Le Auaunaga Paeonia—Le Faaaogaina Tatau o lo Tatou Taimi!
1 ‘O loo matuā tele lava mea e ao ona ou faia! Pe o se mea atamai ea la mo aʻu ona amata i le taimi lenei ona auai i le auaunaga paeonia?’ O le manatu lena o se tasi tuafafine a o ia faalogologo atu i le lauga a se toeaina paeonia na faamatuaina, “Ia Agaigai i Luma i le Faiva Faapaeonia” i se fonotaga matagaluega. Sa iai se tasi uso i lena lava aofia na manatu faapea, ‘Na faapefea ona ia maua le avanoa e auai i le auaunaga paeonia? E lē o aʻu o se toeaina, ae ua matuā faatumulia loʻu olaga i galuega fai!’
2 A o faaauau ona talanoaina e le toeaina faamanuiaga i le auaunaga paeonia, na ia faatalatalanoa ai ni paeonia mai le matagaluega, o ē na latou taʻua fetuutuunaiga na latou faia ina ia avea ai o se paeonia ma le auala na matuā faamanuiaina ai e Ieova a latou taumafaiga. O le tasi e lē atoatoa le malosi, o le isi e lē talitonu lana paaga, ae o le isi ua ia tuua lana galuega faaletino ae sa mafai lava ona ola o ia e tusa o le tupe sa maua. I le faalogo atu i le auala na taulau manuia ai nei paeonia ona o le fesoasoani a Ieova, na amata ai ona toe tilofaia e le uso ma le tuafafine lea sa iai i le aofia o laua lava mafaufauga ma o la tulaga. E valaaulia foi oe ina ia faia faapena, ae maise lava ona o le faaitiitia o itula manaomia mo paeonia lea ua mafai ai i le taimi lenei ona ausia e le toatele o le au talaʻi o le tala lelei.
3 Ua tatou iloa o Ieova o Lē na Foafoaina Mea ma o le Pule Silisili Ese Aoao ma o loo tatou nofo aitalafu ia te ia i o tatou ola. (Tani. 4:17; Galu. 17:28) E manino ia i tatou e faapea o loo faaaogaina e Ieova se faalapotopotoga e tasi. Ua faaeaina i tatou i le auauna ma le faamaoni faatasi ma lena faalapotopotoga, i le lagolagoina “o le auauna faamaoni ma le mafaufau” i le tuuina atu o le molimau mo le Malo a o lei oo mai le iuga. (Mata. 24:45; 25:40; 1 Pete. 2:9) O le ola i le siʻui “o aso e gata ai,” ua tatou iloaina ai faapea ua itiiti lava le taimi o totoe e talaʻi ai. (2 Timo. 3:1) Ae i le taimi lenei, ua moomia ai ona tatou tausia o tatou aiga i le itu faaletino. (1 Timo. 5:8) Ua foliga mai e tauau ina lē feautaʻi le faasoa i itu tau tupe a se tasi e pei o taimi muamua. Atonu ua lē pei lo tatou soifua maloloina o le tulaga sa iai muamua. Ma o le tulaga moni lava, tatou te mananao ina ia iai sina taimi ma ni nai alamanuia e tatou te faaaogaina mo i tatou lava. (Fai. 3:12, 13) O lea atonu tatou te mafaufau ai po o se mea atamai moni le tali atu i le valaaulia ina ia avea ma se paeonia.
4 Ua ia te i tatou taitoatasi le tiute tauave o le tilofaia o o tatou tulaga ma le faaeteete ma filifili ai pe faamata e mafai ona tatou paeonia. (Roma 14:12; Kala. 6:5) E faalaeiauina i tatou i le mātau atu i le fuainumera faateleina o i latou o ē ua tali atu i le valaau ina ia paeonia. E ui lava i omiga ma faafitauli o nei aso e gata ai, ae ua faaalia e le lipoti o le auaunaga o loo lomia i le 1999 Yearbook le latalata atu i le 700,000 tagata o Ieova i le lalolagi aoao o loo agaigai i luma i le faiva faapaeonia. E tusa lava po o auauna i lalo o tulaga faigata tau tamaoaiga, le leai o ni auala o femalagaaiga, aafia i ni faafitauli tau soifua maloloina, po o ōia i nisi faafitauli ma mea faigata, ae e lē o faavaivai ai lava nei uso ma tuafāfine i le faia o le mea lelei, ma o se mea lea e faamālō atu ai. (Kala. 6:9) Ua latou taliaina le valaau a Ieova ina ia tofotofo atu ia te ia. (Mala. 3:10) Latou te lagona o le auai i le auaunaga paeonia o le faaaogaina tatau lea o le utiuti o lo latou taimi ma a latou alamanuia ma ua faamanuiaina moni i latou e Ieova ona o le faia o nei fetuutuunaiga manaomia ina ia ulu atu ma tumau ai i le galuega paeonia.
