Lou Talisapaia o le Maliu o Keriso
1 “O le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mata. 20:28) E leai lava se isi tagata ua faapea ona soifua i le lalolagi e mafai ona faia le mea sa faia e Iesu Keriso mo le fanau a tagata. E ala i le olaga na soifua ai o ia ma faasolo atu ai ina maliu i se laau faaoosala, ua faasino mai ai ia i tatou le ala e maua ai le meaalofa silisili e mafai e so o se tasi ona maua, o le ola e faavavau. E ui i lea, e itiiti se talisapaia o le toatele o tagata, mo le mea na faia e Keriso.
2 Ia manatunatu i se feiloaiga a Iesu ma lepela e toʻasefulu. Ina ua latou vaaia Iesu, sa latou alalaga atu: “Le Alii e, Iesu, ia e alofa mai ia te i matou.” (Luka 17:13) Sa alofa mutimutivale o ia ia te i latou, ma faatonuina ai i latou, e tusa ma le Tulafono, ina ia ō ma taʻu atu i faitaulaga. A o latou ō, ona faamalōlōina ai lea o lepela uma e toʻasefulu.
3 Peitai, naʻo le toatasi lava na toe foi atu ia Iesu e faailoa atu le faafetai. Ae ā le isi toʻaiva? Sa faaauau pea ona latou ō e aunoa ma se manatu e faafetai atu i lē na faamamāina i latou. (Luka 17:15-17) O ai la tatou te soo i ai? Tatou te mananao e pei o le tagata o lē na toe foi atu. Sa ia te ia le talisapaia moni. Po o faapena ea lo tatou lagona e uiga i le maliu o Keriso?
4 Faailoaina o lo Tatou Talisapaia: Ua fautuaina e le Sosaiete i tausaga taitasi faapea e tatau ona faitauina ni fuaiupu patino o le Tusi Paia i le vaiaso a o lumanai le aso o le Faamanatuga. E mafai ona maua faitauga o le Tusi Paia ua fautuaina i aso o Aperila 12-17 i le 1992 Calendar of Jehovah’s Witnesses. E mafai ona faailoa lo tatou taisapaia e ala i le faitauina ma le mafaufau loloto i nei mea tutupu sa oo i le olaga o Iesu a o leʻi maliu o ia.
5 E fesootai la tatou galuega o le auaunaga i le fanua ma le talisapaia o le Faamanatuga. O le a mananao toeaina e faia ni fuafuaga e sili ona maopoopo ina ia mafai ai ona fuafua paeonia ma tagata talaʻi e faateleina le galuega i le fanua ia Aperila.
6 O le masina lenei e masani ai lava ona faitau sefulu afe i latou e auai i le galuega paeonia lagolago. Ia Aperila ua mavae atu, e 68 i latou sa paeonia lagolago i atunuu o loo i lalo o la tatou lālā. Pe mafai ona e faia faapea ia Aperila nei? Afai e lē mafai ona e paeonia lagolago, ona fuafua lea e faateleina sou sao i le galuega talaʻi pe a faatagaina e ou aiaiga.
7 Atiina aʻe le Talisapaia i Isi: E toatele tagata naunau tatou te feiloai, i tausaga taitasi i le faamanatuina o le Faamanatuga. Mo se faaaʻoaʻoga, mai tagata e 10,650,158 o ē na auai i le Faamanatuga i le lalolagi aoao ia Mati ua mavae atu, e silia i le 6,370,000 o ni tagata naunau. Ua faaalia ai i lenei mea se faamoemoega tele mo le tuputupu aʻe o le faalapotopotoga.
8 E ao ona tatou faaaogāina tusi valaaulia ua uma ona lomia e le Sosaiete ma ia faia ni fuafuaga e saunia ai auala mo tagata aʻoga o le Tusi Paia atoa ma tagata naunau pe a manaomia. Ia matuā maelega ma mafana pe a valaaulia i latou.
9 Ia fesoasoani ia i latou ina ia iloa le pogai na faavaeina ai le Faamanatuga, o ai e tagofiaina le areto ma le uaina, ma o le ā ua fai ma sui o ia faatusa. (1 Kori. 11:23-26) Ia faamatala foi i ai le faamoemoe o i latou e tagofiaina, atoa ma le faamoemoe o i latou e matauina o ē e lē tagofiaina le areto ma le uaina. (Ioane 10:16; Faaa. 14:3, 4) O le a fesoasoani lenei mea i tagata naunau e malamalama ai faapea, e manaomia e tagata uma lava ona ‘faaalia le faatuatua’ ma e lē lava le naʻo ona auai faatasi i le tausaga i le Faamanatuga o le maliu o Keriso.—Ioane 3:16.
10 O le Faamanatuga o le maliu o Keriso, o se faatasiga e sili ona faapitoa. E ala i le sauniuni maeʻaeʻa i ai, e faailoa atu ai tatou te talisapaia moni lava mea uma ua faia mo i tatou e Ieova ma Keriso. O le atiina aʻe o le talisapaia mo lenei faatasiga i a tatou tagata aʻoga o le Tusi Paia atoa ma isi tagata naunau, o le a fesoasoani ai foi ia i latou, e faaalia le faatuatua i le sauniuniga o le togiola a Ieova e ala ia Iesu Keriso.