Le Auala e Faia ai Soo e Ala i le Tusi o Le Poto

¹ O le sini e faanaunau i ai Kerisiano uma o le aʻoaʻo atu lea o le upu moni i isi ma ia faia ma soo i latou o ē “ua saunia i le ola faavavau.” (Galu. 13:48; Mata. 28:19, 20) Ua tuulima e le faalapotopotoga a Ieova i o tatou aao se meafaigaluega matagofie e faataulau ai lenei sini—o le tusi lea o Le Poto e Taʻitaʻia ai i le Ola e Faavavau. Ua faamatilatila mai i lona ulutala le tāua tele o suesuega faale-Tusi Paia i aiga, auā e faalagolago le ola e faavavau i le aveina i loto o le poto e uiga ia Ieova, le Atua moni e toatasi, ma lona Alo, o Iesu Keriso.—Ioa. 17:3.

² Ua avea nei le tusi o Le Poto ma lomiga autū a le Sosaiete e faaaogā i le faia o suesuega faale-Tusi Paia i aiga. O lona faaaogaina, e mafai ai ona tatou aʻoaʻo atu ai le upu moni i se tulaga e faigofie, e manino, ma puupuu. O le a aogā lenei e pāʻia ai loto o i latou o ē ua aʻoaʻoina. (Luka 24:32) O le mea moni, o loo iai se manaoga mo lē o loo faafoeina le suesuega ina ia faaaogā ni auala lelei tau aʻoaʻo atu. Ona o lena mafuaaga, ua saunia ai lenei faaopoopoga, e faataoto mai ai ni fautuaga ma ni faamanatuga e faatatau i auala e aʻoaʻo atu ai, ua faamaonia lo latou aogā. I le faautauta, ma ia fuafua i tulaga o le tagata, e mafai ona faasolosolo ai lou faaaogaina o nisi manatu po o manatu uma foi ua avatu iinei. Ia teu lelei lenei faaopoopoga, e fai ma e toe tapa i ai. E mafai ona fesoasoani ia te oe ni manatu eseese ina ia atili ai ona e taulau manuia i le faia o ni soo, e ala i le faaaogaina o le tusi o Le Poto.

³ Ia Faia se Suesuega Faale-Tusi Paia e Agaigai i Luma i le Aiga: Ia iai sou naunau moni i le tagata suesue, i le manatu e iai se taimi o le a avea ai o ia o se soo Kerisiano ma o se uso po o se tuafafine faaleagaga. Ia e māfana, ia faaleuo, ma ia aasa. Pe a e faalogologo lelei, e mafai ai ona e iloa le isi tagata—lona talaaga na tupuga mai ai ma ona tulaga i le olaga—o mea na o le a aogā e te iloa lelei ai ona fesoasoani faaleagaga ia te ia i se tulaga e sili atu ona lelei. Ia e lotomalie e fai mea uma e te mafaia mo le lelei o le tagata suesue.—1 Tesa. 2:8.

⁴ Pe afai ua mautū le fuafuaga mo se suesuega, atonu e lelei le suesueina o mataupu o le tusi o Le Poto i le faasologa lena ua uma ona faanumera ai. O lenei faiga o le a mafai ai e le tagata aʻoga ona maua se malamalamaga faasolosolo lelei i luma o le upu moni, auā o loo talanoaina e le tusi mataupu faale-Tusi Paia i se faasologa e sili ona talafeagai. Ia faafaigofie le suesuega ma ia iai i se tulaga e faafiafia loto ina ia ola ai ma faagasolo lelei pea. (Roma 12:11) Pe a tusa ai ma tulaga ma le atamai o le tagata suesue, atonu e talafeagai mo oe ona suesueina le tele o mataupu i se lesona e tasi i le umi e tasi le itula pe ā, e aunoa ma le faatopelau o le suesuega. O le a sili atu ona lelei le agaigai i luma o tagata suesue pe afai e tausisi pea le faiaʻoga ma le tagata aʻoga i le faia o le la suesuega i vaiaso taitasi. Ona tatau ai lea ona mafai e le toatele o tagata ona faamaeʻaina mataupu e 19 pe tusa ma le ono masina pe ā.

