Po ua Tatalaina Nei mo Oe le Avanoa e Paeonia Ai?
1 Ua faamanatu mai ia i tatou e la tatou mau faaletausaga o le 1999 e faapea o loo tatou iai pea i le ‘aso e faaolaina ai’ a Ieova. (2 Kori. 6:2) Peitai o le a lē toe umi ae faaiuina loa lona aso e faaolaina ai. Ona amata loa lea o lona “aso faamasino.” (2 Pete. 2:9) A o faaauau ona faasalafa atu e Ieova le avanoa mo le faaolataga i le fanau a tagata, maeu le olioli i le vaai atu i le faateleina o le fuainumera o ē tali mai!
2 Ua faafetaiaia e tagata o Ieova le luʻi o le oo atu lea i ē tali lelei mai a o lei oo ina tuai tele. Mo le toatele o tagata talaʻi o le Malo, o le uiga o lenei mea o le ulu atu lea i le auaunaga faapaeonia. Po ua tatalaina nei mo oe le avanoa e paeonia ai? Aisea ua tatou fesili ai?
3 Faailoaga o le Talisapaia: E pei ona faasilasila atu i La Tatou Faiva o le Malo o Ianuari 1999, ua faaitiitia itula manaomia mo paeonia sauatoa ma paeonia lagolago. Ina ia ausia le manaoga fou, e manaomia ai e paeonia sauatoa ona tuuina atu le 70 itula i le faiva i masina taitasi mo se tuufaatasiga e 840 itula i le tausaga faaleauaunaga. O le a faaaluina e paeonia lagolago le 50 itula i le auaunaga i masina taitasi. O nisi nei o faailoaga o le talisapaia na mauaina mai ona o se iuga o nei fetuutuunaiga:
“Maeu se meaalofa e faamanuiaina ai mai lo tatou Tamā faalelagi!”
“E leai ni upu e mafai ona faailoa atu ai faalogona o le olioli, le alofa, ma le loto faafetai mo lenei sauniuniga!”
“O le a sili atu ai ona faigofie ona tausisia a matou faasologa!”
“Matou te tatalo ina ia toatele atu nisi o le a auai i le faiva faataimi atoa ma olioli i faamanuiaga ia e maua mai le auauna atu ia Ieova i se fua tele.”
4 A o tatou tau lalata atu i le tumutumuga o le aso o le Atua e faaolaina ai, ua manino e finagalo Ieova i ona tagata ina ia tuuina atu se alaga faaiu ma le malosi o viiga. O le tele ma le malosi o lenei feau ua faateleina (1) e ala i le faatuputupulaia ma le mausalī o le fuainumera o ē folafolaina le Malo ma (2) e ala i le taumafai o tagata taitoatasi ina ia faateleina le mea na te mafai ona faia i le talaʻiga o le Malo. O Ieova, o lē e “faatupuina,” ua na ia faataulauina nei auala uma e ala i le faamanuiaina o le uiga loto malie o i latou uma e taliaina le faaolataga.—1 Kori. 3:6, 7; Sala. 110:3.
5 Aua Lava Neʻi Misia Lona Fuafuaga: E tusa ai ma le aso o Ieova e faaolaina ai, na apoapoai atu ai Paulo i ona uso Kerisiano: “O i matou o faigaluega faatasi ma ia [Ieova], ua matou aioi atu ia te outou, ina neʻi talia fua e outou le alofa tunoa o le Atua ma misia ai lona fuafuaga.” O le a tatou lē ‘misia lona fuafuaga,’ pe afai tatou te vaai i ai i lenei taimi o “le tausaga e talileleia mai ai” e galulue ai i avanoa uma mo le faaolataga o isi. (2 Kori. 6:1, 2, NW) I aso nei, ua matuā faanatinati ai le faatatauina o upu a Paulo. O Kerisiano o ē faaalia le alofa loloto mo Ieova, latou te manatu i ai o se faaeaga le faia o se sao atoatoa e mafai ai i le faiva ua ia tofia ai i latou. Po ua mafai ea nei la ona e faia se sao atoatoa e sili atu i le faiva o se paeonia sauatoa i le taimi nei?
