Mātua—Ia Toleni a Outou Fanau e Talaʻi
1 Ua faamanuiaina a tatou faapotopotoga i le toatele o fanau o ē ua iai le faanaunauga moni e auauna i le Atua. (Fai. 12:1) O i latou ia e aofia ai i ē ua valaauliaina e Ieova e faia se vaega i le viiaina o ia. (Sala. 148:12-14) O lea la, o le toleniga o loo avatu e mātua i a latou fanau i lea aso ma lea aso e tatau ona faaaofia ai ma faatonuga i le auala e faailoa atu ai i isi lo latou faatuatua i le galuega talaʻi o le Malo.—Teu. 6:6, 7.
2 Ia Toleni Fanau i Laasaga Auiluma: O fanau e tatau ona toleniina i uluai tausaga ina ia ō faatasi ma o latou mātua i le faiva. A o lei ō atu i le auaunaga, ia sauniunia lau fanau e fai se sao i se auala uigā. Ia sauniuni mamao se mea e te manao latou te faia pe a iai i fale o aiga. O fanau laiti e mafai ona tufaina atu sāvali ma tusi valaau (handbills) ma valaaulia tagata ina ia auai i le Maota o le Malo. O talavou laiti o ē e lelei le faitau e mafai ona valaaulia e faitauina mau i le fale. E mafai ona latou ofoina mekasini, e faaaogā ai se taulimaga puupuu. Pe a latou maua le poto masani, toleni i latou e faaaogā le Tusi Paia i a latou taulimaga. E toatele tagata talaʻi talavou ua amata a latou lava alā mekasini ma faia toe asiga e lē aunoa. E matuā sili ona lelei mo se tamaitiiti ona galulue ma se tagata matua nai lo o se isi foi talavou laitiiti. E mafai e le tagata matua ona faamatala i lē ona le fale e faapea o le talavou lea o loo toleniina i le faiva.
3 O se tasi teineitiiti na fesili atu i toeaina mo se latou fesoasoani ina ia mafai ai ona agavaa o ia e avea o se tagata talaʻi o le Malo. E ui lava sa na o le lima ona tausaga i lea taimi ma e lē iloa ona faitau, ae sa mafai lava ona ia taʻu atu ma le uigā le feau o le Malo i fale. Sa ia taulotoina le mea o loo iai mau, suʻe i ai, ona fai atu lea i lē e ona le fale e faitau mai, ona ia faamatalaina atu lea.
4 O fanau e tatau foi ona aʻoaʻoina e ala i faaaoaoga a mātua i le tāua o le iai o se faasologa lelei mo le auai i le faiva e lē aunoa. O mātua e manaomia ona faataatia se faasologa faalevaiaso talafeagai mo le auaunaga ma pipii mau i ai, ina ia iloa ai e le fanau aso o le vaiaso lea e masani ona faataatia ese mo le galuega talaʻi.
5 Pe afai e toleniina fanau mai i uluai tausaga ina ia fiafia ma olioli i le faiva, o le a uunaia ai i latou e aapa atu mo faaeaga e sili atu i le lumanai, atonu e aofia ai le auaunaga paeonia. (1 Kori. 15:58) O i tatou uma lava e tatau ona faalaeiau i fanau o loo tatou faatasi ina ia faia se agaigai lelei i luma e avea ma ē e viiaina Ieova.