Tumau le Malosi Faaleagaga, Tausia le Mamā mo le Auaunaga a Ieova

¹ I le Isaia 60:22, na fetalai ai Ieova i se folafolaga ua faapea ona faataunuuina i luma o o tatou lava mata: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” Pe a tatou manatunatu i se nuu, tatou te vaai faalemafaufau i se vaega tele o tagata o ē ua tosina faatasi e ala i mea e naunau faatasi i ai ma o ē o loo galulue i lalo o le pulega a se malo ua faavaeina.

² Na faaalia i le lipoti o le auaunaga i le fanua o le 1991 se tumutumuga e 4,278,820 tagata talaʻi o le tala lelei i le lalolagi aoao, o se faatelega e 6.5 pasene e sili atu ai i le tausaga ua mavae. Ua matuā aoaoina lava e Ieova se vao e toatele o tagata loto faamaoni o ē ua faanaunau e vavaeese mai i latou lava mai lenei faiga sauā ae avea ma tagātanuu faamaoni o le pulega a le Malo faa-Mesia a lona Alo, o Iesu Keriso. Ua faaauau pea ona faateleina le aofaiga o ē ua aoaoina i lea tausaga ma lea tausaga. Tatou te olioli ona o le avea ma vaega o lenei nuu, lea ua mafai ona faamatalaina faaletino o se sosaiete o le lalolagi fou. I le sauniga o le Faamanatuga i le 1991, o le aofaiga atoa o le aofia e 10,650,158, o se faatelega e 7 pasene e sili atu ai i le 1990. Ua suitulaga lenei i se faatelega maoaʻe o le toatele atili o le a auai ma i tatou o ni tagātanuu o le Malo.

³ O le mea moni, ua tatou iloa, e lē o tagata taitoatasi uma ua aofia ai i le numera o ē na auai i le Faamanatuga o loo i luga, ua vavaeese mai i latou lava mai lenei lalolagi i le tele e tatau ai, ina ia talia atoatoa o se nuu o Ieova. E ui ina ‘gasolo ane i le fale o Ieova’ tagata mai atunuu uma, peitai, e manaomia ona ‘aʻoaʻoina atoatoa i latou e uiga i ona ala’ ina ia mafai ai ona latou “savavali i ona ala.” (Isaia 2:2-4) E sili atu i le fa miliona o ē na auai i le Faamanatuga ua taliaina faatonuga a le Atua, mauaina le malosi faaleagaga e uunaia ai i latou e tumau i amioga mamā ma agavaa ai e auai i le galuega talaʻi o le Malo lea ua faataunuuina. (Mata. 24:14) Ua iai i latou ia i se tulaga lelei i luma o fofoga o Ieova ma ua olioli ai i aogā o sauniuniga ofoofogia uma ua ia faaavanoaina atu ia i latou. O le ā e tatau ona faia e le isi vaega e silia i le ono miliona pe afai e oo ina latou maua le malosi ma le mamā faaleagaga mo le auaunaga ia Ieova?

⁴ E tatau ona latou “faamalolosi ona finau mo le faatuatua.” (Iuta 3) O le taimi lava latou te filifili ai e savavali i ala o Ieova, e oo ai i latou i lalo o omiga mai le Tiapolo e ala i tofotofoga, faaosoosoga, ma taaʻiga leaga. E pei o Paulo, e tatau ona latou vaavaai atu ia Ieova mo le malosi e tutumau ai. (Fili. 4:13) E foaiina atu e Ieova le malosi ia i latou na e ala i ē ua uma ona faamalosia i le faatuatua. Na apoapoai mai Paulo faapea “o i tatou o e malolosi ia tatou fesoasoani i le vaivai o e ua le lavā e tatau ai.” (Roma 15:1,2) A autasia ē malolosi ma ē vaivai, ona iai lea o le malosi e tutū mausalī ai. “E sili ona lelei o le toalua i le toatasi;...Afai foi e faamanumalo mai se tasi i so laua, e teteeina atu o ia e le toalua.”—Fai. 4:9,12.