⁵ Ia faatomua mataupu taitasi i ni nai faamatalaga pupuu e faagaee aʻe ai le naunau i le mataupu. O le a e mātauina, o ulutala o mataupu taitasi o lona matua foi lena, lea e manaomia ona faamamafaina. Ua tofu tamai ulutala taitasi ma manatu autū o loo iai, e fesoasoani ia te oe ina ia taulai atu ai pea manatu i le matua o le mataupu. Faaeteete i le soona tele naʻuā o au faamatalaga e fai. Ae ia taumafai e utufia mai lagona o le tagata suesue. O le fesiligia o fesili patino faatupu manatu i le tagata suesue, e faavae aʻe i mea ua uma ona ia iloa, o le a fesoasoani ia te ia e manatunatu ai ma faia ai faaiuga saʻo. (Mata. 17:24-26; Luka 10:25-37; tagai i le School Guidebook, itulau 51, palakalafa 10.) Ia pipii mau i faamatalaga ua tusia i le tusi o Le Poto. O le faaofi atu o nisi faamatalaga faaopoopo e mafai ona tosoesea ai pe faanenefuina ai manatu autū ma faaumiumi ai le suesuega. (Ioa. 16:12) I le tele lava o tulaga, pe afai e lāgā mai se fesili e lē fesootai atu i le mataupu o loo suesueina, e mafai ona e taliina lena fesili pe a uma le suesuega. O le faia faapea o le a mafai ai ona e faamaeʻaina atoa le lesona mo lena vaiaso e aunoa ma le faalavelavea ai. Ia faamalamalama atu i le tagata suesue e faapea, e mulimuli ane o le a taliina le tele o ana fesili a o faagasolo ana suesuega.—Tagai i le School Guidebook, itulau 94, palakalafa 14.

⁶ Pe afai e malosi le talitonuga o le tagata suesue i le Tolutasi, le ola pea o le solu, le afi i seoli, po o isi talitonuga sese faapena, ma e lē o faamalieina foi o ia i faamatalaga ua aumaia i le tusi o Le Poto, e mafai ona e avatu ia te ia le tusi o le Reasoning po o isi lomiga o loo talanoaina ai se tasi o na mataupu. Taʻu ia te ia o le a lua talanoaina lena mataupu pe a uma ona ia mafaufau i mea o le a ia faitau i ai.

⁷ O le amataina ma faaiuina o le suesuega i se tatalo mo le taʻitaʻiga ma le faamanuia a Ieova e faamamaluina ai le suesuega, e fesoasoani i se tasi e maua ai uiga faaaloalo mo le suesuega, ma uaʻi atu ai ona manatu ia Ieova o le Faiaʻoga moni. (Ioa. 6:45) Pe afai o loo ulaula pea le tagata suesue, atonu e manaomia ona e talosagaina o ia ina ia aua le ulaula a o fai le suesuega.—Galu. 24:16; Iako. 4:3.

⁸ Ia Uigā le Aʻoaʻo Atu e Faaaogā ai le Tusi Paia, o Faataitaiga, ma Fesili Autalu: E tusa lava po o le ā le tele na suesueina ai le mataupu i taimi ua teʻa, ae o se faiaʻoga tomai o le a ia toe autaluina lesona taitasi ma mafaufau i tulaga o tagata suesue taitoatasi. E aogā lenei faiga ina ia saunia ai mo nisi o fesili atonu o le a fesili mai ai le tagata suesue. Ina ia uigā le aʻoaʻo atu, ia maua se vaaiga manino i manatu autū o le mataupu. Ia suʻe i mau ina ia iloa le auala o loo faatatau atu ai i le mataupu, ma ia filifili po o ā mau e tatau ona faitau a o fai le suesuega. Ia manatunatu pe faapefea ona e aʻoaʻo atu e faaaogā ai faataitaiga ma fesili autalu o loo i le iuga o le mataupu.

