Ia Olioli e Foi e Fesoasoani i Ē Naunau Fiafia
1 O ē uma lava ua auai i le galuega i lea fale ma lea fale ua faanaunau e fesoasoani atu i tagata o ē naunau fiafia. O le fesoasoani atu faapena, tatou te tofo ai i le olioli tele ma le faamalieina. (Faatusatusa i le Salamo 126:5,6.) E manaomia ai i lenei itu ona tatou sauniuni.
2 O sauniuniga e amata i le tausia o ni faamatalaga auiliili i a tatou faamaumauga o fale i le fale. Ia tusi le mataupu sa talanoaina i le uluai asiasiga ma le tali mai a lē ona le fale. Atonu foi e te manao e tusi i lalo le auala e te manao e amata ai le talanoaga pe a e toe foi atu i ai.
3 Mo se faaaʻoaʻoga, afai sa e faasino atu i le Tatalo a le Alii i le uluai asiasiga ma tuua ai le polosiua o le “Malo,” e mafai ona e taʻua puupuu se faamatalaga e faapea:
◼ “I laʻu asiasiga talu ai, sa ta talanoaina le auala o le a faia ai le finagalo o le Atua i le lalolagi ma maua ai le filemu i vala uma o le olaga. I le polosiua lea na ou tuua ia te oe, faamolemole seʻi mātau upu o loo taʻu mai i le itulau e 29 e uiga i isi faamanuiaga o le a aumaia e le Malo o le Atua i tagata.”
4 Afai sa mafuli le tagata i le lē talitonu i le Atua, ia fai atu i ai se faaupuga faapenei:
◼ “Ina ua ou asia oe i le taimi ua teʻa, na ta talanoaina ai le manatu sa taʻua e Paulo i le Eperu 3:4, o loo aumai ai ni mafuaaga moni e faapea atu ai e tatau ona iai Lē atamai na Faia mea uma.” Ia toe faitau i ai le mau ma faasino i le itulau e 4 seia oo i le 9 o le polosiua Po o Silasila Alofa mai ea le Atua ia i Tatou?, ma toe faaauau ai i le mea na gata mai ai lau taulimaga muamua. Ia fai atu le fesili, ona faitau lea o le palakalafa, ma faataga lē ona le fale e tali mai i le fesili. Afai e talafeagai, ia valaaulia o ia e ave ane lana polosiua ma lua talatalanoa faatasi i le mataupu.
5 Afai sa foliga mai i lau uluai asiasiga, e faamalieina lē ona le fale i ana mea faitino po o nisi mea, e mafai ona e faasino i le sāvali Po o le a Faasaoina ea Lenei Lalolagi? ma faitau i ai le faamatalaga ua taʻua i le itulau e 6. Ia fesili i ai po o ia faanaunau e ola i se parataiso matagofie i le lalolagi. Ina ia fesoasoani e faamautū atili lona naunau, e mafai ona e fesiligia ni ona manatu i le ata po o se fuaitau e faamalosiau o iai i le mekasini o loo e faaaogāina.
6 O le faafeiloaiga foi lena e mafai ona faaaogā faatasi ma se mataupu e te ono talanoaina mai Le Olomatamata po o le Awake! Ia faasino atu i le mataupu sa faamatilatila i lau uluai asiasiga, ona taʻu lea o se isi manatu faaoso naunau i le mataupu lava lea po o se mataupu mai se isi lomiga o ia te oe. Afai e mafai, ia lua faitauina faatasi ma lē ona le fale le mau, ma fesiligia ni ona manatu.
7 Afai ua faaalia tele le naunau, e mafai loa la ona ofo atu se tusiga. E masani lava ona faatoʻā faia lenei itu pe afai ua manino mai e talisapaia e lē ona le fale nisi lomiga o mekasini.
8 Ia manatua lou sini o le amataina o se suesuega faale-Tusi Paia. E masani, e tele ni toe asiga e faia ina ia tuputupu aʻe ai le naunau fiafia seia oo i lea tulaga. Ia faaalia lou lava manatu mamafa mo lē ona le fale e ala i le toe foi atu i ai i se vave e mafai ai.
9 O le tala lelei lea o loo tatou folafola atu e faapogaia ai le olioli tele. (Luka 2:10) Pe a talisapaia e tagata naunau fiafia a tatou taumafaiga, e mautinoa o se pogai lea mo le olioli. (Fili. 4:1) Seʻi o tatou seleseleina lea oliolii e ala i le foi atu e fesoasoani i ē o loo naunau fiafia ua tatou maua i le fanua.