6 O se Sini Talafeagai: Mo le Lālā a Samoa, ua avea ai ma o tatou sini le iai o ni paeonia sauatoa e toʻa 85 e amata ia Setema 1. E tatou te talitonu e talafeagai ma e mafai ona ausia lenei sini. Aisea tatou te matuā mautinoa ai? Ia Mati 1997 sa tatou vaai ai i le toʻa 133 o uso ma tuafāfine na paeonia lagolago, ae ia Aperila 1998 na toetoe lava 100 na latou faia faapea. O le toatele lava na lipotia mai le taʻi 60 itula—e toe 10 lava itula ona ausia loa lea o le aofaiga fou o itula manaomia o paeonia sauatoa! Tusa lava pe na o le toʻa 18 mai ia i latou na paeonia lagolago o le a avea o ni paeonia sauatoa a o lei oo i le faaiuga o lenei tausaga faaleauaunaga, e mafai lava ona tatou amata ia Setema i le 85 po o le sili atu foi o paeonia faataimi atoa!
7 E Manaomia se Faasologa: Pe o faafaigata pea mo oe ona ausia le 70 itula mo le masina i le auaunaga i le fanua? Atonu o le a fesoasoani ia te oe le mafaufau i le taʻi 17 itula i le vaiaso. E ala i le faaaogaina o faasologa faaaʻoaʻo o loo i le itulau o loo sosoo ai, taumafai e fuafua se faasologa faapaeonia sauatoa o le a fetaui ma ou lava tulaga. Pe a fuafuaina, talanoa faatasi ma paeonia agavaa mo ni fautuaga i le auala latou te faapaleniina ai la latou auaunaga paeonia ma tiute tauave totino ma tiute faaleaiga. Fesili atu i la outou ovasia matagaluega pe faapefea i paeonia o le matagaluega ona faatulaga a latou fuafuaga o le auaunaga i vaiaso taitasi. Ona faalagolago atu loa lea ia Ieova e faamanuia mai i au fuafuaga ina ia avea ma paeonia.—Faataoto 16:3.
8 Ia Avea o se Fuafuaga Faaleaiga: Pe sa e mafaufauina le avea o le paeonia ma fuafuaga faaleaiga? Atonu e mafai ona tou nonofo i lalo o se aiga ma talanoaina auala—faatasi ai ma le fuafua ma le faaeteete ma le lelei ona felagolagomai—e mafai ai e se sui se toatasi pe toalua foi o le aiga ona paeonia. I se tulaga malamalama, o le a iloaina ai e nisi i le iloiloina ma le faamaoni o o latou tulaga ua lē faatagaina ai i latou e avea ma paeonia sauatoa i le taimi nei. Pe afai o le tulaga lena, fai ma sini i le lumanai le avea ma paeonia. Ae amata ona fai ni fuafuaga e galue agaʻi i ai i se aso patino e amata ai ona paeonia. Atonu e mafai ona e paeonia lagolago i nisi taimi o le tausaga ina ia galue ai i le ausiaina o le auaunaga faapaeonia sauatoa.
9 E eseese lava tulaga o paeonia sauatoa e 67 o loo iai i le taimi nei i atunuu o i lalo o le vaavaaiga a le Lālā a Samoa. E lē o i latou uma e matuā atoatoa lo latou soifua maloloina, ma o le toatele e tofu ma tiute tauave faaleaiga ma le sailia o mea tau tupe. O nisi paeonia e toʻa 25 ua silia ma le 50 tausaga le matutua, ma pe ā ma le toʻafā o i latou e silia ma le 65 tausaga le matutua. E toetoe lava 30 e nofofua, ma le toaono e taʻi 20 tausaga le matutua pe laiti ifo foi. Pe tusa ma le tasi vae fa o paeonia uma o uso, o le toatele o i latou e iai tiute tauave faaleaiga ma faalefaapotopotoga. O i latou uma nei ua “faaaogā tatau le taimi” e paeonia ai, ma i le tele o vala ua ola ai i ni olaga faigofie ae sili atu ona faamalieina ai.—Kolo. 4:5, NW.
