Fesoasoani i Isi ina ia Iloa le Tagata Silisili
1 E toatele i latou o ē ua faitau i le tusi o le Greatest Man Who Ever Lived, ua faaleo mai lo latou matuā talisapaia o le aogā o le tusi i o latou olaga. Na tusi mai se tasi e faapea: “Ina ua uma ona ou faitauina atoa le tusi, sa ou lagona ai e pei o loo valaaulia mai aʻu e Iesu ina ia ou aufaatasi atu ia te ia, ia ou nofo i ona autafa, ia ou tiga faatasi ma ia i ona mafatiaga, i ona faalogona ootia, i vala uma o lana faiva. . . . Ua pei lava le faitauina o le tusi o le matamata atu i se ata o le soifuaga o Iesu.”
2 Ua fesoasoani le tusi o le Greatest Man ia i tatou e iloa lelei ai Iesu ma Ieova. (Ioane 14:9) Fai mai se tamaitiiti e 12 ona tausaga e uiga i le tusi: “Sa matuā faamafanafana loto ia te aʻu, o le taimi lava la na ou faitauina ai, sa ou tatalo ai ma loimata ia Ieova i loʻu olioli. Na atili ai ona ou mautinoa i le manatu, o loo silasila mai Ieova ma Iesu ia i tatou.” Na fetalai Iesu e pei ona taʻua i le Ioane 17:3, o le uiga o le ola e faavavau mo i tatou, o lo tatou iloa lea o Ieova ma lona Alo. O le suesueina o lenei tusi e uiga i le soifuaga o Iesu ua aumaia ai ia i tatou se malamalamaga faapitoa i uiga totino o Ieova, auā o Iesu “ua matuā tusa lava ma ia.”—Epe. 1:3.
3 E silia i le 19 miliona kopi o le tusi Greatest Man ua lomia i le silia i le 70 gagana. Ua faaalia ai le taliaina lelei o le tusi. E toatele latou te faitauina le tusi atoa i le taimi lava e mauaina ai. E na o le lua lava vaiaso na faitau ai e se isi tamaloa fiafia le tusi ina ua ia mauaina. Na faapea mai se taʻitaʻilotu o lē na ia taliaina le tusi: “Ua lē mafai ona ou toe tuuesea. Ma te faitauina ma laʻu avā sina vaega o le tusi i po uma lava ae ma te leʻi momoe.”
4 Molimau atu Lē Fuafuaina: Na faaali atu e se tasi uso le tusi o le Greatest Man i tagata i lona fale faigaluega. Na salalau le tala o loo ia te ia le tusi, ma taʻu atu ai ma mea o loo tusia ai. Na faia e ē latou te faigaluega se lisi o ē uma na mananao i ni tusi. Na ia ofoina ai tusi e 461! O le toalima mai ia i latou na mauaina tusi ua suesue nei. A o faimalaga atu se tuafafine i se vaalele, sa ia ofoina le tusi o le Greatest Man i se patele o lē na malaga atu ina ia auai i le faauuga o se katinale fou. E 40 tausaga sa iai lenei patele i le Vatikana. E ao ia i tatou uma ona faaaogā lelei avanoa ina ia faailoa atu ai le tusi i isi.
5 Talisapaia e Talavou: E fiafia tele talavou i le tusi. Na tusi mai se isi tamaitiiti e iva tausaga e faapea: “O le lomiga e sili ona ou fiafia i ai o le Greatest Man Who Ever Lived auā e tele ni mea ua ou aʻoaʻoina mai ai.” Pe a tatou feiloai ma tagata talavou i le auaunaga i le fanua, e ao ona tatou faaalu se taimi pe a malilie i ai o latou mātua, ina ia faaali atu i nei talavou le tusi, ma autalu nisi o ona manatu tāua ma ata. Atonu tatou te mafai ona ofoina atu tusi i nei talavou. Pe a tuuina atu le avanoa ina ia aʻoaʻoina ai e uiga ia Iesu, e mafai e talavou i aso nei ona talanoa mai e uiga ia te ia. O Iesu o se tagata sa faigofie ona faalatalata atu i ai.—Mata. 19:14, 15.
6 O le faitauina o le tusi Greatest Man e mafai ona suia ai olaga o tagata. Ia e taumafai e faamasani i ni ona mataupu se tele. Ia faaaogā faamatalaga o loo i le itulau mulimuli o le faatomuaga o le tusi, i lalo o le tamai ulutala “Mauaina o Aogā mai le Aʻoaʻoina e Uiga ia te Ia.” O le a fesoasoani nei faamatalaga i tagata e uaʻi atu ai i mea e mafai ona latou maua mai i le faitauina o le tusi. Atonu o le a toatele nisi i lau oganuu o le a maofa e pei ona sa iai se isi tagata ina ua uma ona ia faitauina le tusi, na faapea mai: “Faatoʻā ou faitauina lea o se tusi ua sili ona matagofie! Ua ia suia ai loʻu olaga.”