Pe E te Vaai i na o Foliga Vaaia i Fafo?
1 A o tatou faatinoina la tatou faiva i le lautele, o uluai lagona e ia i tatou e uiga i isi tagata, e tatou te ono faatalatu ai e tufa atu le tala lelei ia i latou. Mo se faaaoaoga, o le ā sou uiga faaalia pe afai e tulimatai pea ma le masalosalo oe e se tagata foliga sauā pe a e asiasi atu i lona tuaoi o lē na te faaalia pea le fiafia i le upu moni? O se tuafafine paeonia na oo i se tulaga faapena na filifili e faafeiloai atu le tamaloa ma talanoa atu ia te ia. Sa faafeiloaia o ia e le tamaloa i se uiga lē mafaufau. Ae o le mea e ofo ai, sa faalogo o ia i le feau a le Tusi Paia ma sa fiafia e talia le faia o se suesuega. O le iuga o le lē faamasinoina e le tuafafine o foliga vaaia i fafo, na tatala ai le auala mo lenei tamaloa ma lana avā e aʻoaʻoina le upu moni.
2 O se tasi tuafafine sa muai fefe foi i foliga vaaia o se taulealea laulu uumi, ae sa maumauai pea e talaʻi puupuu atu ia te ia i so o se taimi na sau ai o ia i le faleoloa lea sa faigaluega ai le tuafafine. Sa iu lelei ana taumafaiga, ma ua avea nei le taulealea ma Molimau papatisoina. O le ā o le a taofia ai i tatou mai le vave faia o se faaiuga e faapea, o tagata faapena e lē fiafia?
3 Faataʻitaʻi i le Faaaoaoga a Iesu: Sa silafia e Iesu o le a ia foaiina atu lona soifua e sui ai tagata uma. O lea, sa lei faavaivaia ai o ia i foliga vaaia o isi. Sa ia silafia lelei, e oo lava ia i latou sa masani ona tetee atonu o le a loto malilie e faia suiga pe a avatu i ai le fesoasoani ma uunaiga talafeagai. (Mata. 9:9-13) Sa ia taumafai e fesoasoani uma atu i tagata mauoa faapea ma ē matitiva. (Mata. 11:5; Mare. 10:17-22) Seʻi aua tatou te faamasinoina tagata tatou te feiloai i le faiva i o latou foliga vaaia, ma lē mafai ai ona tatou iloa tagata atonu o loo lelei o latou loto. (Mata. 7:1; Ioa. 7:24) O le ā e mafai ona fesoasoani ia i tatou ina ia faataʻitaʻi ai i le faaaoaoga mataina a Iesu?
4 E ala i lo tatou suesueina o le Tusi Paia, ua oo ai ina tatou talisapaia e faapea, ua iai i le Afioga a le Atua le mana e suia ai mafaufauga o se tasi, lana amio, ma uiga. (Efe. 4:22-24; Epe. 4:12) O le mea lea, a o faaalia le faaeteetega tatau, e ao ai ona ia i tatou se uiga mautinoa ma taatia atu isi mea uma i aao o Ieova, o Lē na te silafia loto o tagata.—1 Samu. 16:7; Galu. 10:34, 35.
5 Tau ina ia avea lo tatou tufaina atu ma le lē faailoga tagata o le tala lelei i ituaiga uma o tagata, e tusa lava po o ā o latou foliga vaaia, e saosaolaumea i le galuega tele o le seleselega i nei aso e gata ai.—1 Timo. 2:3, 4.