Manaomia—Nisi Suesuega Atili Faale-Tusi Paia

¹ O loo faamanuia e Ieova le Atua lana faalapotopotoga faalelalolagi i le faaauau pea ona faatuputeleina. I le tausaga faaleauaunaga ua mavae, e 375,923 i latou na papatisoina i le lalolagi aoao—o se faatatauga e silia i le 1,000 soo fou i aso taitasi, pe tusa foi ma le 43 tagata i itula taitasi! E ui lava i le faitau sefulu o tausaga o mea faigata atonu sa fesagai ma o tatou uso i vaega eseese o le lalolagi, ae o loo tupu olaola pea le galuega o le Malo ma o loo maua ai ni faatelega mataina. Maeu se mea e matuā fiafia ai i le faitau atu i tala e uiga i le agaigai i luma ua faia i le faasalalauina atu o le tala lelei!

² I le tausaga faaleauaunaga ua mavae i le lālā a Samoa, na tatou vaaia ai foi ni faatelega i le faatatauga o le aofai o tagata talaʻi ma paeonia lagolago, i itula na faaaluina i le talaʻiga, ma i le aofai o tusi, tamai tusi, polosiua, ma mekasini na tufaina atu. Sa iai se faatelega i le aofai o i latou na papatisoina ma se tumutumuga e sili atu nai lo o se isi lava taimi, i le aofai o ē na auai i le Faamanatuga. Ae faapefea le galuega o le faia o toe asiga ma suesuega faale-Tusi Paia? Sa iai se faatelega mataina a Toga i le aofaiga o a latou toe asiga ma suesuega faale-Tusi Paia na faia. E ui sa iai sina faatelega i toe asiga mo Samoa i Sisifo, ae sa paʻū le aofaiga o toe asiga mo Amerika Samoa ma Toelau, ma sa iai foi le faaitiitiga i suesuega faale-Tusi Paia mo nei atunuu uma e tolu. Ae peitai, o nei vala o le faiva e tāua mo le faia o soo. O le ā se mea e mafai ona faia e i tatou taitoatasi ina ia toe faaleleia ai lenei paʻū ua iai i toe asiga ma suesuega faale-Tusi Paia?

³ Ia Faamalosia le Naunau e Faia se Suesuega: O i tatou lava e manaomia ona taulai atu ina ia tatou malolosi ma maelega faaleagaga. O soo moni o Keriso e “maelega i galuega lelei.” (Tito 2:14) Pe a tatou autaluina la tatou faiva, pe mafai ona tatou faapea atu ua tatou matuā naunau lava e toe asia i latou uma na tatou tuuina ai lomiga i le auaunaga i le fanua? Po o tatou mataalia i le ofoina atu o suesuega faale-Tusi Paia i aiga ia i latou uma e faaalia le fiafia? (Roma 12:11) Po o tatou manaomia ona atiina ae se faanaunauga atili ina ia faia toe asiga ma amataina ni suesuega faale-Tusi Paia i aiga?

⁴ O lau lava faitauga Tusi Paia, le auai e lē aunoa i sauniga, ma le suesueina o lomiga, o le a fesoasoani i le faatumauina o lo tatou faafouina faaleagaga ma maua ai le malosi mai le agaga o le Atua. (Efe. 3:16-19) O lenei mea o le a faamalosia ai lo tatou faatuatua ma le mautinoa ia Ieova, ma lo tatou alofa i o tatou uso a tagata. O le a uunaia ai i tatou e aʻoaʻo se isi tagata i le upu moni, ma avea ai la tatou faiva o se mea e fiafia ai, e taulau manuia, ma faagaeetia ai. Ioe, e tatau ona tatou mananao e faia atili nisi suesuega faale-Tusi Paia!

⁵ Ia Suesue Muamua ma le Aiga: O mātua Kerisiano e iai fanau o loo nonofo i le aiga e tatau ona manatu mamafa i la latou polokalame o le faia e lē aunoa o le suesuega faale-Tusi Paia a le aiga. (Teu. 31:12; Sala. 148:12, 13; Faata. 22:6) O le a aogā tele mo mātua ona suesueina ma a latou fanau le polosiua o le Manaomia, ona sosoo ai lea ma le tusi o Le Poto ina ia sauniunia ai i latou ia taʻuagavaaina e avea o ni tagata talaʻi e lei papatisoina, faapea le tuuina atu ma le papatisoga. O le mea moni, e mafai foi ona iloiloina nisi mataupu faaopoopo, e faalagolago i le manaoga ma le matua o le tamaitiiti. O se matua o lē o loo suesue ma se tamaitiiti e lei papatiso, e mafai ona lipotia le taimi, le suesuega, ma toe asiga, e pei ona faaauivi mai i le Pusa Fesili o La Tatou Faiva o le Malo o Me 1987.

