Sailia o Ē Loto Fiafia e Ala i le Molimau Uigā i Ala Tetele

¹ Na faatonuina e Iesu ona soʻo ina ia saili ia i latou ua tatau i ai le faalogo i le feau o le Malo. (Mata. 10:11) Ae peitai, i le tele o nofoaga i aso nei, ua faasolo pea ina faigata ona faafesootaia tagata i o latou fale. O lea la, o le ā e mafai ona faia ina ia oo atu ai i ē ua tatau i ai, atonu o loo misia?

² O le molimau i ala tetele e mafai ona avea ma auala uigā e feiloai atu ai i tagata e lē o mauaina i le galuega mai lea fale i lea fale. E mafai ona tatou molimau i ala tetele i nofoaga faatali pasi, o tafatafa o fale mautotogi e matuā faasā ona soona afea, i paka mo tagata lautele, atoa ma isi nofoaga o ō i ai tagata mo a latou mataupu i aso taitasi.

³ Pe a taʻua le molimau i ala tetele, e iai faalogona o le fefe po o le lē mautonu i isi. Atonu latou te faalotolotolua i le auai i lena galuega auā e tele ina latou matamumuli pe faatalitalia le matuā faitioina e tagata e feita i le feau o le Malo. O nei popolega e masani lava ona leai ni o latou faavae lelei. Ua taʻua e i latou ua iai le poto masani i lenei galuega e faapea, e sili atu le faigofie na i lo o le molimau atu mai lea fale i lea fale. O le mea moni, ua latou iloaina ua masani le toatele o tagata i le faalatalata atu i ai i luga o ala tetele mo le tele o mafuaaga, ma e sili atu ai ona mananao nisi e talanoa mai pe faalogo, na i lo o le latou faia faapea pe a tatou tuʻituʻi atu i o latou faitotoa. O lea la afai tatou te ‘matuā faamalolosi’ atonu o le a faateia ai i tatou i ni iuga lelei.—1 Tesa. 2:2.

⁴ E faapefea ona faia le galuega o le molimau i ala tetele i se auala e sili ona uigā? E tāua le sauniuni lelei. Faitau muamua mekasini, ona e filifili mai lea pe tasi pe lua ni manatu e ono talanoaina e te mautinoa o le a faaoso ai le fiafia o le tagata lua te feiloai. O se taulimaga pe 30 sekone ua talafeagai lea. Ona o le sini ia tatou feiloai totino atu i isi, ia filifili la se vaipanoa e toatele ai ni tagata feoai i taimi uma. E ui o se tulaga tatau le iai o se isi tagata talaʻi e latalata ane, ae e masani lava ona sili atu le lelei o le galulue eseese o le tagata lava ia. O tagata talaʻi e tutū faatasi atonu e matele ai ina faaalu lo la taimi e talatalanoa ai ae lē uai atu i tagata lautele atonu o fia faalogo i le feau o le Malo.

⁵ O le tu i le nofoaga e tasi ma na ona faaaliali atu o mekasini ua lē pei lona uigā o lou muai faalatalata atu i tagata taitoatasi. Taumafai e tilotilo saʻo i mata o le tagata. Ia mafana, faaleuo, ma ia tuusaʻo a o e taumafai e amata se talanoaga. I isi tulaga, atonu e manaomia ona lua savavali teisi faatasi ma le tagata a o e talanoa atu i ai. Afai e tali lelei mai, ofo le mekasini. Ae afai e lē talia le mekasini, atonu e manaomia ona e ofo se sāvali.

⁶ E masani lava ona sili atu ona lelei le saunia o se taulimaga puupuu e faatu aʻe ai se fesili po o se manatu e faaoso aʻe ai le fiafia o le tagata. Afai e te tau vaaia ni foliga fiafia, taumafai ia e iloa le igoa o le tagata, le tuatusi, ia atonu foi ma le numera o lana telefoni ina ia mafai ona e tulitatao pea lona fiafia. Atonu e te faapea atu: “Afai e te manao e iloa atili, ou te fiafia e asiasi atu i lou fale pe o le a ou faafesootaia foi se isi Molimau e faia faapea.”

⁷ Na auai se toeaina i le molimau atu i ala tetele ma faalatalata atu ai i se fafine ma ia iloa ai sa leʻi maua lava e lenei fafine se avanoa e talanoa ai ma se Molimau i lona fale. Sa ia talia le tusi ma malie e alu atu se tuafafine i lona fale i se taimi na avanoa ai. O loo toatele pea ē ua tatau ai e matuā mafai ona maua ma fesoasoani i ai pe afai e uigā la tatou molimau atu i ala tetele.—Galu. 17:17.