Fautua atu le Afioga a le Atua
1 E toatele tagata i aso nei e manatu ua tuai ma e lē moni le Tusi Paia. Peitai, o loo iai i le Afioga a le Atua le mana e suia ai olaga. (Epe. 4:12) Ua folasia lenei i mafaufauga, amioga, ma uiga ua faaleleia o le matalasi anoanoai o tagata. (Efe. 4:24) E saosaolaumea le faatatauina o le fautuaga a le Tusi Paia i le siomaga o se aiga fiafia. Na te lagolagoina faiā ma tuaoi, e ui i ituaiga, lanu, po o se tulaga tau vafealoai.—Luka 10:29-37.
2 E ao i lo tatou tomai totino o le Afioga a le Atua ona uunaia i tatou e faalaeiauina isi e suesueina e i latou lava le tāua moni o le Tusi Paia. O se auala e sili ona lelei mo le faatinoina o lenei ua saunia i la tatou Mataupu mo Talanoaga fou, “E Lava le Faitauina o le Tusi Paia?” E mafai faapefea ona tatou faaaogā lenei mataupu faatasi ma le Tusi Paia Samoa ma se polosiua o le Tolutasi po o le polosiua “Faauta!” i la tatou faiva ia Novema?
FAAAOGĀINA O LE MATAUPU MO TALANOAGA
3 A maeʻa se faatomuaga puupuu, e mafai ona tatou faapea atu: “Faatasi ma le tele o omiga ma faafitauli o loo aafia ai aiga i aso nei, ua mananao ai tagata i ni fesoasoani aogā ma ni taʻiala. O le toatele o tagata i inei e talitonu i le Tusi Paia ma faitau i ai, peitai ua lava ea lea ina ia malamalama moni ai ma maua mai ai taʻiala aogā? Ua e matauina o le toatele o tagata ua latou iloa le faigata ona malamalama i nisi vaega o le Tusi Paia? [Faataga mo se tali.] Matau le mea ua fai mai ai le Tusi Paia e uiga i se tasi tagata na ia iloa e lē lava le tau ina faitau o le Tusi Paia na o ia. O loo iʻi i le Galuega 8:30, 31. [Faitau.] Ua faaalia i lenei e manaomia le fesoasoani ina ia malamalama tonu ai i le Tusi Paia. O se tasi o mafuaaga autū na faamauina ai le Tusi Paia o le aumaia lea o faatonuga mo i tatou, e pei ona faaalia i le Roma 15:4. [Faitau.] O lea e lē lava le tau ina faitau o le Tusi Paia. E manaomia ona faatonuina ai i tatou, e aofia ai le suesue. Faamata e te manao e aafia i se suesuega loloto o le Afioga a le Atua?” Afai e faaalia e le tagata le naunau faamaoni e fia maua se malamalamaga o le Afioga a le Atua, e mafai ona tatou faataʻitaʻia i ai le aogā o se tasi o polosiua ma ofo faatasi ma le Tusi Paia Samoa pe afai e leʻi maua sa latou tusi.
4 A talanoa i se tagata e lelei lana faa-Peretania, e mafai ona e filifili e faailoa i ai le New World Translation. E mafai ona e fesiligia lē ona le fale pe e iai sana kopi o le Tusi Paia ma pe faigofie ia te ia ona faitau. E faalagolago i le tali mai, e mafai ai ona e tataʻia i nisi o vala aogā o le New World Translation, e aofia ai lona faaaogāina o le gagana faaonaponei ma le toe faafoisia o le suafa tauatua. Atonu o le a e iloa foi le aogā o le faaaogāina o se manatu e tasi pe lua mai itulau e 276-280 o le tusi Reasoning. Ofo se suesuega faale-Tusi Paia totino i le aiga ia i latou o ē faaalia le naunau.
5 A tataʻia manatu i le polosiua o le Tolutasi, e te ono faapea atu: “E toatele tagata loto faamaoni ua aʻoaʻoina ia talitonu i le Tolutasi, e ui i lea ua latou iloa le faigata tele ona faamatalaina o lena taofi. Ua iloiloina e lenei polosiua le Tolutasi i auiliiliga tetele mai le manatu o talafaasolopito ma le malamalama i le mea ua fai mai ai le Tusi Paia. E te manao e faitau i ai?” Ae mo le faaaogāina o le polosiua Faauta!, e mafai ona e puʻea le naunau o lē ona le fale i le faatomuaina a lē o le faavaa faatosina po o le ulutala “Aʻoaʻoga mo le Ulufale atu i le Parataiso” i le itulau e 26.
6 Ia Novema, ia mataalia i avanoa e faalaeiau ai tagata e suesue le Tusi Paia. Ia vave ona tulitatao toe asiga ia i latou o ē e faaalia le naunau. Fesoasoani ia i latou e galueaina le talisapaia moni mo le mana o le Afioga a le Atua. I le faatatauina o ona mataupu silisili i o latou olaga, o le a latou maua ai aogā e faavavau i le taimi nei atoa ma le olaga a sau.—1 Timo. 4:8.