Po o le a E Siitia Atu?

Afai o le tali i lena fesili o le ioe, e tele la mea o loo iai e manaʻomia e oe faapea ma isi ona tausolomua ona fai. E ala i le mulimuli i laasaga faavae nei o loo faaauivi mai i lalo, o le a vave ai lava ona e masani i lau faapotopotoga fou.

(1) Pe afai ua e mautinoa le nofoaga o le a e siitia atu i ai, atonu e mafai e le failautusi o le faapotopotoga lea e te iai nei ona maua mai le tuatusi o le Maota o le Malo o lau faapotopotoga fou. Pe a e taunuu atu i lena vaipanoa, ia suʻe vave le maota ma faamautinoa taimi o sauniga a le faapotopotoga. Pe afai e sili atu i le tasi le faapotopotoga e faaaogāina le Maota o le Malo, ona fesili lea i toeaina e faailoa atu ia te oe po o lē fea faapotopotoga e iai le oganuu lea e te nofo ai. Aua neʻi faatuai ona auai i sauniga ma faamasani atu i toeaina o lena faapotopotoga.

(2) O failautusi a lau faapotopotoga lea o loo e iai nei ma lau faapotopotoga fou, o le a galulue faatasi i le auina atu o pepa, Congregation’s Publisher Record mo oe ma lou aiga. O le a auina atu foʻi se tusi e faailoa atu ai i toeaina o lau faapotopotoga fou. (Tagaʻi i le Pusa Fesili i La Tatou Faiva o le Malo o Fepuari 1991.) E ao i le Komiti o le Auaunaga a le Faapotopotoga iinā ona logoina le faisuʻesuʻega o le suʻesuʻega tautusi a le vaega lea o le a e alu i ai e uiga i lou taunuu atu, ina ia mafai ai ona ia faafesootaʻi atu oe ma fesoasoani ia te oe e iloa le nofoaga o fai ai le vaega o suʻesuʻega tautusi lea o le a e auai atu i ai.—Roma 15:7.

(3) O tagata talaʻi uma i lau faapotopotoga fou e iai sa latou vaega fiafia e faia—o le faamasani atu lea ia te oe ma talia fiafia oe. (Faatusatusa i le 3 Ioane 8.) O le mea moni, o le uiga o lenei mea, e tatau ona e auai i sauniga ina ia mafai ai ona e olioli i se feofoofoaʻiga e faalaeiʻau ma ati aʻe ai ma uso ma tuafāfine.

(4) E lē tatau ona e faatali seʻiloga ua maeʻa uma gaoioiga e tatau ona faia i lou siitia atu, ona e faatoʻā auai lea i le faiva i le fanua ma lau faapotopotoga fou. A o e faamuamuaina manaʻoga o le Malo, o le a faagaoioia lava isi mataupu mo oe, ma o le a e lagona ai le toʻafilemu i lou siʻomaga fou. (Mata. 6:33) Pe a oo ina e mautū atu i lou nofoaga fou, e mautinoa o le a e manaʻo e valaaulia nisi mai le faapotopotoga e asiasi atu ma tou faamasani lelei.—Roma 12:13e.

O le siitia atu i se isi nofoaga o se galuega tele. Ae peitaʻi, pe afai e faia e tagata uma o aofia ai le mea o fautuaina mai, o le a leai ni mea e toe solo ai i tua faaleagaga. O le a matuā faafiafiaina lava tagata uma o aofia ai i la tatou mafutaga pele o se auuso Kerisiano.