Le Pogai ua Matuā Tāua ai Sāvali i La Tatou Faiva i Aso Nei

¹ I le lomiga o le Watchtower o Ianuari 1, 1991, i le itulau e 30, sa iai se tala i se mea na tupu ua faaulutalaina “He Found a Tract on the Track” (“Sa Ia Maua se Sāvali i le Auala”) O loo taʻua ai se tagata sa ia mauaina se tasi o a tatou sāvali. Na vave ona ia faitauina le sāvali ma ia faapea atu ai i le tane a lona afafine: “Ua ou mauaina le upu moni i le asō!” Na talosagaina e ia tane uma e toalua nisi lomiga ma suesue i ai. Nei la, ua silia i le selau ē na tupuga mai ia i laʻua o loo maelega i le upu moni. O lenei mea ua faaalia ai le iʻuga o le faitau i le na o se sāvali se tasi.

² Ia Faaaogā Avanoa: Ua faaaogā e uso i so o se mea avanoa e ofoina ai sāvali. Na mātau e se tasi Molimau talavou le faanoanoa o lona faiaʻoga i le maliu o le tinā o lana tane. Ona tusi faamafanafana atu lea o le tuafafine talavou i lona faiaʻoga, ma fafao i ai le sāvali Po o le ā le Faamoemoe mo Ē Pele ua Maliliu? Sa tusi faafetai mai le faiaʻoga, ma la talanoa ai ma lo tatou tuafafine talavou. I le taimi nei, ua taliaina ai e lē aunoa e lenei faiaʻoga mekasini mai le tuafafine talavou.

³ A o molimau atu ni tagata talaʻi i se ala e agaʻi i se fanuatanu, sa latou vaaia ai ni tagata o loo valiina papae tuugamau. Ona faaaogā lea e tagata talaʻi le avanoa e ofo atu ai sāvali. O le aso na sosoo ai o se aso malōlō, e toatele tagata e asiasi atu ai i le fanuatanu, ona fuafua lea o tagata talaʻi e ō atu e tutū i le faitotoa o le fanuatanu ma ofo atu sāvali. E silia i le limaselau sāvali na ofoina, ma e na o le toatolu tagata na latou lē taliaina. I le tausaga na sosoo ai, na toe foi atu ai tagata talaʻi ma tufatufaina le silia i le afe sāvali, ma e na o le toaono na lē taliaina. E toatele nisi na latou faaalia mai le matuā talisapaia. Na faitau e se isi tamaloa le sāvali a o ia tuumuli ese atu, ma e leʻi umi ae toe foi ane ma talanoa atu i le tuafafine na ia ofoina atu le sāvali. Na ia faapea atu: “E iai se isi ou te manao e faitau i lenei feau. Pe mafai ona ou toe mauaina se isi sāvali?”

⁴ O sāvali e laiti ma ua faigofie ai ona feaveai i so o se mea lava tatou te ō i ai. Pe a talatalanoa faasamasamanoa ma isi, po o ni tagata tatou te masani pe leai, e ao lava ona tatou taumafai e fai atu se faamatalaga puupuu e mafai ona tataʻi atu ai i le talanoaina o se tasi o sāvali e valu ia ua tatou mauaina nei. E mafai ona faia lenei mea a o talatalanoa atu i tuaoi, a o faia ni faatau po o faatalitali mo se mataupu sa fuafuaina, a o asiasi atu i tauaiga, po o isi lava tulaga e tele.

⁵ Le Pogai e Aogā Ai: E felanulanuai sāvali ma ua matagofie. E pupuu. O le a lē soona popole ai la ē ona fale ma i latou tatou te fetaiai i tulaga e leʻi fuafuaina, ma fāʻatu ai e faia se faitauga umi. Peitai, o le feau e faagaee loto ma e aogā. E maua ai e le tagata faitau se vaaiga maumaututū faale-Tusi Paia i le mataupu o loo faailoa atu i le sāvali. Ina ua maua e se tasi alii talavou le sāvali Olaga i se Lalolagi Fou Filemu ma ia toe autaluina, na ia faapea mai ma le ofo: “Ou te leʻi faalogo muamua lava i ni faamatalaga faaleaiau faapenei e uiga i le tulaga o le lalolagi!”

⁶ Tatou te mananao e faaaogā nei sāvali i tulaga uma e talafeagai. Ua iloa e le toatele o tagata talaʻi le aogā o sāvali i le amataina ai o ni talanoaga i le galuega mai lea fale i lea fale. O le anoanoai o suesuega ua faia nei sa amata mai i se sāvali. I le itulau e 4 o lenei lomiga o La Tatou Faiva o le Malo, o loo iai ni fautuaga tāua i le auala e faaaogā ai sāvali i se tulaga e aogā. Ioe, e laiti sāvali ae o ni meafaigaluega aogā mo la tatou faiva.