⁹ O le faaaogāina ma le uigā o mau, o le a e fesoasoani ai i le tagata suesue ina ia ona talisapaia o lea o loo ia suesueina moni lava le Tusi Paia. (Galu. 17:11) Pe a faaaogā le pusa “Ia E Faamasani Lelei i Lau Tusi Paia,” i le itulau e 14 o le tusi o Le Poto, ia faasino atu ia te ia le auala e suʻe ai mau. Faaali ia te ia le auala e iloa ai fuaiupu o mau o loo sii mai i le mataupu. Pe a lava le taimi, ia suʻe ma faitau mau faasino na e lē o sii maia o latou faamatalaga. Ia fai mai se faamatalaga a le tagata suesue i le auala o loo lagolagoina pe faamanino ai e nei mau mea o loo taʻua i le palakalafa. Ia faamamafa vaega autū o mau ina ia ona talisapaia ai mafuaaga mo manatu autū o le lesona. (Nee. 8:8) O le tulaga masani, e lē manaomia e le faiaʻoga ona faaopoopo ane nisi mau i le talanoaga e sili atu nai lo mau na ua iai i le tusi. Ia fai ni faamatalaga i le aogā o le iloaina o igoa o tusi o le Tusi Paia ma le faasologa saʻo o loo tusia ai. Atonu e fesoasoani foi pe a faitau e le tagata suesue le itulau e 27 e oo i le 30 o le Watchtower o Iuni 15, 1991. Pe afai e talafeagai, ia faalaeiau e faaaogā le Tusi Paia o le New World Translation. E mafai ona faasolosolo ona e faataitai i ai le auala e faaaogā ai ona vala eseese, e pei o le mau faasino i autafa o fuaiupu ma le faasino tusi o upu faale-Tusi Paia.

¹⁰ Ua faamatala mai i le suesuega e 34 i le Theocratic Ministry School Guidebook e faapea, o faataitaiga e faagaeeina ai gaoioiga o le mafaufau o se tasi ma faafaigofie ai ona ia taofia manatu fou. Ua tuufaatasia e faataitaiga le logoleleia i le mafaufau ma le uunaiga tau faalogona, ina ia faaoo atu ai le feau faatasi ma se uunaiga malosi lea e lē masani ona faigofie ona maua i le na o ni nai faamatalaga faigofie o mea moni. (Mata. 13:34) Ua iai i le tusi o Le Poto le tele o faataitaiga tau aʻoaʻo atu e ui ina faigofie ae uigā. Mo se faaaoaoga, o le faataitaiga o loo faaaogā i le mataupu e 17 e atiina aʻe ai se talisapaia mo le auala o loo foai mai ai e Ieova i se uiga faaleagaga, o meaʻai, o lavalava, ma fale e ala mai i le faapotopotoga Kerisiano. O ata matagofie o loo iai i le tusi o Le Poto e mafai ona faaaogā ma le uigā e faagaee ai lagona. I le tamai ulutala “Le Toetu Olioli,” i le itulau e 185, o le a faamalosia le manatu tāua o loo uunaia mai i le palakalafa e 18 e ala i le fai atu i le tagata suesue e toe tagai i tua i le ata o loo i le itulau e 86. O lenei faiga atonu e uunaia ai o ia e mafaufau i le toetu o se mea moni lava e tupu i le Malo o le Atua.