5 Ua Faamanuiaina Paeonia: Na faamatala mai e se tuafafine i Cameroon o lē e iai lana tama teine laitiiti e faapea: “Talu mai lava le fanau mai o laʻu tama teine, ma te ō faatasi ai lava i le faiva. E oo lava i le taimi e lei savali ai, ou te fafaina ai o ia i loʻu tua ma fusi mau lelei i se ie. I se tasi taeao i le faiva, na ou mālōlō ai i se tamai faleoloa i tafatafa o le auala. Na tuua aʻu e laʻu tama, ma alu atu ma nisi o mekasini sa i laʻu ato. Sa ia savalivali atu i le isi tamai faleoloa na latalata ane. E ui lava e lei mafai ona ia tautala atu i ni upu se tele, ae na ia faatosina mai le uaʻi o se fafine ma tuuina atu loa i ai le mekasini. Sa na o le ofo o lenei fafine i le vaai atu i se teineitiiti o faia se vaega i lenei galuega. Sa ia talia ma le fiafia le mekasini faapea foi ma se suesuega faale-Tusi Paia i le aiga!”
6 I le tali atu i le valaau mo nisi paeonia lagolago, na filifili ai se toeaina ma o le ulu foi o se aiga i Zambia o lē e iai sana galuega totogi e galue ai faasoloatoa, ina ia paeonia e ui lava i lana faasologa pisi sa iai. Sa ia manao e faataatia se faaaoaoga mo le faapotopotoga ma lona aiga. I nisi o taimi, e paka ai lana taavale i tafatafa o le auala ae taina i le laau le lipine o Le Ala e Maua ai le Fiafia i le Aiga, ma na te valaauliaina tagata fegasoloai ina ia ō atu ma faalogologo i le tusi o loo faitauina mai ma le leotele. I le faia faapea, na mafai ai ona ia ofoina tusi e 16 o Le Ala e Maua ai le Fiafia i le Aiga ma tusi o Le Poto e 13, ma na ia amataina ni suesuega faale-Tusi Paia se lua.
7 Na matauina foi se uiga lelei o le agaga faapaeonia i le atunuu o loo sosoo ane o Zimbabwe. Ia Aperila i le 1998, i se faapotopotoga e toʻa 117 le autalaʻi, na lipotia mai ai le iai o paeonia lagolago e toʻa 70 ma paeonia sauatoa e toʻa 9. O se tasi faapotopotoga e iai tagata talaʻi e toʻa 94 na lipotia mai ai paeonia lagolago e toʻa 58. Ae sa iai foi le isi faapotopotoga, e toʻa 126 tagata talaʻi, na lipotia mai ai le filifili o le toʻa 58 e paeonia lagolago faatasi ai ma paeonia sauatoa e toʻa 4. Na mautinoa le avea o le tausaga faaleauaunaga ua tuanai ma tausaga mataina i Zimbabwe. E ui lava sa pisi le auuso i galuega faaleaiga, galuega fai a le faapotopotoga, ma faugafale a le lālā, ae sa latou uaʻi atu i le faaaluina tatau o lo latou taimi i le faiva.
8 Ua iloa e paeonia o le taumafai e amata ma tumau ai i le galuega paeonia e lē faalagolago i so latou malosi. O i latou lava e muamua ioeina faapea po o le ā lava le mea latou te faia e mafai ona o “le malosi ua foaiina mai e le Atua.” (1 Pete. 4:11) O lo latou faatuatua ua mafai ai ona latou faaauau i la latou faiva i lea aso ma lea aso. Na i lo le sailia o o latou lava manuia i le faamalieina o o latou manaoga, ua iloa e paeonia ina ia agaigai i luma, e manaomia “le finafinau tele,” ae o le iuga latou te maua ai le tele o faamanuiaga.—1 Tesa. 2:2.
