Pe E te Talaʻi ma le Lototele?
1 E ui lava sa puʻeina faapagota ma faamataʻuina e tagata tetee, sa faaauau pea lava e Peteru ma Ioane ona folafola ma le lototetele le feʻau o le Malo. (Galu. 4:17, 21, 31) O le ā le uiga mo i tatou i aso nei ia talaʻi ma le lototele?
2 Lototele i le Tuuina Atu o le Molimau: O se upu e uiga tutusa ma le “lototele” o le “maumauaʻi,” o lona uiga o le “maumauaʻi ma le lē fefe, faamalosi, ma tumau.” I Kerisiano moni, o le talaʻi ma le lototele, o lona uiga o le lē fefe e tautala atu i so o se taimi pe a iai se avanoa talafeagai e tufa atu ai le tala lelei i isi. (Galu. 4:20; 1 Pete. 3:15) O lona uiga e tatou te lē mamā i le tala lelei. (Sala. 119:46; Roma 1:16; 2 Timo. 1:8) I lea, o le lototele o se uiga e manaʻomia ina ia faataunuuina ai lo tatou tofiga e talaʻia le tala lelei o le Malo i lenei taimi o le iʻuga. Ua uunaʻia ai i tatou e tufa atu le tala lelei i tagata i so o se mea lava e ono maua ai i latou.—Galu. 4:29; 1 Kori. 9:23.
3 Lototele i le Aʻoga: Pe e faafaigatā ona e talaʻi atu i aumea i le aʻoga ona o le masaniga lea o le fefe po o le matamuli? I nisi taimi e lē faigofie; ae o le mea moni, e mafai ona avea o se luʻi moni lava. Ae peitaʻi, o le a faamalosia oe e Ieova pe afai e te tatalo mo le lototele e talaʻi atu ai i isi. (Sala. 138:3) O le a fesoasoani le lototele ia te oe e faailoa atu oe lava o se tasi o Molimau a Ieova ma tatalia tauemuga. O le iʻuga o lau talaʻiga i le aʻoga, atonu o le a faasaoina ai i latou o ē faalogo ia te oe.—1 Timo. 4:16.
4 Lototele i le Galuega: Po o lauiloa oe i le galuega o se tasi o Molimau a Ieova? E na o le pau lava le auala e mafai ona oo atu ai le tala lelei i aumea i le galuega, atonu e ala i lou talaʻi atu ia i latou. O lou lototele o le a fesoasoani foʻi ia te oe e maua ai taimi e te mālōlō ai mai le galuega mo au sauniga faa-Kerisiano ma tauaofiaga.
5 Lototele pe a Oo Mai Tofotofoga: E mātua tāua lava le mauaina o le lototele pe a tatou fesagaʻi ma teeteega. (1 Tesa. 2:1, 2) E fesoasoani le lototele ia i tatou e taofimau ai i lo tatou faatuatua pe a faamataʻuina i tatou, tauemua, po o sauāga tuusaʻo. (Fili. 1:27, 28) O le lototele foʻi e faamalosia ai i tatou ina ia tutū mausalī pe a oo mai omiga ma tatou lē faamaoni ai e pipii atu i faatulagaga a lo tatou Atua, o Ieova. E faamalosia ai foʻi i tatou e tausisia lo tatou filemu pe a taumafai isi e faatupu ni finauga.—Roma 12:18.
6 Po o ā lava faigatā tatou te fesagaʻia, seʻi o tatou finafinau i le talaʻia o le tala lelei ma le lototetele.—Efe. 6:18-20.