¹¹ E manaomia ona agaigai i luma faaleagaga tagata suesue o le Tusi Paia pe a maeʻa lesona taitasi. Ona o lenei mafuaaga, aua le faatalatū e fesili atu fesili autalu o loo i le pusa o le “Seʻi Tofotofo Lou Iloa” lea o loo i le faaiuga o mataupu taitasi. Aua le faamalieina i le tau ina faalogo atu i se tali saʻo i mea ua suesueina. O le tele o nei fesili ua fuafuaina ina ia utufia mai ai le tali a le tagata lava ia mai lona loto. Mo se faaaoaoga, tagai i le itulau e 31, lea o loo fesiligia ai le tagata suesue e faapea: “O ā uiga o Ieova le Atua e sili ona e fiafia i ai?”—2 Kori. 13:5.

¹² Aʻoaʻo Tagata Suesue Ina ia Sauniuni mo le Suesuega: O se tagata suesue na te muai faitauina lana lesona, faailoga ana tali, ma mafaufau i le auala e faaali atu ai ana tali i ana lava upu, o le a vave lava lona agaigai i luma faaleagaga. E ala i lau faaaoaoga ma au faalaeiauga, e mafai ai ona e aʻoaʻoina o ia e sauniuni mo le suesuega. Ia faaali atu ia te ia lau tusi, lea ua uma ona e faailogaina pe vase lalo o upu ma fuaitau autū. Ia faamatala le auala e maua ai tali tuusaʻo i fesili ua tusia. O le lua sauniunia faatasi o se mataupu e tasi e mafai ona fesoasoani ai i le tagata suesue. Ia faalaeiau o ia e faamatala mai ona manatu i ana lava upu. Ua na o lena le auala e manino mai ai po o ia malamalama i le mataupu. Pe afai e faitau mai ana tali i le tusi, e mafai ona e faaalaina lona mafaufau i lou fesili atu i ai pe faapeī lona faamatalaina atu o na manatu i se isi tagata i ana lava upu.

¹³ Ia faalaeiau le tagata suesue e faitau i mau na e lē o sii maia upu i le palakalafa pe a fai ana sauniuniga i vaiaso taitasi, auā atonu e leai se taimi e faitau uma ai na mau a o fai le suesuega. Ia faamālō ia te ia i ana taumafaiga sa fai i ana lesona. (2 Pete. 1:5; tagai i Le Olomatamata o Aokuso 15, 1993, i le itulau e 13-14, mo nisi fautuaga i mea e mafai ona fai e le faiaʻoga ma le tagata suesue ina ia faateleina ai mea e aʻoaʻoina i le suesuega faale-Tusi Paia.) I lenei auala, o loo aʻoaʻoina ai le tagata suesue ina ia sauniuni ma faia ni tali uigā i sauniga a le faapotopotoga. O le a ia aʻoaʻoina foi le auala e atiina aʻe ai ni uiga masani lelei mo suesuega totino lea o le a faaauupegaina ai o ia e agaigai pea i luma i le upu moni pe a maeʻa lana ia lava suesuega faale-Tusi Paia i le tusi o Le Poto.—1 Timo. 4:15; 1 Pete. 2:2.

¹⁴ Ia Tataʻi Tagata Suesue i le Faalapotopotoga a Ieova: O le tiute tauave a lē o loo faia le soo le tataʻi o le naunau o le tagata suesue i le faalapotopotoga a Ieova. O le a sili atu ona vave le agaigai i luma o le tagata suesue i le taʻumatuaina faaleagaga pe a ia amanaia ma talisapaia le faalapotopotoga ma iloa le manaomia ona avea o ia o se tasi o lea faalapotopotoga. Tatou te mananao ina ia fiafia o ia i le auaufaatasi ma tagata o le Atua ma ia naunau e fia auai faatasi ma i tatou i le Maota o le Malo, o iina e mafai ona ia maua ai le lagolagosua faaleagaga ma tau i faalogona lea e ofo mai e le faapotopotoga Kerisiano.—1 Timo. 3:15.