⁵ O le uiga o lenei mea, e faalagolago ma le tonu ē fou ia i tatou, o se auala e mafai ai ona latou maua le malosi mai ia Ieova. E tatau ia i tatou o ē ua avea ma Kerisiano tuuina atu ona tausia lo tatou lava malosi faaleagaga pe afai tatou te fia fesoasoani i ē fou. Ua mafai e Kerisiano o ē malolosi ona ‘tuuina atu ni meaalofa faaleagaga,’ ia ua iʻu ai ‘i se feofoaiga o faalaeiauga.’ (Roma 1:11,12) O se tasi lenei o auala autū ua faaaogā e Ieova e autasia ai i tatou ma faapogaia ai i tatou uma lava ina ia ‘tutumau ma malolosi.’—1 Pete. 5:9-11.

⁶ E ao ona avea ma o tatou sini le fesoasoani i nei tagata fou, ae i le taimi e tasi ia tatou manatu mamafa foi i o tatou manaoga faaleagaga. (Mata. 5:3) O le avea ma tagata faaleagaga o le ki lena o lo tatou malosi. E tatau ona tausia ma faamalosia lenei uiga e ala i le aveina i totonu e lē aunoa o meaʻai faaleagaga. E ala i lana faalapotopotoga, ua saunia ai e Ieova ni polokalama paleni mo le suesueina o lana Afioga. Ua avea sauniga e lima faalevaiaso a le faapotopotoga o se vaega matuā tāua i le faamalosia o i tatou, ‘ina ia taufaatupu ai le alofa ma galuega lelei.’—Epe. 10:24.

⁷ E faateleina aogā o ia sauniga, pe a tuufaatasia ma le masani lelei o suesuega totino ma suesuega faaleaiga. Ina ia fai ma sini itiiti, e ao ia i tatou uma lava ona faitau ma iloiloina le mau o aso taitasi, ia ō faatasi ma le polokalama o le faitau Tusi Paia ua faatulaga mai i le Faasologa o le Aʻoga Faatiokarate, ma sauniuni mo le Suesuega Tau Tusi a le Faapotopotoga atoa ma le Suesuega o Le Olomatamata. E tatau i aiga taitasi ona filifili pe faapefea ona faamaopoopo lena tulaga, ia mautinoa ua faia i se faavae faifai pea. E ao foi i le ulu o le aiga ona iloa ua faatatauina le polokalama o le suesuega ina ia fetaui ma manaoga patino faaleagaga o le aiga. I lenei auala o le a “atiina ae [ai se] fale...e faamausaliina.” (Faata. 24:3) Afai tatou te manatu mamafa i la tatou masani o le suesue o ni tagata taitoatasi po o ni aiga, e mafai ona tatou mautinoa o le a faamanuia e Ieova i tatou ma o le a fesoasoani lona agaga ia i tatou ina ia tutumau ai ma le manuia i lalo o tofotofoga eseese.—Iako. 1:2,3; 1 Pete. 4:11.

⁸ Tausia le Mamā ma ia Lē Faalumaina: A o valaaulia ma le mafana i tatou e Ieova ina ia pipii mau atu ia te ia, ae i le taimi lava e tasi, ua ia faamanino mai ai faapea, e faia lenei mea e faavae i lo tatou faaalia o le faatuatua i le toto masaa o Iesu, lea ua “faamamāina ai i tatou i agasala uma lava.” (1 Ioane 1:7; vaai foi Eperu 9:14.) E mafai ona faaauau pea ona tatou faamalosia lo tatou faatuatua e ala i le suesuega totino o le Afioga a le Atua ma i le faatatauina o mea ua tatou aʻoaʻoina. Ua paʻuu ese nisi mulimuli ane, ona atonu ua lē taulau ona latou aveina i totonu meaʻai faaleagaga pe e itiiti se taumafaiga ua latou faia e faatatauina ai i o latou olaga. Ua faaavanoaina ai e lenei mea i latou i osofaiga a Satani. O nisi ua oo ina vaivai faaleagaga, ma iʻu ai ina lē toe talaʻi. Ae faanoanoa, ona o nisi ua faatagaina i latou lava e lolo atu i amioga sese matuiā, ma mafua ai ona faateaina i latou. Na lapatai mai Paulo: “O lē manatu o loo o tu ia, ina faaeteete ia neʻi paū.” (1 Kori. 10:12) Afai tatou te faagaloina ma le loto i ai suesuega, le auai i sauniga, ma le auaunaga, e faigofie lava ona maileia i tatou i taaʻiga ma tofotofoga e lē paia.—Epe. 2:1; 2 Pete. 2:20-22.

