Le Auala e Atiina aʻe ai le Naunau
1 Ua tatou iloa mai se tasi o lomifefiloi e faapea o le uiga o le “atiina aʻe,” o le sauniunia lea po o le tausia o le tuputupu aʻe. Ae e mafai foi ona faauiga lenei upu e faapea, ia faaleleia e ala i se galuega, le tausia, po o le suesue. O le faia o soʻo, o se sini tāua i la tatou faiva. (Mata. 28:19,20) O le mea lea, e manaomia ai ona tatou tuu faamuamua se taumafaiga ina ia atiina aʻe le naunau tatou te maua i le faiva i le fanua.
2 E masani lava ona manaomia ni asiasiga faifai pea ina ia tausia ai le tuputupu aʻe faaleagaga o tagata loto faamaoni. O toe asiga e fua mai, e ao ona iʻu i se suesuega faifai pea o le Tusi Paia.
3 Pe na o i latou ea e faaalia le naunau tele e te toe asiasi atu i ai? E lē tau manaomia ona e tuua se lomiga ina ia toe asiasi atu ai. O se tasi o paeonia e masani ona lē tele ni lomiga na te tuua i le uluai asiasiga, e toe asiasi atu i ē uma lava e faaleuō. O se talanoaga lelei e te faailoa atu ai se manatu faale-Tusi Paia, e saunia ai se faavae lelei mo se toe asiga.
4 Faaaogā Sāvali e Amata ai Suesuega Faale-Tusi Paia i Toe Asiga: Ua fetaui lelei mataupu eseese o a tatou sāvali ma o tatou aso. O loo faamamafa ai le manaoga ina ia aʻoaʻoina ma faatatauina le poto mai le Tusi Paia.
E mafai ona e faapea atu:
◼ “I le taimi ua mavae sa ta talanoa ai e uiga i nisi o mafuaaga e talitonu ai i le Tusi Paia. O le ā le ituaiga o lumanai o loo tautala i ai le Tusi Paia?” Amata ona faitau mai le palakalafa lona lua i le itulau e 3 o le sāvali, Olaga i se Lalolagi Fou Filemu. Suʻe i mau. Ma fesili i lē ona le fale mo sana tali e uiga i le mea na e faitauina. Faaiʻu i le iloiloina o le mataupu i lalo o le tamai ulutala “Le Auala e Mafaia ai mo Oe” i le itulau e 5.
5 E mafai foi ona e faaaogāina i se auala faapena le sāvali, O le ā le Faamoemoe mo Ē Pele ua Maliliu?
Atonu e te faapea atu:
◼ “E pei ona ta muai iloiloina puupuu, o le toatele lava o tagata e lē faatuatua i le Atua. Mo se faaaʻoaʻoga, ua latou fesili mai faapea, ‘Afai e mamana nauā le Atua, aiseā la ua ia faatagaina ai tagata ina ia feoti?’ E mafai ona fesoasoani lenei sāvali e taliina ai lena fesili.’” Faasino i le vaega o loo amata i le palakalafa lona fa i le itulau e 2. Faia se fesili talafeagai pe a maeʻa palakalafa taitasi, ma ia iloiloina mau ua na ona faaalia ai ae e lē o siiina mai. E mafai foi ona faaaogāina i se auala faapena le polosiua fou, Po o Silasila Alofa mai ea le Atua ia i Tatou?
6 Faaauauina o le Suesuega: E ala i le mulimuli i auala ua fautuaina i inei, ua e amataina ai se suesuega faale-Tusi Paia i le aiga. Ina ia faaauau atili le talanoaga i se faavae faifai pea, fesili i lē ona le fale i le faaiʻuga o lau asiasiga: “Pe e te iloa e na o ni nai minute lava sa ta taliina ai nei fesili tāua? I le vaiaso e sosoo ai, e mafai ona ta faaaluina sina taimi umi e talatalanoa ai e uiga i le faamoemoe o le toetu po o se isi mataupu e te fiafia ia ai.” E mafai ona e faaaogāina na o se fesili e tasi ua taʻua i na mataupu i taimi taitasi e te asiasi atu ai. I se taimi e talafeagai ai, e mafai loa ona e suia i se polosiua pe amata foi se suesuega i le tusi o le Ola e Faavavau.
7 Maeu le faamalie loto o le faia o se suesuega faale-Tusi Paia ma se tasi o loo saili moni i le upu moni! Talosia ia faamanuiaina i tatou i se faiva e fua tele mai, e ala i le faatatauina o fautuaga ua tuuina atu i le auala e atiina aʻe ai le naunau tatou te maua.