¹⁵ Ua lomia le polosiua o Molimau a Ieova—Autasi i le Faia o le Finagalo o le Atua i le Lalolagi Aoao ina ia faamasani ai tagata taitoatasi i le faalapotopotoga vaaia e tasi a Ieova o loo faaaogā i aso nei e faataunuu ai lona finagalo. Pe a mautū le suesuega, aisea e lē avatu ai se kopi o lea polosiua i le tagata suesue? Mai lava i le amataga, ia valaaulia pea le tagata suesue ina ia auai i sauniga. Faamatala i ai le auala e faia ai. E mafai ona e taʻu ia te ia le matua o le lauga lautele o le a sosoo mai pe faasino ia te ia le mataupu lea o le a talanoaina i le Suesuega o Le Olomatamata. Atonu e mafai ona e avatuina o ia e faamaimoa i le Maota o le Malo pe a lē o faia ai se sauniga ina ia faaitiitia ai sona popole atonu o iai i le alu atu i se nofoaga fou mo le uluai taimi. E mafai ona e ofo atu i ai se auala mo sauniga. Pe a ia auai, ia faafeiloaia ma le māfana o ia ma ia faia i se auala o le a fiafia ai i lona auai. (Mata. 7:12) Ia faafeiloai atu o ia i isi Molimau, e aofia ai le autoeaina. E faamoemoe, o le a amata ona ia manatu i le faapotopotoga o sona aiga faaleagaga. (Mata. 12:49, 50; Mare. 10:29, 30) E mafai ona e faataatia se sini mo ia, e pei o le auai i se sauniga e tasi i vaiaso taitasi, ma faasolosolo ai lava ona sosoo atu ma isi sini.—Epe. 10:24, 25.

¹⁶ A o faagasolo pea le suesuega faale-Tusi Paia i le aiga i le tusi o Le Poto, ia faamamafa vaega na o loo faamatilatila mai ai le manaoga mo auaufaatasiga e lē aunoa ma le faapotopotoga i sauniga. Ia mātau patino mai itulau e 52, 115, 137-139, 159, faapea ma le mataupu e 17. Ia faaali ou lava lagona loloto o le talisapaia mo le faalapotopotoga a Ieova. (Mata. 24:45-47) Ia e talanoa atu i se uiga lelei e faatatau i le faapotopotoga o loo e auai atu i ai ma mea ua e aʻoaʻoina mai sauniga. (Sala. 84:10; 133:1-3) E lelei pe afai e mafai e le tagata aʻoga ona matamata i ata vitiō uma a le Sosaiete, e amata mai i le ata o le Jehovah’s Witnesses—The Organization Behind the Name. Mo nisi fautuaga i le auala e tataʻi ai le naunau o le tagata i le faalapotopotoga, tagai i Le Olomatamata o Iuni 1, 1985, itulau e 16-20, ma le faaopoopoga o La Tatou Faiva o le Malo o Aperila 1993.

¹⁷ Faalaeiau i Tagata Suesue Ina ia Molimau Atu i Isi: O la tatou sini e ala ai ona suesue ma tagata ina ia faia ma soo e molimau mo Ieova. (Isa. 43:10-12) O le uiga o lena mea e ao i le faiaʻoga ona faalaeiau i le tagata suesue ina ia talanoa atu i isi e faatatau i mea o loo ia aʻoaʻoina mai le Tusi Paia. E mafai ona faia lenei mea e ala i le fesili atu i ai, “E faapefea ona e faamatalaina lenei upu moni i lou aiga?” po o le “O le ā le mau e mafai ona e faaaogaina ina ia faamaonia ai lenei mea i sau uo?” Ia faamamafa vaega autū o i le tusi o Le Poto o loo faalaeiauina mai ai le molimau atu, e pei o itulau e 22, 93-95, 105-106, e faapena foi ma le mataupu e 18. E ono mafai ona avatu i le tagata suesue ni sāvali ina ia faaaogā i le molimau atu lē fuafuaina i isi. Ia fautua atu ina ia valaaulia tagata o lona aiga ia faatasi ai i lana suesuega. Pe e iai ni ana uo o ē mananao e suesue? Ia fai atu i ai e faasino atu ia te oe i latou o ē loto naunau.

