Faafesootai atu Sāvali i Lomiga o loo Ofoina
1 I mekasini uma lava ua lomia i aso nei, e na o Le Olomatamata lava ma le Awake! e mafai ona fesoasoani i tagata faitau faamaoni, ina ia maua ai le auala i le ola e faavavau. A o tou talatalanoa ma tagata ia Aperila ma Me, o le a faaalia e nisi se naunau moni i le feau o le Malo, ma e mafai ona e tataʻiina atu o latou manatu i mekasini fou po o se tasi o polosiua felanulanuai a le Sosaiete. O nisi atonu e vave lava ona faaalia mai i le uluai taimi sina naunau. I na la tulaga, atonu e te muai talanoaina ai se manatu se tasi pe lua mai se sāvali; ma afai e faaalia atili le naunau o lē ona le fale, ona tuu atu faatasi loa lea o le sāvali ma se mekasini po o se polosiua o loo e faatomuaina.
2 E mafai ona e faapea atu:
◼ “Ua ioe le tele o tagata e faapea, i le lalolagi i aso nei, ua matuā sili atu ona tele faafitauli na i lo o ni vaifofo. Po o e iloa ea o le tele lava o o tatou faafitauli tugā, o na sa valoia mai i le Tusi Paia?” Ona e suʻe loa lea i le itulau e 4 ma le 5 o le sāvali Po o le a Faasaoina ea Lenei Lalolagi? ma talanoa i nisi o faafitauli.
3 Afai o loo e faatomuaina Le Olomatamata o Aperila 1, ma e naunau foi lē ona le fale i mea o loo e faitauina atu mai le sāvali, ona e faasino atu lea i le mataupu ua faaulutalaina “Ia Mulimuli atu i le Malamalama o le Lalolagi” ma faamatala atu le auala o le a matuā foia aʻiaʻi ai e Iesu Keriso faafitauli uma o tagata. Ona e ofo atu lea i ai e te toe foi atu i se taimi talafeagai ina ia talanoaina atili le mataupu.
4 Afai o le “Awake!” o Aperila 8 lea e faamatilatila, atonu e te faaaogā le faatomuaga ua otooto atu i le palakalafa e 2 o lenei mataupu ona faaopoopo atu lea faapea:
◼ “E toatele e faaletonu i le iai i lotu ma faiga faapolotiki o se tomai ina ia foia o tatou faafitauli, ae peitai ua latou tau mānatu pe faamata o iai i le faasaienisi le tali.” Ona faitau atu lea i ai o se manatu e talafeagai lelei i ai, lea e aumai i le mataupu “Can Science Meet the Challenges of the 21st Century?” E foliga mai la o le a fiafia le toatele o talavou i lenei mataupu, ae maise lava tagata aʻoga.
5 Pe a e faatomua atu le polosiua o le “Faauta!,” e mafai ona e faaaogā se isi auala ina ia faatomua atu ai:
◼ “E toatele tagata ua tau mānatu po o le ā e tupu ia i tatou pe a tatou maliliu. Ua fai mai nisi tatou te ō a lē i le lagi po o i hele; o nisi e lē o mautinoa. O le tali a le Tusi Paia e lē gata ina ofo ai, ae ua faamautinoaina atili ai.” Ona e faaali atu loa lea ma faamatala atu i ai vaega o le sāvali O le ā le Faamoemoe mo Ē Pele ua Maliliu? Pe a uma lena, e mafai ona e faasino atu i itulau e 16 ma le 17 o le polosiua, pe afai e naunau fiafia lē ona le fale i le sāvali.
6 Afai o oe o se tagata talaʻi fou, e mautinoa o le a e manao e faafaigofie lau faalatalata atu i le tagata. Aiseā e lē ave faatele ai le sāvali lea Pe o le a Faasaoina ea Lenei Lalolagi? ma faaaogā manatu na e otooto mai i luga, i le palakalafa e 2?
7 Ua faaeaina i tatou ina ia avatu le feau o le faaolataga i aiga o tagata. A o tatou sailia ‘ē ua tatau i ai,’ seʻi o tatou faaaogā lelei a tatou sāvali ma tuuina faatasi atu ma isi lomiga pe a maua nisi o ē e naunau fiafia.—Mata. 10:13.