Tagaʻi i le Mana o le Tusi Paia!

E faapefea? E ala i le matamata i le āta vitiō ua faaigoaina The Bible—Its Power in Your Life. O le kaseti vitiō lona tolu lea o le faasologa ua faaigoaina, The Bible—A Book of Fact and Prophecy. E ui e lē o faaliliuina i le faa-Samoa, ae o loo maua i le faa-Peretania ma isi gagana taatele.

Pe e te manaʻo i se faaipoipoga e taulau manuia? Pe e te manaʻomia se fesoasoani ina ia manumalo ai i taimi faigatā? E mafai faapefea ona tutupu aʻe le ʻau talavou e avea o ni tagata matutua e maufaatuatuaina i tiute tauave? E mafai ona fesoasoani le Tusi Paia, e pei ona faaalia i le vitiō lenei. Faalogo atu a o faamatala mai e tagata le mana o le Tusi Paia ua mafai ona faaleleia ai o latou olaga. Faalogo atu ia i latou a o faamatala mai le auala ua fesoasoani ai mataupu silisili o le Tusi Paia ia i latou e fesagaʻia faafitauli o le olaga i aso nei.

O lenei vitiō o se meafaigaluega aogā e fesoasoani ai i tagata fiafia fou e iloa aogā o le faaaogāina o le Afioga a le Atua e avea o se taʻiala i o latou olaga. Ua maua nei i le Sosaiete le vitiō, The Bible—Its Power in Your Life. E mafai ona e faafesootaʻia le auauna o tusi a le faapotopotoga mo le otaina o sau kopi o le vitiō.