Le Auala e Faaaogā Tatau ai le Taimi
1 O le tele o mea e fai i le auaunaga ia Ieova, ua faapisi ai pea i tatou! (1 Kori. 15:58) Ua tatou iloa lelei le manaomia ona faia o suesuega totino ma le suesue faatasi e avea o se aiga, le faitauina o le Tusi Paia i aso taitasi, le sauniuni ma auai i sauniga a le faapotopotoga, ma le faia e lē aunoa o se sao i le faiva i le fanua. E iai tiute tauave faaleoleo mamoe a ovasia, ma e latou te vaaia foi isi tiute i le faapotopotoga. O nisi e iai ni tiute tauave mamafa i aiga po o matafaioi eseese e faia mo isi. Ina ia faia mea uma i le auala saʻo, e manaomia ai e tagata uma le paleni ma le maopoopo lelei.
2 Faamuamua Mea Tāua: O le taulau manuia i lo ‘tatou faaaogaina tatau o le taimi,’ e faalagolago i lo tatou faautauta ma le mafaufau poto. (Efe. 5:15, 16) E tatau ona tatou iloa po o ā “mea e sili atu ona tāua” ma tuu ai e faamuamua i la tatou lisi o mea tāua. (Fili. 1:10, NW) O le auala lenei ua faamatalaina ai e se tasi ulugalii lo la aiga faatiokarate: “E ma te faamuamua i o ma olaga le upu moni . . . O le upu moni e lē o se vaega o o ma olaga, ae o lo ma olaga. O isi mea uma e lagolago atu i ai.” O se mea matuā tāua le faamuamua o le tapuaiga ma le auaunaga ia Ieova i le olaga o se tasi.
3 Ia Mātau Lelei Mea o Loo Maimau ai le Taimi: E 168 itula o le vaiaso, ma e manaomia ona tatou faaaogā ma le atamai o tatou taimi avanoa. Ina ia lava le taimi mo galuega faatiokarate, e manaomia ona tatou mātauina lelei ma faaitiitia mea o loo maimau ai le taimi. Na faaalia i se tasi suesuega e faapea, i le Iunaite Setete, e faaalu ai e tagata matutua le sili atu i le 30 itula i le vaiaso e matamata ai i le televise! A o isi, e tele atu le taimi e faamaimau i le faitauina o tusi faalelalolagi. Atonu ua mātauina e nisi le tele o le taimi latou te faaaluina i faatasitasiga faitele, i mea ua fai ma o latou mausa, i faafiafiaga, po o nisi ituaiga o gaoioiga fai faatasi. Atonu e manaomia ona tatou iloilo totoʻa a tatou gaoioiga i aso faisoo ina ia iloa ai se auala e sili atu ona lelei e faaaogā ai o tatou taimi. O se mea atamai lo tatou faatapulaa po o le ā le tele o le taimi e tatou te faaaluina i galuega e lē tāua.
4 Ia Atiaʻe se Faasologa Lelei: Po o ā lava o tatou tulaga totino, e mafai e i tatou taitoatasi ona faaaogā se taimi mo manaoga faaleagaga. Ua iloa e nisi e faapea o le vave ona amata i aso taitasi, ua fesoasoani ia i latou e faatinoina ai ni mea e sili atu. Afai e umi se taimi e tatou te faimalaga ai i le galuega pe faatalitali ai mo isi, e mafai ona tatou faaaogā nisi o na taimi mo le faitau Tusi Paia, sauniuni ai mo sauniga, pe faalogologo ai foi i mataupu ua saunia e le Sosaiete e ala i kaseti. E matuā tele aogā e maua e aiga pe a faataatia ese e lē aunoa se taimi patino e suesue faatasi ai. O le a maua e tagata uma o le aiga aogā pe afai e iai tonu i le taimi faatulagaina mo le suesuega faaleaiga ma lē maimau ai le taimi.
5 A o mavae atu aso taitasi, e tatau ona tatou matuā iloa lelei e faapea “ua itiiti ona aso ua totoe.” (1 Kori. 7:29) O o tatou ola e faalagolago i le auala o tatou faaaogaina ai le taimi sili ona tāua lea o loo totoe. O le a faamanuiaina i tatou pe afai tatou te faaaogā tatau le taimi ina ia mafai ai ona tatou faamuamua pea manaoga o le Malo!—Mata. 6:33.