“Tatou te O i le Fale o Ieova”

¹ Sa tali atu ma le naunautai Tavita i le valaaulia: “Tatou te o i le fale o Ieova.” (Sala. 122:1) O le “fale” o Ieova lea sa faaatagia mai e le malumalu, o le nofoaga lea sa faapotopoto i ai i latou o ē sa iai se faanaunauga ina ia tapuai atu i le Atua moni. O se malumalu paia o le filemu ma le saogalemu. I aso nei, o le “fale” o le Atua, o le faapotopotoga Kerisiano lea i le lalolagi aoao, “o le poutu foi lea ma le lagolago o le upu moni.” (1 Timo. 3:15) Ua mafai ona faia sauniuniga mo le faaolataga e auala mai i lenei puna. O le mafuaaga lena ua ‘gasolo ane ai nuu uma’ pe afai latou te faanaunau ina ia olioli i faamanuiaga ua folafola mai e le pulega a le Malo o le Atua.—Isaia 2:2.

² Ua iai i lenei “fale” le silia i le 69,000 faapotopotoga i le 229 atunuu. O loo tatala mai pea faitotoa o Maota o Malo, faatasi ai ma le silia i le fa miliona tagata faigaluega maelega o loo faalauteleina atu le valaaulia: “Ina sau ia; . . . atoa ma lē manao i ai, ina ave fua ia le vai o le ola.” (Faaa. 22:17) E toatele ua latou faalogo i lenei feau ma tali mai i ai ma le talisapaia. O isi ua uunaia ai foi, ae e leʻi oo ina ō mai i le fale o Ieova e ala i le auaufaatasi ma le faapotopotoga Kerisiano. O i latou na o loo iai se “manaoga faaleagaga” lea e na o le faapotopotoga e mafai ona faamalieina ai. (Mata. 5:3) Ua tatou ola i taimi sili ona faigata, ma ua matuā lalata tele mai le iʻuga o lenei faiga o mea. O le uiga o le lē fiafia ma le palaʻai e mafai ona iʻu atu i le faatuai lea e mataʻutia. Ua faanatinati le manaomia mo tagata ina ia aapa e “faalatalata atu i le Atua” e ala i le matuā auaufaatasi atu i lana faalapotopotoga. (Iako. 4:8) E mafai la faapefea ona tatou fesoasoani atu ia i latou?

³ Ia Tataʻi Saʻo atu ē Naunau i le Faalapotopotoga: O la tatou uluai feiloaiga lava ma tagata naunau fiafia, e ao ai ona tatou faamalosia i latou e uaʻi atu i le faalapotopotoga. E ui ina mafai e i tatou lava ona taʻu atu ni mau ma faamatala atu aʻoaʻoga faavae, ae e lē o i tatou o le puna o lena malamalama. O mea uma lava ua tatou aʻoaʻoina e aumai mai le faalapotopotoga, e ala mai le vasega o le auauna lea na te aumaia pea “mea e ʻai i ona itu aso.” (Mata. 24:45-47) Mai lava i le amataga, e manaomia ona iloatino e tagata fou faapea o le tapuaiga mamā e lē gata mai ia i tatou ma se faapotopotoga e tasi; o loo iai se sosaiete ua faatiokarate, ua faamaopoopoina i le lalolagi aoao, o loo faagaoioia e ala i le taʻitaʻiga a Ieova.

⁴ O le taʻitaʻiga ua tatou maua e faapogai mai ia Ieova, o lē ua ia folafola mai le taʻitaʻiina ma le aʻoaʻoina o i tatou. (Sala. 32:8; Isaia 54:13) O le uluai auala ua faasalalau solo atu ai nei faatonuga, e ala lea i a tatou lomiga. Afai e mafai ona tatou fesoasoani i ē naunau fiafia ina ia atiina aʻe se faaaloalo sili mo lomiga, i le manatu i ai o le puna lea o faatonuga faasaoola, o le a sili atu ai la ona latou mananao e faitau ma faatatau lana feau o loo iai, na i lo o le vave ona lafoaia. E ao pea lava ona tatou tuuina atu ma faaaogā nei lomiga i se auala e faaaloalogia ai. E aʻoaʻoina ai foi i lenei tulaga ē fou ina ia talisapaia le faalapotopotoga ma ia faalagolago atu i ana sauniuniga.

⁵ Ia iloa e ē naunau fiafia le nofoaga tutotonu o sauniga i lena vaipanoa, o i inā ua saunia atu ai e lē aunoa faatonuga. Tuu atu ia i latou le tuatusi o le Maota o le Malo ma taimi e fai ai sauniga. Faamatala i ai le eseesega o a tatou sauniga ma faatasitasiga faalotu na atonu sa latou auai i le taimi ua teʻa. E talia aloaia tagata uma; e lē aoina pe faia ai ni suegā tupe. A o taʻitaʻi e faifeau tofia polokalama, e maua e tagata uma se avanoa e fai ai se sao e ala i le faia o ni manatu ma auai i vaega o le polokalama. E talia aloaia aiga; e faaaofia foi le fanau i a tatou talanoaga faale-Tusi Paia. E lē oofu o tatou faifeau i ni ofu talaloa faapitoa po o ni ofu tetele tatapuvae. E matagofie le teuteuina o le Maota o le Malo, ma e leai ni molīgaʻo, ni faatusa, po o ni tupua. O i latou e auai atu i ai, e toatele lava i tagata e nonofo ai i lena vaipanoa.

