“Pe Iai ea se Taimi o le a Fealofani ai Tagata Uma?”
1 O se feau matagofie e faagaeetia ai ma faamafanafana loto, o le a folafolaina atu i le lalolagi aoao i gagana e 169. O le ā lenei feau? Ma o le a faapefea ona faaooina atu?
2 O le feau e uiga i le alofa i tuaoi. E maua lea feau i le Tala o le Malo Nu. 35, o le matua, “Pe Iai ea se Taimi o le a Fealofani ai Tagata Uma?” Ua iloiloina puupuu e lenei Tala o le Malo le tulaga o loo iai mataupufai a tagata i le lalolagi aoao i le taimi nei, ua faaalia ai e faapea, o le leai o se alofa i tagata o le pogai autū lena o le tele o le loto mafatia ma le tiga. O loo faamatala mai ai le mafuaaga ua maalili po ua leai ai se alofa i tuaoi ae maise lava i o tatou aso, ma le uiga o lenei mea mo le lumanai.
3 E lē gata i lea, ua faaalia i le Tala o le Malo Nu. 35 e faapea, o le alofa moni i tuaoi, o loo faatinoina lea e le faitau miliona o tagata o loo ola i le lalolagi i aso nei. O loo faailoa mai ai i lea sāvali i latou o ē o loo faia se sao i le toe faaolaolaina o le Faa-Kerisiano mai le amataga—le tapuaiga i le uluai senituri lea sa iloga i le alofa i tuaoi e pei ona aʻoaʻoina e Iesu Keriso.—Luka 10:25-37.
4 O loo faaiu le Tala o le Malo Nu. 35 i se faamalamalamaga o le auala o le a lē pine ae faatinoina ai e tagata i le lalolagi aoao le alofa i tuaoi i lalo o le pulega a le Malo o le Atua e ala ia Keriso. O i latou o ē faitau i lenei feau ua faalaeiauina ina ia iai se polosiua, O le ā e Manaomia e le Atua Mai ia i Tatou? ma iloa ai le auala e avea ai o se tasi e faatinoina lenei fuafuaga alofa i le lalolagi aoao lea o loo faamatalaina auiliili mai i le Afioga a le Atua.
5 O Ai o le a Faaooina Atu Lenei Feau? O Molimau a Ieova i le lalolagi aoao o le a faia se sao i le faaooina atu o lenei feau e uiga i le alofa i tuaoi i ē latou te masani, tuaoi, ma tauaiga i masina o Oketopa ma Novema. E faalaeiauina i latou uma lava ua agavaa ina ia fai se sao i le tufatufaina atu i le lautele o le Tala o le Malo Nu. 35.
6 O le sini autū o lenei tauiviga, ina ia faagaee ai le fiafia o tagata e faia se suesuega faale-Tusi Paia a lē i le polosiua o le Manaomia po o le tusi o Le Poto. E lē gata i lea, o se taumafaiga ma le loto atoa a auauna taitoatasi a Ieova, o le a saunia ai se molimau sili e uiga i le Atua o le alofa, o Ieova, ma e uiga i lona Alo, o Iesu Keriso.