‘O Fafine o Loo Galulue i la le Alii’
1 I upu o i luga, na faamatalaina ai e le aposetolo o Paulo ia Tufaina ma Tufosa, o ni tuafāfine se toʻalua na galulue mamafa i le faapotopotoga i Roma. O le isi, o Peseti, na faapea mai Paulo: “O le na galue tele i la le Alii.” Sa faapena foʻi ona ia taʻuleleia Fipe e faapea “e toatele ua ia fesoasoani i ai.” (Roma 16:2, 12) I le Tusi Paia sa faamatilatila mai ai Toreka e faapea, o lē “ua tele ana galuega lelei ma mea alofa.” (Galu. 9:36) Maʻeu se faamanuiaga mo le faapotopotoga i le iai o nei fafine faaleagaga!
2 Pe e tatou te talisapaia ia tuafāfine o ē o galulue mamafa i la tatou faapotopotoga? E latou te faia se vaega sili i le galuega talaʻi, faia le tele o suʻesuʻega faale-Tusi Paia, ma fesoasoani i le toʻatele o ē fou mai. E latou te faaaluina foʻi le tele o taimi e fesoasoani atu ai i tamaiti ina ia agaʻigaʻi i luma faaleagaga. E faia e fafine Kerisiano la latou vaega i le atiina aʻe o le agaga o le alofa, ʻoliʻoli, fīlēmū, ma le māʻelegā i totonu o le faapotopotoga. E latou te lagolagosua lava i le tele o auala ina ia mafai ai e a latou tane ma isi tagata o le ʻāiga ona faia ni mea e sili atu i le auaunaga a Ieova.
3 Tuafāfine i le Auaunaga Faataimi Atoa: Ia i latou o ē matuā galulue mamafa i la le Alii, o tuafāfine misionare, e toʻatele ua faia se sao i le atiina aʻe o le galuega i isi atunuu. I faapotopotoga e auauna ai a latou tane, e pisi ai avā a ovasia femalagaaʻi i le faiva i le fanua, i le faalāʻeiʻauina o le toʻatele o tuafāfine. E lē faagaloina foʻi ia tuafāfine i Peteli, o ē o loo faatinoina ma le māʻelegā le auaunaga paia auā le lagolagoina o le faalapotopotoga a Ieova. Ma o o tatou tuafāfine paeonia sauatoa, e ala i a latou taumafaiga faamaoni i le viʻiaina o le Atua, ua fesoasoani atu ai i le faitauafe o tagata e aʻoaʻoina le upu moni.
4 Ua maua e nei fafine faamaoni le lotomalie sili i le auala ua faataulagaina ai o latou lava olaga. (1 Timo. 6:6, 8) Ua tatau ai la ona tatou faamālō ia i latou i so o se faalāʻeiʻauga ma le lagolagosua e mafai ona tatou tuuina atu ia i latou.
5 O fafine Kerisiano, ua avea o se oloa tautele i le faalapotopotoga a Ieova, i le faatinoina o le auaunaga faamaoni lea ua avea ma faamanuiaga mo tagata uma. Seʻi o tatou faaauau ona talisapaia fafine faapena ma tatalo ina ia faamanuia i latou e Ieova a o tūmau pea ona latou “galulue i la le Alii.”