Pusa Fesili

◼ E mafai faapefea ona o tatou faia ni tali e sili ona uigā i sauniga?

Tatou te āloālo atu ma le naunautai ina ia tatou faapotopoto faatasi i sauniga faalevaiaso a le faapotopotoga. O inā tatou te mauaina ai se avanoa e faaalia atu ai lo tatou faatuatua ma faalaeiauina ai isi e ala lea i le faia o ni a tatou tali. (Faata. 20:15; Epe. 10:23, 24) E tatau ona tatou manatunatu i le faia o tali o se faaeaga, ma tatou tauivi ina ia faia ai e le aunoa se sao. E mafai faapefea ona tatou faia ina ia sili atu ona uigā o lenei mea?

O le laasaga muamua lava, o le sauniuni lea. O le muai faitauina ma manatunatu loloto i le mataupu e tāua tele. Ia taumafai ina ia maua le agaga po o le uiga moni o le mea ua folasia mai. E ui lava atonu na talanoaina le mataupu i se taimi ua mavae atu, a e ia vaavaai mo so o se faalautelega po o ni manatu faaopoopo o aumaia ai. Ia manatua le matua o le mataupu atoa. Pe a sauniuni ni tali mai se lomiga o loo faatomua mai ai se suesuega auiliili o se tusi o le Tusi Paia, e pei o le tusi Revelation Climax, ia taumafai ina ia iloa po ua faapefea ona fesootai se fuaiupu patino ma isi fuaiupu na o loo siosiomia ai lea fuaiupu. O le mulimuli i nei fautuaga o le a atili faaolaolaina ai lou tomai faalemafaufau. O le a fesoasoani lena mea ia te oe ina ia e sauniunia ai ni tali lelei ma e mauaina ai le olioli ona ua faia sou sao.

O tali e sili ona lelei, o tali e faapupuu, ma faafaigofie, e faavae aʻe i le lomiga lea e suesueina. O le tagata muamua lava e tali, e tatau ona tali saʻo atu i le fesili, a e tuu isi manatu e fai atu ai nisi faaopoopoga. Ia aloese mai le faia o tali uumi, ma feosoosofai solo e faamaimau ai fua le taimi, ma lē mafai ai e isi ona latou mauaina le avanoa e faia ai so latou sao. Ia e tali atu i au lava upu, nai lo o le faitau atu o lau tali mai le lomiga. O tali faaopoopo e mafai ona faaaofia ai manatu o loo aofia i mau o le Tusi Paia o loo taʻua ai. Ia faalogologo ma le faaeteete i tali a isi, ina ia alofia ai le toe taʻua atu foi o manatu ua uma ona taʻua muamua.

E lelei le sii i luga o lou lima i nisi taimi, a e lē o le sii lava i palakalafa uma. Matou te valaaulia le au talavou ina ia faia ni o latou sao i le faia o ni tali. Afai e te faatalatu e faia se tali, e mafai ona e muai faailoa atu i lē o loo faia le suesuega, le palakalafa e te manao e fai atu ai sau tali, ma o le a faapena ona ia tuuina atu ia te oe le avanoa e faia ai sau tali.

E tatau ia i tatou uma lava ona faia se taumafaiga naunautai ia maua se mea e tufa atu i sauniga a le faapotopotoga lea e aofia ai le faia o se sao o le aofia. Ia manatua, o le manuia o na sauniga e faalagolago tele i lo tatou naunau, ma le faia o ni tali uigā.—Sala. 26:12.