Ia Avea ma Sē e Atiina aʻe Ai

¹ Talu ai ona ua tatou ola i “aso faigata,” ua manaomia ai e i tatou uma lava se faalaeiauga. (2 Timo. 3:1) I le mataalia i lenei manaoga e oo lava i ona aso, na naunau ai Paulo e faaaogā aufaatasiga ma ona uso e avea ma avanoa e “fefaamafanafanai” ai. Sa ia uunaia ona uso ina ia “tausisi i mea . . . e fefaamafanafanai [“e atiina aʻe ai e le tasi le isi,” NW].” (Roma 1:11, 12; 14:19) O nei taumafaiga na taulau manuia i le “faamalosia o loto o le au soo, ma apoapoai atu ia tumau i le faatuatua.” (Galu. 14:22) Tatou te matuā manaomia lava lena ituaiga o faalaeiauga i aso nei.

² E mafai ona tatou atiina aʻe isi e ala i a tatou upu. Pe a faaaogā saʻo, ona mafai lea ona avea a tatou upu e pei “o moli auro ia i ato ario togitogi faamamanuina.” (Faata. 25:11) O le faia o se vaega i sauniga, ua tatou “fefaamafanafanai ai o le tasi i le isi.” (Epe. 10:25, NW) E mafai ona faaaogā o tatou laulaufaiva i se auala mautinoa pe a tatou fetufaai i mea na tutupu, avatu se faamālō, pe talanoa i mea faaleagaga. O lea faaaogaina o le laulaufaiva i mea e atoatoa ona mamā ʻe lelei e atiina aʻe ai, i le taʻuina atu o mea lelei i ē o loo faalogologo mai.’—Efe. 4:29.

³ Talanoa i Mea e Atiina aʻe Ai: I le Filipi 4:8, ua saunia ai e Paulo ni taʻiala aogā mo a tatou talanoaga. Na faapea mai o ia e tatau ona tatou talanoa i mea e moni, mea e tauleleia, o mea e tonu, mamā, matagofie, mea ua logoleleia, o amioga lelei, ma mea e viiviia. E mafai pea lava ona tatou mautinoa o mea o tatou tāutatala atu ai e moni ma e aogā i isi pe afai e faavae mai i le Afioga a le Atua. (Ioa. 17:17) O lo tatou tuuina atu faa-Kerisiano, o mea ua tatou aʻoaʻoina mai sauniga a le faapotopotoga, le auala o tatou faataunuuina atoatoa ai la tatou faiva, ma isi mea faapena, o ni mea e tatau ona matuā manatunatu mamafa i ai. O talanoaga e atiina aʻe ai e uiga i tapulaa ma mataupu silisili o le Afioga a le Atua, e mautinoa e fesoasoani ia i tatou ina ia “faapoto ai mo le faaolataga.” (2 Timo. 3:15, NW) E mafai ona tatou faaleo atu lo tatou talisapaia mo amioga mamā ua faia e i latou o i le faalapotopotoga mamā a Ieova. E mafai ona tatou matuā viiviia gaoioiga alofa a o tatou uso. (Ioa. 13:34, 35) O mea uma e logoleleia e aofia ai ma uiga e atoatoa ona mamā faa-Kerisiano o le faatuatua, olioli, filemu, ma le onosai, na o loo tatou mātauina i o tatou uso. O talanoaga e faatatau i mea e viia ma aogā ʻe lelei mo le atiina aʻe’ ai o isi.—Roma 15:2.

⁴ O aso uma lava, tatou te fesagai ai ma popolega o le lalolagi e faalotovaivaia ai. Maeu le faafouina ai pe a aua le faapopoleina ai i tatou i na mea, a e ia aufaatasi i le alofa ma o tatou uso! O taimi tāua ua mafai ona tatou auaufaatasi ai ma o tatou uso, o se oloa tāua e manaomia ona faapelepele i ai. Afai e avea pea i tatou ma mea e faamalosia ma atiina aʻe ai, o le a faapea mai ma le faamaoni nisi e uiga ia i tatou: “Ua latou faamafanafanaina loʻu loto.”—1 Kori. 16:18.