9 Le Faaaoaoga a Paulo e Aogā le Faataitai i Ai: O loo faamaumauina i le Tusi Paia mea na faia e le aposetolo o Paulo i le faiva ma le fesoasoani lelei na ia tuuina atu i le toatele o tagata. O lea, a suʻe se tasi na matuā sili ona tele ana mea na fai, o Paulo lea. Na ia onosaia sauaga ma tulaga faigata na oo ia te ia ina ia talaʻia le tala lelei ma faamalosia faapotopotoga. Sa manaomia foi ona ia tauivi ma se tulaga faigata i lona soifua maloloina. (2 Kori. 11:21-29; 12:7-10) Sa ia maumauai e faaaogā tatau lona taimi. Na ia faalauiloa mai faapea na ia mafaia galuega uma ona o le fesoasoani a Ieova. (Fili. 4:13) E leai ma se tasi o i latou na fesoasoani i ai Paulo e ono faapea mai sa maimau lona taimi ma ana taumafaiga na faaalu i le auaunaga ia Ieova pe sa tatau foi ona faaaogā tatau. O lea foi ua tatou maua aogā i aso nei ona o le faaaogā tatau e Paulo o lona taimi! Maeu lo tatou talisapaia o lana fautuaga faagaeeina ina ia fesoasoani ai ia i tatou e faatulaga saʻo mea e ao ona faamuamua ma pipii atu i le upu moni i nei taimi faigata!
10 O le taimi sili lenei na i lo se isi lava taimi, ‘ua faaitiitia ai le taimi o loo totoe e talaʻi ai le tala lelei.’ (1 Kori. 7:29; Mata. 24:14) O lea, ua talafeagai ai ona fesili ifo ia i tatou lava, ‘Pe afai e faafuasei ona faamutaina loʻu ola a taeao, pe e mafai ona ou taʻu atu ia Ieova i le asō sa faaaogā tatau loʻu taimi?’ (Iako. 4:14) Aisea e lē talanoa atu ai nei ia Ieova i le tatalo, e faamautinoa atu ia te ia lou faanaunauga ina ia faaaogā tatau lou taimi i le avea ma se tasi o ana Molimau? (Sala. 90:12) Tatalo mo le fesoasoani a Ieova ina ia faafaigofie lou olaga. E ui lava ina sa e lei filifili muamua e fai, ae pe lē o lea ea ua e iloaina e mafai ona faaofi atu le auaunaga paeonia i lou olaga?
11 Ia Faaaogā i se Auala e Sili Ona Lelei Ou Tulaga: E mautinoa, ona o tulaga eseese e lē mafai e i latou uma o loo naunau ona faatulaga itula e 70 i le masina e auauna ai o ni paeonia sauatoa. E ui i lea, e toatele tagata talaʻi ua latou fuafua itula e 50 i le masina i le faiva e auauna ai o se paeonia lagolago i le tele e mafai ai po o le faaauau ai pea. Afai o ou tulaga o loo iai i le taimi lenei ua lē mafai ai ona e paeonia lagolago pe paeonia sauatoa, aua neʻi e faavaivai. Ia faaauau pea ona tatalo ina ia suia ou tulaga. Afai e lē o talafeagai fetuunaiga o loo iai i le taimi lenei, ia faamalosia oe i le iloaina o loo fiafia Ieova i so o se mea o loo mafai ona e faia ma lou tagata atoa i lana auaunaga. (Mata. 13:23) O loo ia mataulia mai o loo e tu mausalī i lana itu ma o loo e taumafai malosi ina ia avea o se tagata talaʻi faamaoni o lē e lē tāitai ona misia se masina i le sailia o se avanoa e tuuina atu ai se molimau. Atonu e mafai ona e agaigai i luma e ala i le faamaaiina o ou tomai i le molimau atu, i le galue ina ia taulau o se tagata talaʻi ma o se faiaʻoga o le tala lelei.—1 Timo. 4:16.
12 Ona ua latalata mai le “aso tele ma le silisili o Ieova,” e manaomia ai ona tatou faaaogaina tatau le taimi o loo totoe pe afai tatou te mananao e faamaeʻaina le galuega na faatonuina i tatou e fai. (Ioe. 2:31) O loo iloa e Satani ua puupuu lona taimi, ma i se uiga e lei faapea muamua, o loo ia taumafai ai i so o se mea e gata mai ai lona malosi e faalavelave mai i o tatou olaga ina ia faafaigata ai mo i tatou ona uaʻi atu i mea e silisili ona tāua. (Fili. 1:10; Faaa. 12:12) Seʻi aua lava neʻi e manatu māmā i le naunau mai o le Atua ia te oe. E mafai ona fesoasoani Ieova ia te oe ina ia faafaigofie lou olaga ma aapa atu ai i le faia o le mea silisili e te mafaia i le faiva. (Sala. 145:16) O le mea e fiafia ai, e toatele ua latou iloa, o le toe tilofaia o o latou tulaga, ua mafai ai ona latou ausia le paeonia lagolago po o le paeonia sauatoa. E mautinoa, e maua e paeonia le faamalieina moni i le faaaogaina tatau o lo latou taimi. Pe o le a avea ea oe o se tasi o i latou?