¹⁸ E ala i le faatasi atu i le Aʻoga o le Faiva Faatiokarate ma le Sauniga o le Auaunaga, o le a mafai ai e lē ua iai le faamoemoe e avea ma soo ona mauaina toleniga faaopoopo ma uunaiga o le a fesoasoani ai ia te ia ina ia avea ma tagata talaʻi o le tala lelei. Pe a ia faamatala mai ua naunau e tusia lona igoa i le aʻoga po o le avea ma tagata talaʻi e lei papatisoina, e ao ona faaaogaina loa taʻiala ua faataoto mai i itulau e 98 ma le 99 o la tatou tusi o le Our Ministry. Pe afai o loo iai se vala o lona olaga o taofia ai o ia mai le ausia o agavaa, e mafai ona e sailiili atu i lomiga a le Sosaiete mo ni fesoasoani aogā e fesootai atu i le mataupu ma talanoa faatasi ma ia. Mo se faataitaiga, atonu ua faafaigata i se tagata suesue ona foia le pulea e le tapaa po o isi vailaau faasaina. Ua faasino mai e le tusi Reasoning ni mafuaaga malolosi faale-Tusi Paia e tatau ai i se Kerisiano ona alofia lena masani ua fai ma amio e faaleagaina ai, ma ua faavasega mai i le itulau e 112 se auala ua faamaonia lona aogā i le fesoasoani atu i isi ina ia saʻoloto mai ai. Ia tatalo faatasi ma ia e faatatau i le mataupu, aʻoaʻo ia te ia ina ia atiina aʻe lona faalagolago atu ia Ieova mo le fesoasoani.—Iako. 4:8.

¹⁹ O le laasaga e ao ona mulimuli ai ina ia fuafuaina pe ua agavaa se tasi e auai i le faiva i le fanua ua faatulaga mai lea i Le Olomatamata o Ianuari 15, 1996, itulau e 16, palakalafa 6. Pe a agavaa loa lē o suesue, o le a maua se fesoasoani pe a faia se faataitaiga e saunia ai o ia mo le aso muamua e alu atu ai i le auaunaga i le fanua. Ia faia i se auala mautinoa se talanoaga i auala e masani ona tali mai ai tagata ma teteega i la outou oganuu. Pe afai e talafeagai ai, amata muamua o ia i le galuega mai lea fale i lea fale, ma faasolosolo ai ona toleniina o ia i isi vala o le faiva. Pe afai e faapupuu ma faafaigofie au lauga, o le a faigofie foi la mo ia ona faataitai i ai. Ia faamalosiau ma atiina aʻe, faaalia le olioli i le galuega, ina ia mauaina foi e ia ou uiga faaalia ma faaatagia atu. (Galu. 18:25) O le sini o se soo fou ia avea ma tagata talaʻi e talaʻi pea ma le maelega o le tala lelei. Atonu e mafai ona e fesoasoani ia te ia ina ia faia se faasologa e talafeagai mo le auaunaga. Ina ia mafai e ia ona agaʻi i luma lona tomai e molimau atu ai i isi, e mafai ona e fautuaina o ia e faitau lomiga o le Watchtower o Aokuso 15, 1984, itulau 15-25; Iulai 15, 1988, itulau 9-20; Le Olomatamata o Me 15, 1991, itulau 21-25; ma le Ianuari 1, 1994, itulau 20-25.

