Toe Foi e Fesoasoani i Tagata e Aʻoaʻoina le Ala Latou te Maua ai le Ola e Faavavau
1 Talu mai le taimi na tatala ai le faasalalauina o le tusi Ola e Faavavau, ua silia i le 65 miliona kopi ua uma ona lolomia i gagana e 115. O le toatele o i latou ua avea nei ma auauna a Ieova sa latou aʻoaʻoina upu moni faavae o le Tusi Paia e ala i lenei meafaigaluega lelei. I le masina la lenei ma lea o le a sosoo ai, tatou te ono maua le avanoa e ofo atu ai lenei fesoasoani faale-Tusi Paia mo le faia o suesuega, po o lo tatou feiloai foi ma tagata i le oganuu o ē ua ia i latou lea tusi.
2 Toe Asiasi atu i Tagata ua Iai le Tusi: Ua maua e nisi tagata talaʻi iuga lelei ona o lo latou tataiina o manatu i le lisi o mataupu o le tusi, ma fesiligia le tagata naunau mo se mataupu o loo ia naunau patino i ai. Pe a filifilia e lē ona le fale le mataupu, ona talosagaina lea ina ia faitau atoa i le mataupu i le tusi a o leʻi toe asiasi atu i ai.
3 Pe a talafeagai, e ao ona tatou faia se fuafuaga maʻoti ina ia toe asiasi atu. A o leʻi toe foi atu, e tatau lava ona tatou sauniuni mo le talanoaina o ni palakalafa o le mataupu lea na filifilia e lē ona le fale. Afai sa leʻi faia sana filifiliga, e mafai ona tatou amata talanoaina le mataupu 1. Pe a uma le talanoaina o ni palakalafa, e ao ona tatou faatū atu se fesili o le a talanoaina i isi palakalafa o sosoo mai. O le a avea lena o se auala e faavae ai se isi toe asiga, ma mafai ai ona tatou faaauau i le suesueina o le tusi o le Ola e Faavavau.
4 Ae afai e iai ni fesili a lē ona le fale, e sili ai ona muai talanoaina na fesili. E masani lava ona taliina ana fesili mai le tusi. O lo tatou masani lelei la i mataupu o i le tusi, e mafai ai ona tatou suʻe tonu atu i palakalafa talafeagai ma faaaogā lena mataupu ina ia tali ai fesili ua lāgā.
5 Toe Asiasi atu ia i Latou na Tatou Tuua ai se Sāvali: Atonu sa tatou tuua se kopi o le sāvali Lalolagi Fou Filemu i lē ona le fale. Pe a toe asiasi atu la, e mafai ona tatou talanoaina uluai palakalafa o le sāvali.
Afai e faaalia le matuā naunau o lē ona le fale, pe a oo atu la i le iuga o le uluai palakalafa i le itulau e 3, lea e sii mai ai le Salamo 37:29, tatou te ono faapea atu:
◼ “Ua faamatilatila mai e na upu le manatu o loo talanoaina i lenei lomiga, E Mafai ona E Ola e Faavavau i Parataiso i Le Lalolagi. Seʻi mātau foi le manatu o loo i le palakalafa e 3 o le mataupu 1, i lalo o le ulutala ‘Le Pogai e Mafai ai ona Tatou Talitonu.’ ” Ona tatou faitau atu lea i ai o le palakalafa e 3, ma fai atu le fesili o le palakalafa, ma faaauau ai lava faapena i le palakalafa e 4 ma le 5. Ona tatou faapea atu lea: “Aisea ua matuā lē ogatusa ai tulaga o mea i le taimi nei, ma fuafuaga a le Atua? O loo faamatala mai le tali e isi palakalafa o loo sosoo mai, ma ou te toe fia foi mai i le vaiaso lea i le taimi lava lenei ina ia tali atu ia te oe lena fesili.” Afai e faaalia e lē ona le fale se naunau moni, atonu o le taimi loa lena tatou te mananao ai e ofo atu le tusi. Po o lo tatou filifili foi e faia faapea pe a faaiu le isi au asiasiga o sosoo ai.
6 Ina ia ofoina le tusi “Ola e Faavavau,” tatou te ono faapea atu:
◼ “Ou te mautinoa ua e fiafia i le mauaina o lau lava kopi o lenei lomiga. O le a mafai ai ona e muai faitauina ma tele ai ni mea e te aʻoaʻoina a o leʻi oo atu i le isi a ta talanoaga.” Afai e malie lē ona le fale e ave le tusi, e tatau la ona tatou faapea atu: “Ua lagolagoina lenei galuega e foai faameaalofa. Afai e te finagalo e faia sau foai i le galuega a Molimau a Ieova i le lalolagi aoao, e mafai ona e faia faapea.”
7 O se galuega e sili ona tāua, le toe foi atu e fesoasoani i tagata ina ia latou iloa le auala e mafai ona latou ola ai e faavavau. Na faatonuina e Iesu ona soʻo ina ia aʻoaʻo atu i isi, mea sa aʻoaʻoina ai foi i latou. Tatou te tatalo ia Ieova ina ia auina atili mai nisi tagata faigaluega. O lea la, seʻi o tatou faia ai la tatou vaega i le sailia o ē naunau, ma aʻoaʻoina i latou ina ia avea ma tagata tatou te faigaluega faatasi i le seleselega.—Mata. 9:37; 28:19, 20.