⁶ Ia Faaleleia Au Faamaopoopoga Totino: I le mafaufau atu i le aofai o mekasini, polosiua, ma tusi ua tufaina atu, e lē taumatea la le anoanoai o fatu ua faasalalauina atu. O nei fatu o le upu moni ua lūlūina, ua maua ai se avanoa e sili ona telē mo le mauaina mai o ni soo fou. Ae po o le a faamalieina moni ea se fai faatoaga po o se fai togalaau pe afai e faaauau pea ona ia totōina, ae i le iuga o ana taumafaiga uma, o le a leai se taimi e seleseleina ai? O le mea moni, e leai. E faapena foi la i le faiva, e manaomia ona faia toe asiga.

⁷ Pe masani ona e faia se faasologa o taimi e faia ai toe asiga? Ia vave ona toe foi atu e asia i latou uma na faaalia le fiafia. Ia faia toe asiga ma le sini e amataina se suesuega faale-Tusi Paia. Po o e teuina se faamaumauga talafeagai ma maopoopo lelei o au toe asiga? Faatasi ai ma le suafa ma le tuatusi o lē ona le fale, ia mautinoa ua faamau ai ma le aso o le uluai asiasiga, ni lomiga na tuu, se faamatalaga puupuu o se mataupu na talanoaina, ma se manatu e mafai ona talanoa i ai i le isi asiasiga. Fai sina avanoa i lau faamaumauga mo ni faamatalaga faaopoopo e mafai ona faaopoopo atu i ai pe a uma toe asiga taitasi.

⁸ Iloilo le Auala e Faia ai se Toe Asiga: O ā nisi o manatu e tatau ona manatuaina pe a toe asiasi atu i se tagata fiafia? (1) Ia mafana, faaleuo, ia aasa, ma ia ʻaua le fai mea sasalu. (2) Ia talanoa i mataupu po o fesili e fiafia i ai le tagata. (3) Ia faafaigofie le talanoaga ma ia faavae i le Tusi Paia. (4) I asiasiga taitasi, ia taumafai e aʻoaʻo lē ona le fale i se mea o le a ia iloa e tāua totino ia te ia. (5) Ia ati ae le naunau i le isi mataupu lea o le a talanoaina i le isi asiasiga. (6) Aua e te nofo umi ai. (7) Aua le faia ni fesili e lagona ai e lē ona le fale le matamuli pe faafaigata foi mo ia ona taliina. (8) Faaaogā le faautauta ina ia aua le taʻuleagaina manatu sese po o masaniga leaga a lē ona le fale a o lei mafai ona atiina ae le talisapaia faaleagaga.—Tagai i le faaopoopoga o La Tatou Faiva o le Malo o Mati 1997 mo ni fesoasoani atili i le auala e mafai ona taulau manuia ai i le faia o toe asiga ma le amataina o suesuega faale-Tusi Paia.

⁹ Vaavaai mo Avanoa Uma: I se tasi o faapotopotoga, sa mafai ona maua mai suafa ma numera o potu o tagata uma e nonofo i se fale e matuā malu puipuia. Sa tusia se tusi patino mo tagata taitoatasi e nonofo ai, ma sa fafao i ai ma ni sāvali se lua i tusi taitasi. I le faaiuga o le tusi, na ofoina atu ai se suesuega faale-Tusi Paia i le aiga ma le numera o se telefoni ina ia mafai ai ona tali mai lē o le a ia mauaina le tusi. I ni nai aso, na telefoni atu ai se alii talavou ma talosagaina se suesuega. Na faia se toe asiga i le aso na sosoo ai, ma faia ai se suesuega i le tusi o Le Poto. I lena lava po, na auai atu ai o ia i le Suesuega Tautusi a le Faapotopotoga, ma sa faaauau pea ona ia auai i sauniga uma. E lei pine lava, ae amata loa ona ia faitauina i aso taitasi le Tusi Paia ma agaigai ai i luma seia oo ina papatisoina.