²⁰ Ia Faaosofia Tagata Suesue Agaʻi i le Tuuina Atu ma le Papatisoga: E tatau ona mafai e se tagata suesue e faamaoni lona loto ona lava mea o aʻoaʻoina e ala i se suesuega o le tusi o Le Poto e faia ai se tuuina atu i le Atua ma agavaa ai mo le papatisoga. (Faatusatusa i le Galuega 8:27-39; 16:25-34.) E ui i lea, a o lei faaosofia le tagata e faia se tuuina atu, e manaomia ona ia atiina aʻe le tuutoina ia Ieova. (Sala. 73:25-28) I le suesuega atoa, vaai mo avanoa e atiina aʻe ai le talisapaia mo uiga o Ieova. Faamatala atu ou lava lagona loloto mo le Atua. Fesoasoani i le tagata suesue ina ia mafaufau i auala e atiina aʻe ai se faiā māfana ma Ieova. Pe a oo ina ia iloa moni ma alofa i le Atua, ona auauna atu ai lea o ia i le Atua ma le faamaoni, auā o le amioatua e fesootai atu lea ma le auala o tatou manatu ai e faatatau ia Ieova o se peresona.—1 Timo. 4:7, 8; tagai i le School Guidebook, itulau 76, palakalafa e 11.

²¹ Taumafai e pāʻia le loto o le tagata suesue. (Sala. 119:11; Galu. 16:14; Roma 10:10) E manaomia ona ia iloa le auala e aafia moni ai lava o ia i le upu moni ma faia se faaiuga i mea ua ia aʻoaʻoina. (Roma 12:2) Pe o talitonu moni lava o ia i le upu moni ua faaooina atu ia te ia mai lea vaiaso i lea vaiaso? (1 Tesa. 2:13) Faatasi ai ma lena faamoemoe, e mafai ona e vaneina mai manatu lilo o le tagata suesue e ala i le fesili atu i ai o fesili faatupumanatu e pei: O le ā sou lagona e faatatau i lenei mea? E mafai faapefea ona e faatatauina lenei mea i lou olaga? I ana tali mai, atonu o le a e iloa ai po o fea o loo manaomia tele ai se fesoasoani ina ia pāʻia lona loto. (Luka 8:15; tagai i le School Guidebook, itulau 52, palakalafa 11.) O faamatalaga mo ata i le itulau e 172 ma le 174 o le tusi o Le Poto o loo iai se fesili e faapea: “Pe ua e faia ea se tuuina atu i le Atua i le tatalo?” ma “O le ā o taofia oe mai le papatisoina?” Atonu o le a aogā nei mea e uunaia ai le tagata suesue e faia se gaoioiga.

²² O le laasaga e ao ona mulimuli ai pe a faanaunau se tagata talaʻi e lei papatiso o loo faatulaga mai i Le Olomatamata o Ianuari 15, 1996, itulau e 17, palakalafa 9. Na tusia le tusi o Le Poto ma le faamoemoe e faaauupegaina ai le tagata ina ia tali i “Fesili mo i Latou o Loo Faanaunau e Fia Papatiso,” na o loo i le tamaitusi o Aʻoaʻoga Faavae o le Tusi Paia, lea o le a toe autaluina e toeaina faatasi ma ia. Pe afai na e faamamafa atu tali o fesili o tusia i le tusi o Le Poto, ua tatau la ona lava saunia le tagata suesue mo fesili e faia e toeaina mo le sauniuni atu i lona papatisoga.

²³ Fesoasoani ia i Latou ua Maeʻa Suesuega Faale-Tusi Paia i Aiga: E ao ona faatalitalia e oo atu i le taimi e maeʻa ai le suesuega a le tagata i le tusi o Le Poto, ua tatau ona manino lelei mai lona faamaoni ma le loloto o lona faanaunau e auauna atu i le Atua. (Mata. 13:23) O le mafuaaga lena ua fesili mai ai faapea le tamai ulutala mulimuli o le tusi, “O le ā o le a E Faia?” Ua augani atu palakalafa faaiu i le tagata suesue ina ia taulai atu i le faiā ua tatau ona ia atiina aʻe ma le Atua, le manaoga o iai i le faatatauina o le poto ua ia aʻoaʻoina, ma le manaoga o loo iai ina ia faanatinati ona gaoioi e faailoa atu lona alofa mo Ieova. E lē o iai se fuafuaga mo le suesueina o lomiga faaopoopo ma i latou ua maeʻa ona suesueina le tusi o Le Poto. Ia faamatala atu ma le agalelei ma le manino i se tagata suesue e lē taulau ona talilelei mai i le poto e uiga i le Atua le mea e tatau ona ia faia ina ia agaʻi ai i luma faaleagaga. Atonu e te fesootai atu i ai mai lea taimi i lea taimi, e tatala ai le ala mo ia ina ia uia laasaga e manaomia ina ia taʻitaʻia atu ai i le ola e faavavau.—Fai. 12:13.

