Folafola le Tala Lelei Faatasi ma Le Olomatamata
1 E tuese moni lava Le Olomatamata, ona o loo ia tauaveina ai le tala lelei. I le tuufaafeagai, o le anoanoai o lomiga faalelalolagi, o loo faatomuaina ai tala leaga ma le faalotovaivai. E mafai faapefea ona tatou faailoa atu i isi faapea e ese mai ai Le Olomatamata, o loo iai se feau e faafouina moni ai?
2 E mafai ona tatou tataʻi atu manatu i “Le Fuafuaga o Le Olomatamata” o loo i le itulau e 2 o le mekasini. Ia faasino atu faapea o lona sini o le faaeaina lea o Ieova o le Pule Silisiliese, na te matauina mea tutupu i le lalolagi o loo faataunuu ai valoaga a le Tusi Paia, ua avatu ai se feau faamafanafana loto ia i latou o ē o loo mapuitiga, ma faalaeiauina ai le faatuatua i sauniuniga a le Atua mo lo tatou faaolataga.
3 Po o faaalia ea i au faamatalaga e uiga i Le Olomatamata, na manatu i se auala mautinoa? O mea tatou te fai atu ai, e ao ona lē naʻo ni faaupuga faatosina e faaosofia ai le naunau puupuu; ae e ao ona iai se aogā, e faagaeeina ai le mautinoa, lea e faapogaia ai se faanaunauga ina ia aʻoaʻo atili.
4 Manaomia Sauniuniga: E manaomia ona tatou faitau ma le faaeteete i mekasini taitasi, ma iloiloina ni taulimaga eseese e fetaui ma la tatou oganuu. O le suʻeina o mau o le Tusi Paia o loo sii mai ai, e faateleina ai lo tatou lava malamalamaga. E mafai i lenei mea ona faalolotoina ai lo tatou talisapaia mo le upu moni ma uunaia ai i tatou e fetufaai ai ma isi. Afai e lē o iai le upu moni i o tatou loto, o le a lē uunaia la i tatou e faailoa atu.
5 E fuafua le mea tatou te ofoina atu, i le naunau e faaalia e se tagata. Afai e teena pe faalēano le tali mai, atonu ua lava ai loa manatu tatou te taʻu atu. Afai e iai se naunau ae e itiiti, atonu e sili atu ona lelei le tau o le ofo i ai o ni mekasini fou po o se polosiua. Afai e faaalia mai le talisapaia moni ma se faanaunauga ina ia aʻoaʻo atili, o le a talafeagai la ona ofo i ai se tusiga. E masani lava, ona sili atu le lelei ona amata o se tasi faatoʻā faia se tusiga i le faia o se tusiga e ono masina; e mafai ona toe faafou pe afai e tumau ai pea le naunau.
6 Afai e te faitau i mataupu o loo i lomiga fou o Le Olomatamata, taumafai e toe manatunatu i talanoaga ua mavae ma tagata o aiga, sa faagaeeina le naunau e ia mataupu. Ia fai ma sini le toe foi atu ma lena lomiga mo se talanoaga atili.
7 Tatou te lē iloa le umi ma le tele o totoe e tatau ai ona folafola atu le tala lelei. Peitai, tatou te mautinoa, o le a tele se matafaioi a Le Olomatamata i le mea e ao ona faataunuuina. I le faaaogāina o lenei sauniuniga, e ao ai ona tatou faataʻitaʻi i le au aposetolo i le tinoū e “aʻoaʻo ma folafola atu [le tala lelei o] le afioga a [Ieova].”—Galu. 15:35.