⁶ Ia Tataʻi Atili atu Pea ē Naunau i Suesuega Faale-Tusi Paia: O le fuafuaga autū lava o le suesuega faale-Tusi Paia o le aʻoaʻoina lea o le upu moni o le Afioga a le Atua. E ao foi ona faatupuina i le tagata aʻoga se talisapaia mo le faalapotopotoga a Ieova ina ia nofouta ai o ia i le matuā tāua o le manaoga o le faia ai o sana vaega. O le galuega sili na faia e Iesu ma ona soʻo i le uluai senituri sa tosina ai i ai ē sa faamaoni ma latou autasi ai ina ia galulue e ala i le taʻitaʻiga a se vaega pule sa faaautū i ai. I atunuu na sa lelei la latou tali mai, na faavaeina ai ni faapotopotoga ina ia tuuina atu ai ni toleniga ma ni faatonuga e lē aunoa. O i latou sa auaufaatasi atu i ai sa faamalosia faaleagaga, ua latou maua ai se fesoasoani ina ia onosaia taimi o puapuaga. (Epe. 10:24, 25; 1 Pete. 5:8-10) O le fuafuaga a Ieova mo o tatou aso, ‘ina ia faaopoopoina mea uma ia Keriso.’ (Efe. 1:9, 10) O le iʻuga, ua tatou maua ai se ‘aufaatasiga o uso’ i le lalolagi aoao.—1 Pete. 2:17.

⁷ E ao ona faaaofia i suesuega faalevaiaso o le Tusi Paia, faatonuga o le a fesoasoani i tagata aʻoga e talisapaia ai le faalapotopotoga ma faaaogā ai sauniuniga mo lo latou faaolataga. Ia faaalu ni nai minute i vaiaso taitasi e faamatala ai se mea e faatatau i le faalapotopotoga ma le auala o loo faagaoioia ai. E mafai ona e maua ni manatu tāua e talanoa i ai i Le Olomatamata o Iuni 1, 1985. O polosiua o Jehovah’s Witnesses in the Twentieth Century ma Molimau a Ieova—Autasi i le Faia o le Finagalo o le Atua i le Lalolagi Aoao ua talanoaina ai vala autū o le faalapotopotoga ma le faapefea ona tatou manuia ai. O le fuafua ma tagata aʻoga o le Tusi Paia ina ia matamata i le vitiō Jehovah’s Witnesses—The Organization Behind the Name, o le a latou vaaia ai e i latou lava mea o loo faataunuuina e le faalapotopotoga. O ni lipoti ma ni tala o mea tutupu ua filifilia mai le Yearbook e mafai ona faaalia ai le manuia o le galuega i atunuu ma aganuu e ese mai i lo tatou. E mafai foi ona faaaogā isi lomiga. A o faasolo pea taimi, ia faamatalatala atili atu pea na mea e pei o le mafuaaga tatou te ō atu ai mai lea fale i lea fale, le fuafuaga o a tatou sauniga, ma le auala e faatupeina ai la tatou galuega, ma le tulaga i le lalolagi aoao o la tatou galuega.

⁸ O le faamasani atu i isi Molimau e mafai ona uunaia ai ē fou, e faalauteleina ai lo latou malamalamaga e uiga i le faapotopotoga. Ona o lena itu, ia valaaulia isi tagata talaʻi e auai faatasi i le suesuega i nisi taimi. Atonu o se tasi i le faapotopotoga e tutusa o latou talaaga ma mea e fiafia i ai, e faaopoopo atu ai se isi vaaiga fou i le mafaufau o le tagata aʻoga. Atonu e mafai ona lua ō faatasi i ai ma se toeaina, tau lava ina faamasani i ai. O le fuafuaina foi ina ia asiasi atu i lau suesuega le ovasia o le matagaluega po o lona faletua e mafai ona avea o se faamanuiaga moni. Afai o iai ni Molimau o loo nonofo latalata ane, o le faamasani atu la o i latou i le tagata aʻoga o le Tusi Paia e ono faaopoopo ai se faalaeiauga mo le tagata aʻoga ina ia auai i sauniga a le faapotopotoga.

⁹ Ia Faalaeiau i Ē Fou ina ia Ō mai i Sauniga: E manaomia ona iloa e ē fou le tāua o le auai i sauniga. Taumafai e faagaee lo latou naunau. Faasino atu i ai mataupu na o le a talanoaina i le Suesuega o Le Olomatamata. Taʻu i ai matua o lauga lautele o loo fotuaʻi mai. Faamatala i ai manatu tāua o mataupu o le a talanoaina i le Aʻoga o le Faiva Faatiokarate ma le Suesuega Tau Tusi a le Faapotopotoga. Faaleo atu ou lava lagona e uiga i mea o loo e aʻoaʻoina mai i nei sauniga ma le mafuaaga ua e lagona ai le manaomia o le auai i sauniga. Afai e mafai, ia ofo atu i ai se auala e malaga mai ai. O le telefoni i ai a o leʻi oo i le taimi o le sauniga e mafai ona faaopoopo ai se isi faalaeiauga ina ia auai.