²⁴ O se soo fou na te faatāuaina le upu moni ma papatisoina o le a tele se agaʻi i luma e manaomia ona faia i lona poto ma le malamalama ina ia mafai ai ona faamausalīina atoatoa i le faatuatua. (Kolo. 2:6, 7) Nai lo le faaauauina o lana suesuega faale-Tusi Paia i le aiga ina ua maeʻa le tusi o Le Poto, e mafai ona e faaavanoaina oe e saunia so o se fesoasoani totino atonu o ia manaomia ina ia taʻumatuaina ai faaleagaga. (Kala. 6:10; Epe. 6:1) O lana vaega fai, e mafai ona faalauteleina lona malamalama e ala i le faitauina o le Tusi Paia i aso taitasi, suesue totino Le Olomatamata ma isi lomiga mai le ʻauauna faamaoni,’ sauniuni ma faatasi atu i sauniga, ma talatalanoa i le upu moni ma uso talitonu. (Mata. 24:45-47; Sala. 1:2; Galu. 2:41, 42; Kolo. 1:9, 10) O lona faitauina o le tusi Our Ministry ma faatatauina mea o loo iai, o le a tele se aogā i lona avea ma sē ua faamaopoopoina lelei faatiokarate ina ia faataulauina atoatoa ai lana faiva.—2 Timo. 2:2; 4:5.

²⁵ Atiina aʻe o le Tomai o le Aʻoaʻo Atu: Ua poloaiina i tatou ina ia “fai nuu uma lava ma soo . . . , aʻoaʻo atu ia te i latou.” (Mata. 28:19, 20) Talu ai e lē mafai ona faaesea mai le fesootai atu o le tomai o le aʻoaʻo atu i le faia ma soo, tatou te mananao ai e faaleleia le avea o i tatou ma faiaʻoga. (1 Timo. 4:16; 2 Timo. 4:2) Mo ni faamatalaga atili e atiina aʻe ai le tomai o le aʻoaʻo atu, atonu e te manao e faitauina mataupu nei: “Atiina aʻe o le Tomai o le Aʻoaʻo Atu” ma le “Pāʻia o le Loto o Lau ʻAu Faalogologo” i le tusi School Guidebook, suesuega e 10 ma le 15; “Faiaʻoga, Aʻoaʻo Atu” (Teacher, Teaching) i le Insight, Tusi e 2; ma mataupu o Le Olomatamata o le “Atiae i Mea e Lē Mafai Ona Mu i le Afi,” ma le “A E Aʻoaʻo Ia Paʻia le Loto,” Mati 1, 1985; “Pe Tou Te Fetufaai ma le Uigā mai le Tusi Paia?,” Novema 1, 1986; ma “Le Auala e Mauaina ai le Olioli i le Faia o Soo,” Fepuari 15, 1996.

²⁶ A o e taumafai e faia soo i le faaaogaina o le tusi o Le Poto, ia tatalo pea e lē aunoa ina ia faamanuia e Ieova o Lē “na te faatupuina,” au taumafaiga ina ia pāʻia loto o tagata i le tala lelei o le Malo. (1 Kori. 3:5-7) Talosia e te mauaina le olioli o le aʻoaʻo atu i isi ina ia malamalama, ia talisapaia, ma ia gaoioi i le poto lea e taʻitaʻia ai i le ola e faavavau!