoasoani mo le aaoina manino i faiaʻoga ma e pule talitonuga ma tu a Molimau a Ieova i le va feagai ai ma nisi o gaoioiga i aʻoga. Ua saunia ni taʻiala e faatatau i le tulaga autasi o Molimau a Ieova i le va ma le tulaga tau amioga.
3 Mo le toatele o talavou ua faamaonia le aogā moni o lenei polosiua o se puipuiga. Mo se faaaʻoaʻoga, na iloa e se matua Molimau faapea o le a faia i tagata aʻoga ni tautalaga tau le aʻoaʻoina o feusuaiga e ni tagata ua iloa e lē mamā tau amioga. Na alu le matua ma le polosiua i lona lima, ma sa mafai ona talanoaina ana faitioga faale-Tusi Paia ma taulau ai ona fai ni suiga tatau i vasega a lana tama teine.
4 A o leʻi tulaʻi mai faafitauli i aʻoga, ma e faapitoa lava a o leʻi amataina le tausaga faaleaʻoga, e mafai e mātua ona faamalosia manatu ma loto o a latou fanau i le faaavanoa lea o se taimi e toe faafou ai o latou manatu i mea o i totonu o le polosiua. I le fai faatatau i tausaga o le fanau, vasega, ma le aʻoga, e mafai e mātua ona faamamafa manatu lelei mai le polosiua atonu e faapitoa ona fesoasoani a o faagasolo le tausaga. (Faata. 14:15; 22:3) Faataʻitaʻi ma lau tama aiaiga e faapea ona ono fesagai ma ia, ma faataʻitaʻi pe mafai faapefea e faamatalaga ua lomia ona agogā i le ‘faia ia laulelei le ala mo ona vae.’—Epe. 12:13.
5 E tele nauā e mafai ona fai e mātua e fesoasoani ai i a latou fa nau e “tali atu . . . ia i latou uma” o ē atonu e fesili ane ia i latou e faatatau i o latou manatu ma faamoemoega totino. (1 Pete. 3:15) I nisi o tulaga atonu e filifili mātua e talanoa totino i le faiaʻoga. O nisi o mātua latou te faia se faasologa e asia ai mai lea taimi i lea taimi le aʻoga, ona e mafai e lenei ona fesoasoani e fofoa se faiā lelei i le va o i latou ma faiaʻoga. E avea foi lena naunau totino ma mea e faamalosia ai le faiā i le va o mātua ma fanau. O nisi o mātua ua latou talia le fautuaga e faaalu sina taimi e nofo ma faalogo ai i talanoaga i potu aʻoga pe afai e faatagaina. O le a avea lenei ma mea e maua ai e le matua le lagona moni mo le siomaga ma le tutasi o omiga e fesagai ma fanau mai lea aso ma lea aso.—1 Pete. 3:8.
FAI MA MOLIMAU I ASO UMA
6 O se Molimau talavou i le Iunaite Setete sa tagisia mai lona faiaʻoga se fesoasoani mo ia i upu faigata na ia tauaneai i le faitauina o le tamaitusi Saili i Tusi i aso taitasi. I se tasi aso na ia matauina ai ua lē o iai lana tamaitusi. Na ia iloa mulimuli faapea sa “ave” e lona faiaʻoga mo le aso na vave aluese ai ona ua maʻi. Sa ia lē manao e misia le faitauina o le mau. Na avea lenei ma mea sa saunia ai sana lava kopi o le Saili i Tusi.
7 E moni faapea e aumaia e le tausaga faaleaʻoga taimi o le faalemautinoa ma le popole a o tulaʻi mai tofotofoga o le faatuatua. A e peitai, o le vaaiga mautinoa faatasi ma sauniuniga filigā o le a fesoasoani i mātua ma talavou e ‘fusi ae sulugatiti o le mafaufau mo gaoioiga’ aua le viiga o Ieova a o faagasolo le tausaga faaleaʻoga.—1 Pete. 1:13.