Pe Mafai ona E Faia?

¹ Ua e fesili mai, ‘Faia le ā?’ Ua tali le Faataoto 3:27: “Aua neʻi e faafiti se mea lelei i e ua tatau i ai, pe a ua e mafai ona faia.” Po “ua e mafai” ona faalautele atu au galuega ina ia faia sou sao i le auaunaga faapaeonia lagolago po o le paeonia sauatoa? Pe mafai ona e faia lena mea?

² Maeu se faalaeiau o le faitau atu i le 1993 Yearbook, o loo taʻua ai se faatatauga e 106,031 paeonia sauatoa ma paeonia lagolago i le Iunaite Setete, o se fua, e toatasi le paeonia mai tagata talaʻi e toavalu. Ioe, e 5,093 na auai i le auaunaga paeonia i le tausaga ua tea. E tusa ua toeitiiti lava atoa le toʻa 14 tagata talaʻi i le aso e tasi, o ē sa iloiloina o latou tulaga ma iloa ai, e tele nisi mea e mafai ona latou faia i le faiva.

³ O le paeonia lagolago o se auala lea e fai ai mea lelei i isi. I le tausaga ua tea, sa iai se tumutumuga o paeonia lagolago e 105,748. Ua sili ona lelei lea. E toatele tagata talaʻi o loo sailia auala e paeonia lagolago soo ai a o faagasolo le tausaga.

⁴ Ina ia mautinoa pe mafai ona “faia” pe leai, e manaomia ona e muai iloiloina le faanaunauga o lou loto. (Mata. 22:37-39) Ua taʻua faapea i le Galuega 20:35: “E sili le manuia o le na te foai atu, i le manuia o le na te talia mai.” E mautinoa, o i latou e tuuina atu le fesoasoani faaleagaga ma le matamau mai le loto, ua ia i latou le faanaunauga saʻo. E manaomia tele lena faanaunauga, ina ia avea ai se tasi o se tagata talaʻi po o se paeonia e taulau manuia.

⁵ Lona lua, ia iloilo ou tulaga o iai nei. Pe mafai ona e fetuutuunai au meafai i aso taitasi ina ia e auauna ai faataimi atoa? E lē mafai e tagata uma ona faia faapena. Ae i tausaga taitasi e faitau afe tagata ua latou maua se auala e “faia” ai, ina ua uma se iloiloga a le tagata lava ia faatasi ma le tatalo. (Kolo. 4:5; w77 itu. 701) Mo se faaaoaoga, ua filifili nisi aiga i ni masina patino e paeonia lagolago ai nisi tagata po o le aiga atoa foi. O isi aiga latou te lagolago i se tagata e toatasi o le aiga o loo paeonia sauatoa. Po o mafaufauina ea e lou aiga nei tulaga e ono mafai ona fai?—Tagai i le Faataoto 11:25.

⁶ O le fesoasoani i isi e iloa le upu moni, e maua ai le faamaliega moni, e tusa pe e te auauna o se tagata talaʻi po o se paeonia. Ua tatou iloa o le olioli moni e maua mai i le faia o mea lelei i isi, ae maise lava pe a ‘mafai ona tatou faia.’