¹⁰ Pe afai o le a sau i sauniga se tagata aʻoga o le Tusi Paia, ia faafeiloaia ma le mafana o ia. Ia faafeiloai atu o ia i isi, e aofia ai toeaina. Afai e auai atu i le lauga lautele, ia faafeiloai atu o ia i le failauga. Faamatamata solo o ia i le Maota o le Malo. Faamatala atu i ai le faaaogāina o le fata o tusi ma le fata o mekasini, o pusa mo meaalofa, le potutusi, ma le mau o le tausaga. Ia faailoa ia te ia e faapea, o le maota, e lē gata o le fale lea o le tapuaiga, ae o i inā foi e faaautū atu i ai le faamaopoopoina o le galuega talaʻi a le faapotopotoga.

¹¹ Faamatala atu i ai le auala e faia ai a tatou sauniga. Faaali i le tagata aʻoga lomiga o loo tatou faaaogāina. Faasino i ai, o le Tusi Paia o la tatou tusi aʻoga autū lava lea. E mafai ona faia se sao o tagata uma, e aofia ai le fanau laiti. Faamatala i ai faapea, o musika uma lava ma fatiga o loo i a tatou tusipese sa fatuina e Molimau a Ieova ina ia faaaogā i la tatou tapuaiga. Ia faasino atu i le matalasi o loo iai i talaaga o ē auai i sauniga. Fai ni faamatalaga lelei ma mautinoa e faatatau i le uiga faaleuō ma le agaga talimālō. O lenei naunau agalelei ma le faamaoni atonu o se tasi lena o vala e sili ona malosi i le faamautūina o le toe auai mai a le tagata aʻoga.

¹² Le Mafuaaga Atonu o loo Faatautū ai Nisi: E masani lava, e tusa po o le ā le tele o mea e te faia, ae leai lava se naunau o isi ina ia vavalalata atu i le faalapotopotoga. Aua e te vave fiu ai. Taumafai ia e malamalama lelei i o latou tulaga. E foliga mai, e oo mai i le taimi nei, e lē o ia i latou se lagona e auai atu i sauniga faalelotu seʻi vaganā ni faatasiga faapitoa. Atonu o tagata o o latou aiga po o a latou uō mamae o loo faavaivaia i latou. Atonu latou te fefefe i o latou tuaoi o ē e fai ane ni faamatalaga lē faaaloalo ia i latou. Ma le mautinoa foi, e ono avea i latou ma autū o le tele o faatosinaga ese e ala i ni sailiga o faafiafiaga ma faafouga o le tino. Atonu latou te manatu o nei mea o ni papupuni ua matuā faigata ona fesagaʻia; e manaomia la ona e fesoasoani ia i latou ina ia latou maua se manatu saʻo i nei mea ma ‘ia mautinoa i mea e sili atu ona tāua.’—Fili. 1:10.

¹³ Ia taʻu i ai ni mafuaaga faale-Tusi Paia mo le onosai. Ia faamamafa atu e faapea, ua manaomia vave lava e i tatou se faalaeiauga ma se faamalosiauga faaleagaga lea e maua mai i la tatou aufaatasiga. (Roma 1:11, 12) Na faamanino mai e Iesu faapea e lē avea teteega mai aiga o se mafuaaga moni o le faatautū. (Mata. 10:34-39) Na uunaia i tatou e Paulo ina ia aua neʻi o tatou mamā e taʻu atu i le lautele o i tatou o soʻo o Iesu. (2 Timo. 1:8, 12-14) O fiafiaga o le tagata lava ia ma mea e tosina i ai e tatau ona pulea; auā a lē faia faapea, e ono avea ma mailei. (Luka 21:34-36) O i latou ua maua le faamanuiaga a Ieova e ao ona loto atoa, ia aua lava neʻi faalotolotolua. (Kolo. 3:23, 24) O le totōina o lena talisapaia mo mataupu silisili o le Tusi Paia e mafai ona tatala ai le ala mo lo latou agaʻigaʻi atili i luma faaleagaga.

¹⁴ O loo Matala Pea Faitotoa: Ua faasilisilia pea le maota o Ieova o le tapuaiga moni e sili i isi fale uma. Ua faaleo atu le valaaulia i atunuu e 229 i le lalolagi aoao: “O mai ia, tatou o ae ia i le mauga o Ieova, . . . e aʻoaʻo mai foi o ia ia te i tatou i ona ala, ona tatou savavali ai lea i ona ala.” (Isaia 2:3) O se tali mautinoa a ē fou e mafai ona faasaoina ai o latou ola. O le tataʻi saʻo atu o lo latou naunau i le faalapotopotoga a Ieova, o se tasi lea o auala sili e mafai ai ona tatou fesoasoani atu ia i latou.