Ia Faateleina le Molimau Atu a o Lata Mai le Iuga
1 O le vaitaimi o le seleselega o se taimi e olioli tele ai. O se taimi foi o le matuā galue malosi. E puupuu le taimi e aoina ai fua. E lē tatau ai la i tagata faigaluega ona faifaiaga i la latou galuega.
2 I le tautala i ai faafaatusa, na faatusaina ai e Iesu “le vaitaimi faaiuiu o le faiga o mea” i le taimi o le seleselega. (Mata. 13:39, NW) Ua tatou ola nei i le vaitaimi faaiuiu o lenei faiga o mea, faatasi ma se taimi puupuu ua totoe e avatua ai se molimau “i le atu laulau uma.” (Mata. 24:14) A o tulata tele mai la le iuga, e manaomia ona tatou faateleina so tatou sao i le faiva. Aisea? Na faamatala mai e Iesu: “E tele le saito e seleseleina, a o le au fai galuega e toaitiiti ia.”—Mata. 9:37, 38; Roma 12:11.
3 Ia Iai i se Tulaga Faanatinati: Ina ua amata e Iesu lana galuega tele o le talaʻiga, sa na o le tolu ma le ʻafa tausaga na iai mo ia e faamaeʻa ai le mea na tofia mai o ia e fai. Na ia talaʻi ai ma se uiga o le faanatinati, ma faapea mai: “E tatau ona ou folafola le tala lelei o le malo o le Atua . . . auā o le mea lea na auina mai ai aʻu.”—Luka 4:43.
4 Na totoina e Iesu i ona soo se uiga faapena o le faanatinati. (Mare. 13:32-37) O le mafuaaga lena “ua le mapu foi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei [ia] Iesu le Keriso.” (Galu. 5:42) O galuega e itiiti le tāua sa lei faamuamuaina i o latou olaga. E ui lava ina toalaiti tele i latou, ae na latou taulau manuia i le talaʻiina atu o le tala lelei “i tagata uma lava i le lalolagi.”—Kolo. 1:23.
5 O loo iai foi mafuaaga sili atu mo i tatou e ati ae ai lena lava uiga o le faanatinati i le taimi nei, a o “lata mai le gataaga o mea uma lava.” (1 Pete. 4:7) Ua uma ona faatulaga e Ieova le aso ma le itula mo le iuga o lenei faiga o mea. (Mata. 24:36) O le a faaumaina lava le galuega talaʻi i le taimi o loo totoe. O le mafuaaga lena e faaauau ai pea ona tatou faateleina a tatou taumafaiga ina ia faateleina pea tagata e faaoo atu i ai le tala lelei.
6 E ala i le faateleina o lo tatou sao i le galuega o le molimau atu a o taulata mai le iuga, o le a tatou maua ai le faamalieina i le faapea atu ia Ieova, e pei ona sa faia e Iesu: ‘Ua matou faaumaina le galuega na e tuuina mai ia i matou, matou te faia.’—Ioa. 17:4.