Ia Taulai Lou Mafaufau i Mea o i Lugā
1 I le faia o se faamatalaga e uiga i le tupulaga lea o loo siomia ai i tatou ma se manatu e uiga i le lumanai, na taʻua ai e se mataupu i le New York Times o Tesema 31, 1994, e faapea: “Ua matataʻu tagata i le lumanai. Ua matataʻu i latou e tusa ai ma tulaga o galuega, tulaga o faamaʻi, tulaga o le tamaoaiga, ma tulaga o tulai mai i le lalolagi.” So o se mea lava tatou te vaai i ai, e iai lava se lagona o le lē mautonu e uiga i le olaga. O la tatou faiva o ni Molimau a Ieova, ua tatou feiloai ai pea ma tagata o ē o iai nei lagona. A o tatou fesagai ma ia lava faafitauli e pei o i latou, ae ona o lo tatou faatuatua ma le mautinoa i folafolaga moni i le Afioga a le Atua, ua mafai ai ona matuā ese la tatou vaaiga i le olaga ma le lumanai o tagata.—Isa. 65:13, 14, 17.
2 O o tatou faamoemoega mo se lalolagi e sili ona lelei ma le manatu e uiga i le faamoemoe mautinoa, ua māfua ai ona faalogo le toatele o tagata loto faamaoni i le feau o loo tatou avatua ia i latou. O le toatele o tagata ua oo i le loto mafatia ma pagatia ona o faafitauli o le olaga, ua latou iloa o le talanoa ma i tatou, ua faamafanafanaina ai i latou. Talu ai latou te fiafia i mea o loo latou faalogo i ai, ua malilie ai nisi e suesueina le Tusi Paia ma i tatou. Ae peitai, i nisi taimi, atonu e mananao ai tagata ina ia faateaeseina a latou avega mamafa i le talanoaina lea o nisi o o latou faafitauli totino. A o faaaluina se taimi e faalogologo ai i popolega totino o se tasi, aua lava neʻi galo lo tatou sini, o le aʻoaʻoina lea o tagata i upu moni mautinoa o le Afioga a le Atua.
3 Tatou te fia alolofa ma malamalama ia i latou ua mafatia. Na faataatia e Iesu le faaaoaoga ina ua ia fetalai, e pei ona faamauina i le Mataio 11:28: “Ia outou o mai ia te au, o outou uma o e tigaina ma mafatia i avega.” Tatou te mananao ia faalaeiau atu i tagata i lea lava auala. Ae peitai, ia mātau, i le faaiuga o le fuaiupu e 28, na fetalai ai Iesu: “O aʻu foi e malolo ai outou.” E tatau foi ona avea lena ma o tatou sini. Tatou te faia faapea e ala i le tufa atu o folafolaga e malolo ai mai le Afioga a le Atua. I le avea o sē e faalogologo lelei ua faaalia ai lo tatou naunau totino ma le manatu mamafa, ma e matuā tāua tele lena i le faataunuuina o lo tatou tofiga e talaʻi le tala lelei o le Malo, ma fesoasoani i isi ina ia iloa lelei o le Malo, ua na o lea le vaifofo mautinoa mo faafitauli uma o tagata.—Mata. 24:14.
4 O la tatou galuega, e lē o ni tagata tomai i le tausiga o le soifua mālōlōina. Nai lo o lena, o le galuega e pei ona faamatalaina e le aposetolo o Paulo, e pei ona mātauina i le 1 Timoteo 4:6, o se faiva e taulai saʻo i le “mataupu [“aʻoaʻoga,” NW] lelei,” o aʻoaʻoga o loo faavae i le Afioga a le Atua. O i latou e iai faafitauli totino po o faalogona ootia, e manaomia ona faalaeiauina ina ia faalagolago atu ia Ieova. Aʻoaʻo i latou ina ia taulai o latou ‘loto i mea i lugā’—o mea e faatatau i le faamoemoe o le Malo. (Kolo. 3:2) Pe a uaʻi saʻo atu mafaufau o tagata i le Afioga a le Atua, e mafai ona atiina aʻe ai i latou ona o le taaiga malosi ua faia e le Afioga a le Atua i o latou olaga.—Epe. 4:12.
5 O lea, o lo tatou sini, o le fesoasoani lea i tagata ina ia taulai atu o latou mafaufau i mea e ‘tonu, mamā, matagofie, ma viia.’ (Fili. 4:8) Afai e taulai o latou manatu i le faamoemoe o le Malo, o le a faamanuiaina i latou i le auala lava lea e pei foi o i tatou. O le a latou tofo foi i le olioli e maua i le iloa e faapea, o le a foia mulimuli ane e Ieova o latou faafitauli uma e ala i lona Malo.—Sala. 145:16.