⁹ E matuā manaomia ona tatou tausia i tatou lava ia mamā i mea uma: faaletino, faalemafaufau, faaleagaga, ma i itu tau amio. (2 Kori. 7:1) Ua matuā sili atu ona faaleagaina ma paʻū maulalo i aso uma le lalolagi o loo siomia ai i tatou. O loo aumaia pea e le Tiapolo le tele o auala taufaasese e maileia ai i tatou. O le tausia pea o i tatou lava ia malolosi faaleagaga e faamautinoa ai o le a tatou lē ‘valea i ana togafiti.’ (2 Kori. 2:11) O faatonuga ma fautuaga ua tatou maua mai le faalapotopotoga a Ieova e mafai ai ona tatou iloa ma teena taaʻiga leaga.

¹⁰ Ua iai ia i latou o loo taʻimua i le faapotopotoga le avega tauave ina ia faataatia ai se faaaʻoaʻoga lelei mo isi ia faamalosi pea ma tumau i le mamā. Na faamamafa e Paulo lenei avega tauave ina ua ia taʻua: “Ia outou manatua o outou taʻitaʻi,...ia outou faaaʻoaʻo i lo latou faatuatua, ma ia mafaufau i le iuga o a latou amio.” (Epe. 13:7) E matuā tāua ona faataatia e toeaina tofia ma auauna o le faiva se faaaʻoaʻoga lelei i a latou amio totino atoa ma le tausia o a latou avega tauave o ni ulu o aiga. E ao ona latou tauivi ia pei o Timoteo, o lē sa uunaia ‘e fai ma faaaʻoaʻo...i le tautala, i le amio, i le alofa, i le faatuatua, i le lē gaoiā.’ (1 Timo. 4:12; 1 Pete. 5:3) Ua tofusia le isi vaega uma o i tatou i lenei avega tauave ina ia avea ma faaaʻoaʻoga lelei e ala i le tausia o amioga e faaaloalogia. E masani lava i ē fou ona latou faamasinoina le upu moni, atoa ma le faalapotopotoga a Ieova, e ala i mea latou te matauina ia i tatou. Tatou te mananao e mautinoa, o mea ua latou matauina e faalaeiauina ai i latou ia ia maua se nofoaga i le faalapotopotoga mamā a Ieova.

¹¹ O loo faaauau pea ona vave le agaʻigaʻi i luma o le aoaoina mo le faasaoina i “le puapuaga tele.” (Faaa. 7:14) E na o i latou lava o ē e malolosi faaleagaga ma tausia i latou lava ia mamā o le a matuā faasaoina. O le tele lava e faalagolago i vaega nei: (1) ia tausia se masani lelei o le suesue totino ma mafaufau loloto i le Afioga a le Atua; (2) faaalia le naunau totino moni i le tasi ma le isi faatasi ma se faanaunauga e tuuina atu se faalaeiauga; ma le (3) ia galulue aufaatasi e tausia amioga mamā e faapaiaina ai le suafa o Ieova. O le faia o nei mea o le a tatou mautinoa ai le faamanuiaga ma le puipuiga a Ieova pe a oo i le iʻuga o lenei lalolagi. E mafai ai ona tatou mautinoa o le a tatou iai i ē “leoleoina e Ieova o e faamaoni.”—Sala. 31:23.