¹⁰ O se vaega sa talaʻi faatasi i se taavale, sa fuafua e faia faatasi ni toe asiga. Ina ua faia e se tuafafine se tasi o ana toe asiga, sa lei maua atu i le fale le tagata lea na ia alu atu e vaai, ae o se tasi tamaitai talavou na ia tatalaina le faitotoa ma faapea mai: “Ua leva ona ou faatali atu mo oe.” Na maua e lē ona le fale le tusi o Le Poto i se taimi muamua atu mai se tasi la te masani. E oo ane i le taimi lea na asiasi atu ai tuafāfine i lona fale, ua soo faalua le tusi i lana faitau ma sa matuā faafiafiaina ai o ia i faamatalaga o loo iai i le tusi. Na faapea mai o ia, sa lei faateia o ia ina ua vaai atu i le asiasiga a Molimau ia te ia i lena aso, auā sa tatalo o ia mo i latou ina ia ō mai ma suesue le Tusi Paia ma ia. Na amataina se suesuega, sa amata ona ia auai i sauniga a le faapotopotoga, ma sa vave lava ona ia agaigai i luma.

¹¹ O se tuafafine ua toetoe lava 25 tausaga talu ona papatiso, na ia avatu talu ai nei lava le tusi o Le Poto i lona tinā. Sa amata e lona tinā, o lē e alu i se lotu, ona faitau le tusi. Ina ua uma ona ia faitauina mataupu e lua, sa ia telefoni atu loa i lana tama teine ma, sa matuā ofo lava le teine ina ua fai atu lona tinā: “Ua fia avea aʻu o se tasi o Molimau a Ieova!” Sa amata loa ona suesue le tinā ma ua papatisoina nei o ia.

¹² Faataitai Fautuaga Nei: Pe na e faaaogaina le faafeiloaiga tuusaʻo mo le amataina o suesuega? Atonu e na ona e faapea atu lava: “Afai e te manao e faia sau suesuega faale-Tusi Paia i le aiga e aunoa ma se totogi, e mafai ona ou faasino atu ia te oe mo ni nai minute le auala e faia ai. Afai la e te fiafia i ai, e mafai ona faaauau.” E toatele lava tagata e lē faalotolotolua e talia lena ofo, ma ua latou fiafia e matauina le faataitaiga o le auala e faia ai se suesuega faale-Tusi Paia.

¹³ I le amataga lava o le suesuega, ia faailoa i le tagata suesue le auala e muai sauniuni ai e ala i le faitauina o mau o loo taʻua ai ma vase ia upu autū o tali i fesili o loo tusia ai. Ia uaʻi saʻo atu i na o manatu autū. E ui atonu e manaomia ona tatou fetuutuunai i nai uluai suesuega, ae tāua tele le faia o le suesuega faale-Tusi Paia i se faavae faifai pea. Ia mafaufau i le auala o le a e faailoa atu ai le tatalo o se vaega tāua o le suesuega ma le auala o le a e sauniunia ai le tagata suesue i faamatalaga faale-Tusi Paia auā ni teteega. Ia e matuā faia le suesuega e avea o se mea e fiafia ai!

¹⁴ O le mea moni, e lē tutusa uma le vave o le agaigai i luma o tagata suesue o le Tusi Paia. O nisi e lē tutusa le naunau i mea faaleagaga e pei o isi, e lē vave foi ona latou puepuemauaina mea o loo aʻoaʻoina. O isi e pisi tele o latou olaga ma atonu e lē mafai ai ona tuuina atu le taimi lea e manaomia e faia ai se mataupu atoa i vaiaso taitasi. O lea, i nisi o tulaga, atonu e tatau ona faia e sili atu i lo o le faatasi se suesuega ina ia talanoaina ai nisi o mataupu, ma nisi masina faaopoopo e faaumaina ai le tusi. I nisi o tulaga, e mafai ona tatou suesueina muamua le polosiua o le Manaomia ona agaʻi atu ai lea i le tusi o Le Poto. O lenei vala, faatasi ai ma lo latou auai i sauniga a le faapotopotoga, o le a fesoasoani i tagata suesue taitoatasi ina ia maua ai se faavae mausalī i le upu moni.

¹⁵ E lē gata i lea, tatalo ina ia maua se suesuega faale-Tusi Paia! (1 Ioa. 3:22) O se tasi o mea e sili ona tauia mo se Kerisiano, o le faaaogaina lea e Ieova e fesoasoani atu i se tasi ina ia avea ma soo o Iesu Keriso. (Galu. 20:35; 1 Kori. 3:6-9; 1 Tesa. 2:8) O le taimi lenei e faailoa atu ai le matuā maelega i le galuega o le faia o suesuega faale-Tusi Paia, ma le mautinoa atoatoa o le a matuā faamanuiaina e Ieova a tatou taumafaiga ina ia amataina nisi suesuega!

[Faamatalaga faaopoopo i le itulau 3]

Po o e tatalo ina ia amataina se suesuega fou faale-Tusi Paia?