10 Pe E te Manaomia Ona Faafaigofie? O le faafaigofie o lou olaga e mafai ona tatala atu ai le avanoa e avea ai oe o se paeonia. Pe o pei lou olaga o se fale telē o loo iai ni potu ma ni meafale e lē o manaomia, ae o loo alu ai le tele o le taimi, tupe, ma galuega ina ia tausia ai? Pe afai o le tulaga lena, o le fetuunai atu i tulaga e sili ona faigofie e mafai ona faatagaina ai e avea o se paeonia. Pe mafai ona e faaitiitia le taimi o loo e faaaluina i galuega totogi? Pe mafai ona e faasao mai le taimi mai galuega e lē tāua po o le faaalia o le faateleina o le manatu paleni i taimi e faaalu i mea faafiafia?
11 Ua fautuaina i tatou e le Tusi Paia, i le 1 Timoteo 6:8 e faapea: “[O le] maua e i tatou o mea e aai ai ma mea e oofu ai, ia gata ai o tatou manao.” O le faamalieina i mea iti o se vala tāua lena i le faia o mea silisili tatou te mafai i le auaunaga ia Ieova ma faafaigofie ai ona faamuamua manaoga faaleagaga. (Mata. 6:22, 33) I le itulau e 104 o le 1998 Yearbook i le lipoti a Iapani, ua ofoina mai ai nisi o manatu i le mafuaaga ua iai ai i lena atunuu lenei agaga lelei faapaeonia. Seʻi tilofaia se tasi lenei o manatu: “O le mea moni i tulaga lautele, o fale o tagata Iapani e lē soona faatetelē naua, ma o lea e manaomia ai na o sina taimi itiiti e tausia ai, ma i le tele o tulaga, latou te masani i le faafaigofie o le olaga. Pe lē o le aano ea lena o le 1 Timoteo 6:8?
12 I le lalolagi aoao, e talaʻia ai e auauna a le Atua le tala lelei faatasi ai ma se faamalosi ua faateleina a o lei oo mai i le iuga o le aso o Ieova e faaolaina ai. O le mea e faamālō ai, i le tausaga na mavae nei i se fuafaatatau na toetoe lava 700,000 i latou na auai i se vala o le auaunaga faapaeonia i masina taitasi. Pe mafai la ona fetuunai lou olaga ina ia e auai ma i latou? Matou te valaauliaina oe ina ia iloiloina ma le faaeteete faatasi ma le tatalo ou tulaga a o e taliina le fesili: “Po ua tatalaina nei mo oe le avanoa e paeonia ai?”
[Faamatalaga faaopoopo i le itulau 3]
SINI: 85 PAEONIA SAUATOA!
[Pusa i le itulau 4]
Faasologa Faaaʻoaʻo a le Paeonia Sauatoa
Manaomia: 17 itula i le vaiaso
Tasi le Aso o le Vaiaso ma le Faaiuga o le Vaiaso
Aso Itula
Aso Faraile 8
Aso Toonai 6
Aso Sa 3
Aofaiga o Itula: 17
Lua Aso o le Vaiaso ma le Aso Toonai
Aso Itula
Aso Lua 7
Aso Tofi 7
Aso Toonai 3
Aofaiga o Itula: 17
Tolu Aso o le Vaiaso ma le Aso Sa
Aso Itula
Aso Gafua 5
Aso Lulu 5
Aso Faraile 5
Aso Sa 2
Aofaiga o Itula: 17
Lua Afiafi ma le Faaiuga o le Vaiaso
Aso Itula
Aso Gafua 3
Aso Lulu 3
Aso Toonai 8
Aso Sa 3
Aofaiga o Itula: 17
Fai Sau Lava Faasologa o le Paeonia Sauatoa
Aso Itula
Aso Gafua
Aso Lua
Aso Lulu
Aso Tofi
Aso Faraile
Aso Toonai
Aso Sa
Aofaiga o Itula: 17