Ua Manaomia Atili ni Uso i le Auaunaga Paeonia
1 Ua uunaia i tatou e Paulo ina ia “tele pea mea e fai i le galuega a le Alii.” (1 Kori. 15:58, NW) O le uiga o lenei mea mo le toatele, o le auai lea i le auaunaga paeonia. Ia Setema na teʻa nei, e faitauafe i latou i le lalolagi aoao na faaopoopo atu i muaʻau o paeonia!
2 I le taimi nei o le aofaiga tele o i latou o loo auauna o ni paeonia i oganuu a lo tatou lālā, o tuafāfine. (Sala. 68:11) Maeu se olioli semanū e maua e le faapotopotoga pe anafai e toatele ni uso e mafai ona auai i muaʻau o auauna faataimi atoa! (Sala. 110:3) E mautinoa lava e toatele uso e tatau ona latou tausia o latou tiute tauave faaletino ma tiute i le aiga. O isi foi o loo galulue mamafa mo le tausia o manaoga faaleagaga o le faapotopotoga. Tatou te talisapaia nei tane o ē o loo faamalolosi ona o le Malo.—1 Timo. 4:10.
3 E ui i lea, pe mafai ona toatele nisi o outou uso e auai i le auaunaga paeonia? Afai o paeonia lau avā, pe mafai ona e auai faatasi ma ia? Afai ua e litaea mai lau galuega, pe e te lē ioe ea e leai se isi auala e sili ona faamalieina ai nai lo le faaalu o lou taimi i le faiva faataimi atoa? Afai o lena faatoʻā iu au aʻoga pe o e manatunatu mamafa ea ma tatalo ina ia aapa atu i le faaeaga o le auaunaga faapaeonia e fai ma laasaga e te agaʻi atu ai i isi faaeaga o le auaunaga?—Efe. 5:15-17.
4 O se tasi uso sa ia faatauina atu lana pisinisi na olaola lelei ae galue faavaitaimi ina ia mafai ai ona paeonia. Ona o lana taitaiga lelei, sa paeonia ai le toatolu mai lana fanau e toafa ina ua faatoʻā iu lava a latou aʻoga. Sa naunau le lona fa e auai ma i latou. O lenei uso ma lona aiga ua matuā faamanuiaina i latou.
5 Se Faitotoa Lautele ua Tatalaina: O le auaunaga paeonia e mafai ona tatalaina ai “se faitotoa lautele e taitaia atu ai i galuega.” (1 Kori. 16:9, NW) O uso o ē ua avea ma paeonia e mafai ona faaaogā soo i le faapotopotoga. O le galue ma le maelega i le fanua e faaopoopo ai lo latou malosi faaleagaga ma saosaolaumea ai i lo latou agaigai i luma faatiokarate. E mafai e le auaunaga paeonia ona tatala le avanoa i isi faaeaga faaopoopo o le auaunaga. A mavae le tausaga muamua o le auaunaga paeonia, e iai se faamanuiaga o le auai lea i le Aʻoga mo le Auaunaga Paeonia. E mafai e auauna o le faiva ma toeaina o loo nofofua ona aapa atu i le Aʻoga mo le Toleniina o Auauna o le Faiva. O ulugalii faaipoipo o ē ua agavaa e mafai ona talosaga atu mo le Aʻoga i Kiliata. O uso atonu e mulimuli ane agavaa mo le galuega femalagaai. Ioe, o le faiva faapaeonia e tatalaina ai le avanoa i isi faaeaga sili o le auaunaga i le faalapotopotoga a Ieova.
6 O uso o ē e mafai ona fetuunai o latou tulaga ina ia auai ai i le auaunaga paeonia sauatoa e mafai ona latou tofo i le fiafiaga sili lea e sau mai le faateleina o le foai atu.—Galu. 20:35.