“Ina Mataala Ia”
1Ina ua uma ona faamatalaina mea iloga o le a tutupu e faailogaina ai aso e gata ai o lenei faiga o mea, na faamalosiʻau atu Iesu i ona soo “ina mataala ia.” (Mare. 13:33) Aiseā e tatau ai i Kerisiano ona mataala pea? Auā ua tatou ola i taimi sili ona mataʻutia o le talafaasolopito o tagata. E lē mafai la ona tatou tulemomoe faaleagaga. O lena mea o le a iʻu ai i lo tatou lē talisapaia o le galuega ua tuuina mai e Ieova ia i tatou e faia i nei taimi o le iʻuga. O le ā lena galuega?
2 Ua faatonuina e Ieova ona tagata ina ia folafola atu i le lalolagi aoao le tala lelei e uiga i lona Malo—e na o lea le faamoemoe mo le fanau a tagata. O lo tatou galulue soosoo tauʻau ma le faalapotopotoga a le Atua ua faailoaina ai i tatou o ni Kerisiano moni, o ē o loo mafaufau i vaitaimi o loo tatou ola ai, faapea ma le manaʻoga ina ia fesoasoani i isi e faalogo i “upu o le ola faavavau.” (Ioa. 6:68, LF) O le faia ma le maelega o se sao i lenei galuega e aupito sili ona tāua, e faailoa atu ai lo tatou mataala faaleagaga.
3 Uunaʻia e Talaʻi: I le avea o ni Molimau a Ieova, e tatau ona tatou mautinoa e uiga i la tatou faiva. O le alofa i le Atua ma tuaoi ua uunaia ai i tatou lava e faia se sao i le galuega talaʻi. (1 Kori. 9:16, 17) O le faia faapea, o le a tatou faasaoina ai i tatou lava faapea ma i latou e faalogo mai ia i tatou. (1 Timo. 4:16) Seʻi avea ma a tatou filifiliga maumauaʻi le faia e lē aunoa o se sao i le mea tatou te mafaia, ma i le umi e tatau ai i le talaʻia e uiga i le pulega aupito sili ona lelei e mafai ona maua e le fanau a tagata—le Malo o le Atua!
4 O le faanatinati o la tatou faiva ua faamamafa mai ai ia i tatou se mea moni tāua—le pa mai o le puapuaga tele, o le a oo mai a o tatou auai pea i le faia o lenei galuega. O lo tatou lē iloa o le aso ma le itula, e manaʻomia ai ona tausia pea lo tatou mataala ma nofosauni i taimi uma lava, i le tatalo ma ia faalagolago atu ia Ieova. (Efe. 6:18) O loo faaauau pea ona faalauteleina atu le galuega talaʻi. Ae i se aso e lē o toe mamao, ona oo ai lea o le galuega molimau silisili i le talafaasolopito faaletagata i sona tumutumuga.
5 Ia mulimuli ma le faamaoni i le poloaʻiga a Iesu “ina mataala ia.” Ua sili atu ona tāua lenei mea i le taimi nei na i lo o se isi lava taimi. Seʻi tatou tali atu ma se uiga o le faanatinati. Seʻi tumau ona tatou mataala faaleagaga, mataalia, ma ia tiotio i le auaunaga a Ieova i le asō ma aso uma lava. Ioe, seʻi o tatou “mataala ma ia faautauta.”—1 Tesa. 5:6.